Zaj Nyeem Ib
Thoob Tsib 9:13-18b
Cov lus nyob hauv Ntawv Thoob Tsib
Leej tib neeg twg paub tau TSWV NTUJ zaj ?
Leej twg mem tau yam HUAB TAIS siab nyiam ?
Peb cov txawj tuag tej tswv yid qauj les
thiab lub hom phiaj zuav zaws.
Lub cev ciab zib hnyav ntsuj plig
thiab daim vuas av luaj ntxhov tswv yim ntau zaj.
Yam saum av peb twb xam tsis thoob
thiab ntawm tes twb ceeb laj,
yam saum qaum ntuj leej twg txawj xam ?
Leej twg paub tau koj zaj,
yog koj tsis pub kev thoob tsib
thiab tsis xa koj
ntsuj plig ntshiab puag txheej saud tuaj ?
Cov nyob saum daim av txoj kev
thiaj pom qab taug,
tib neeg thiaj paub kawm yam ntxim koj siab
thiab kev thoob tsib thiaj cawm tau lawv.
Yog TSWV NTUJ lo Lus
Nkauj Paj Nruag Txais Ntuj Lus
NPN 90:3-4,5-6,12-13,14,17(1)
Txais: HUAB TAIS, koj yeej ib txwm yog peb qhov chaw vam khom tiam dhau tiam.
(Nqua Suab Cav Txog Tswv Ntuj, 192)
1. HUAB TAIS, koj ua kom neeg rov mus ua av luaj.
Koj hais tias,
“As Das tsoom tub ki, nej rov mus ua plua av !”
Koj saib ib txhiab xyoo zoo li ib hnub.
Koj saib ib hmos zoo li ib teev. Teb.
2. Koj rho neeg txoj sia thaum lawv tsaug zog nruab dab ntub.
Lawv ploj ntais zoo li nroj tsuag tawg paj yav sawv ntxov,
tab sis yav tsaus ntuj, lub paj qhuav tas. Teb.
3. Thov koj qhia kom peb paub suav peb lub hnub nyoog ua neej,
peb thiaj yuav tau ib lub siab thoob tsib.
HUAB TAIS, thov koj rov qab los.
Thov koj hlub koj cov tub txib mas ! Teb.
4. Sawv ntxov tsees,
thov koj pub koj txoj kev hlub rau peb,
peb yuav qw suab zoo siab tas peb sim neej.
thov HUAB TAIS lub siab hlub nqes los roos peb
kom cov hauj lwm peb txhais tes khwv vam meej. Teb.
Zaj Nyeem Ob
Fis Les Moos 1:9-10,12-17
Cov lus nyob hauv Fis Les Moos Tsab Ntawv
Kuv xav hu txog txoj kev nyiam los thov ib yam ntawm koj. Tus yuav hais lus rau koj no, yog Paj Lug, tus laus neeg Paj Lug, uas nyem no nws yog YES XUS PLEEV tus neeg nyob txim. Kuv thov koj rau kuv tus me nyuam Os Nes Xis Mos, uas kuv yug nws nyob hauv cov saw hlau. Kuv xa nws rov qab los rau koj. Nws yog kuv nplooj siab. Kuv twb xav cia nws nyob ze kuv, kom nws sawv koj chaw pab kuv nyob hauv cov saw hlau uas lub Moo Zoo pub rau kuv. Tab sis, kuv tsis xav ua ib yam uas kuv tsis tau xub nug koj lus pom zoo tso. Yam zoo uas koj yuav ua, mas kuv tsis yuam koj, koj yuav tsum zoo siab ua koj xwb. Os Nes Xis Mos tau ncaim ntawm koj ib ntus, ntshai yog vim Ntuj xav xa nws rov qab los ua koj tug mus li. Ntuj tsis xa nws rov los ua koj ib tug qhev. Nws zoo tshaj tus qhev. Nws rov los ua ib tug kwv tij uas koj hlub. Nws twb yog kuv ib tug kwv uas kuv nyiam kawg. Mas nws haj yam yuav ua ib tug kwv tij uas koj yuav nyiam tshaj nyob hauv tsoom sid, thiab nyob hauv HUAB TAIS. Yog koj saib tias wb yog ob tug sib raug zoo, mas koj yuav txais nws ib yam li txais kuv.
Yog TSWV NTUJ lo Lus
Nkauj Cav Txog Lub Moo Zoo
NPN 119:135
As les lus yas. As les lus yas. HUAB TAIS, thov koj ua lub ntsej muag ci ntsa iab tuaj rau koj tus tub txib thiab qhia koj txoj cai rau kuv. As les lus yas.
(Nqua Suab Cav Txog Tswv Ntuj, 235, nqe 6)
Ntawv Moo Zoo
Lus Kas 14:25-33
Nej mloog ib zag nyob hauv Lus Kas Ntawv Moo Zoo
Tej pab neeg coob nrog YES XUS taug kev. YES XUS tig los hais rau lawv tias :
"Leej twg los raws kuv, yog nws tsis nyiam kuv dua nws niam nws txiv, nws poj niam me nyuam, nws cov kwv tij thiab cov muam, thiab yog nws nyiam nws txoj sia dua kuv, mas tus ntawd ua tsis tau kuv thwj tim. Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv thwj tim."
"Yog nej leej twg xav txhim ib tug pej thuam, nws yuav tsis xub zaum xam saib yuav siv nyiaj npaum li cas, thiab ntsuas saib nws puas muaj nyiaj txaus ua kom tiav lod ? Tsam nws pib txhim cov taw ntsa tas, ho ua tsis tau kom tiav. Ces tas cov neeg pom yuav thuam nws hais tias : Saib ! Tus neeg no pib txhim, ho ua tsis tau kom tiav ! Los ib tug vaj, yuav sawv kev mus ua rog ntaus lwm tus vaj, nws yuav tsis xub zaum xam saib nws muaj kaum txhiab leej tub rog, nws puas yuav tiv tau tus vaj uas coj nees nkaum txhiab leej tuaj ? Yog nws paub tias yuav tiv tsis tau, mas thaum lwm tus vaj tseem tuaj txog deb, nws yuav xa ib pab tiam lis mus thov kom cia lub teb chaws nyob thaj yeeb. Nej kuj zoo ib yam li ntawd : nej leej twg tsis tso nws lub cuab tam tseg, nws ua tsis tau kuv thwj tim.
Yog Huab Tais Yes Xus Lub Moo Zoo
