Zaj Nyeem Ib
Kev Tsiv 32:7-11,13-14
Cov lus nyob hauv Ntawv Kev Tsiv
Ces HUAB TAIS hais rau Mais Xes tias : "Koj kav tsij nqes mus sai, vim koj haiv neeg uas koj tau coj tawm ntawm Hais Nkws Tos teb los, twb ua phem lawm. Lawv tos tsis taus, lawv twb maj ncaim ntawm txoj kev uas kuv nyuam qhuav qhia kom lawv taug. Lawv twb nchuav tau ib tug mlom nyuj rau lawv teev, lawv pe, thiab lawv tua tsiaj txi tus mlom. Lawv hais tias : Cov His Xas Lais, nej ntsia, tus no yog nej tus TSWV NTUJ uas tau coj nej tawm ntawm Hais Nkws Tos teb los." HUAB TAIS hais ntxiv rau Mais Xes tias : "Kuv pom tias haiv neeg ntawd yog ib haiv neeg xwb qwb txhav dhau. Zaum no, koj cia kuv npau taws rau lawv, kuv yuav muab lawv rhuav pov tseg kom tas, kuv mam li muab koj mus tsim dua ib haiv neeg loj."
Mais Xes ua tib zoo thov nws tus HUAB TAIS TSWV NTUJ kom HUAB TAIS zoo siab, nws hais tias : "HUAB TAIS, vim li cas koj thiaj li npau taws rau haiv neeg uas koj lub zog loj thiab koj txhais tes muaj hwj huam tau coj tawm ntawm Hais Nkws Tos teb los ? Thov koj nco ntsoov txog koj cov tub txib Has Nplas Has, His Xas Has thiab His Xas Lais, uas koj tau cog lus ruaj rau lawv tias : ‘Kuv yuav ua kom nej cov xeeb ntxwv huam vam coob npaum li cov hnub qub, thiab kuv yuav muab lub teb chaws uas kuv tau hais rau nej, pub rau nej cov xeeb ntxwv, ua lawv tug mus ib txhis.’" Ces HUAB TAIS thim xav, nws tsis ua phem rau nws haiv neeg raws li nws tau hais.
Yog TSWV NTUJ lo Lus
Nkauj Paj Nruag Txais Ntuj Lus
NPN 51:3-4,12-13,17,19(Lus Kas 15:18)
Txais: Kuv yuav sawv tsees mus cuag kuv Txiv.
(Nqua Suab Cav Txog Tswv Ntuj, 193)
1. TSWV NTUJ, koj lub siab zoo, thov koj khuv leej kuv.
Koj lub siab dav hlub neeg, thov koj so kuv cov txhaum.
Thov koj ntxuav kuv qhov phem pov tseg,
yaug kuv cov txhaum kom kuv ntshiab tuaj. Teb.
2. TSWV NTUJ, thov koj tsim ib lub siab huv rau kuv.
Koj tso dua ib lub tswv yim khov rau hauv kuv.
Koj tsis txhob ntiab kuv mus deb ntawm koj lub ntsej muag,
txhob thau koj lub tswv yim ntshiab ntawm kuv. Teb.
3. HUAB TAIS, thov koj qhib kuv di ncauj,
kuv lub ncauj yuav cav lus zoo txoj koj.
TSWV NTUJ, cov txim uas kuv yuav cev rau koj yog lub tswv yim ntuag.
TSWV NTUJ, koj tsis thuam lub siab ntuag siab lwj. Teb.
Zaj Nyeem Ob
1 Tis Mos Tes 1:12-17
Cov lus nyob hauv Tis Mos Tes Tsab Ntawv Ib
Kuv ua tsaug rau tus tau pub zog rau kuv : nws yog peb tus HUAB TAIS YES XUS PLEEV. Nws saib kuv yog ib tug neeg ncaj tsis fav xeeb, ces nws hu kuv los tsob hwb nws. Thaud, kuv yog ib tug neeg thuam TSWV NTUJ lub npe, ib tug hiam luag, thiab tsawm luag. Kuv tau ua li ntawd vim kuv tsis paub, thiab kuv nyob deb txoj kev ntseeg. TSWV NTUJ tau zam rau kuv. Nyem no, peb tus HUAB TAIS lub txiaj ntsim tuaj ntau ntau rau hauv kuv. Lub txiaj ntsim ntawd, ib txhij tuaj nrog kev ntseeg thiab kev nyiam nyob hauv YES XUS PLEEV. Lo Lus kuv yuav hais nyem no, yog ib lo lus tseem ceeb uas tsim nyog peb yuav ntseeg : YES XUS PLEEV tuaj nyob ntiaj teb no, nws tuaj cawm cov neeg txhaum : kuv yog thawj tug hauv cov neeg txhaum ntawd. YES XUS PLEEV tau zam rau kuv ua ntej, yog vim nws xav muab nws lub siab ntev rau sawv daws pom : nws muab kuv ua ib tug piv txwv rau cov neeg yuav ntseeg txog nws, kom lawv tau txoj sia nyob mus li. Tus Vaj kav ib txhiab ib txhis, tus TSWV NTUJ tsis txawj tuag, thiab neeg pom tsis tau, nws tib leeg yog TSWV NTUJ, nws muaj koob meej nto moo, thiab muaj hwj chim txheej dhau txheej tis dhau tis. A men.
Yog TSWV NTUJ lo Lus
Nkauj Cav Txog Lub Moo Zoo
2 Kos Lis Nthos 5:19
As les lus yas. As les lus yas. TSWV NTUJ yog tus ua kom ntiaj teb neeg rov sib nyiam thiab rov sib haum xeeb nyob hauv Leej Pleev. Nws pub kom peb txawj hais cov lus pab luag lwm tus. As les lus yas.
(Nqua Suab Cav Txog Tswv Ntuj, 238, nqe 3)
Ntawv Moo Zoo
Lus Kas 15:1-10
Nej mloog ib zag nyob hauv Lus Kas Ntawv Moo Zoo
Tas cov neeg sau se thiab cov neeg txhaum txav los ze YES XUS, lawv xav mloog YES XUS hais. Ces cov Fas Lis Xais thiab cov Kws Ntawv Ntshiab nroo zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" YES XUS thiaj hais zaj paj lug no rau lawv :
"Yog nej leej twg muaj ib puas tus yaj, tab sis ib tug ploj lawm, mas nws yeej yuav tso cuaj caum cuaj tus yaj tseg rau tom hav quav poj, nws mus nrhiav kom tau tus uas poob zoo lawm. Thaum nws nrhiav tau tus yaj poob zoo lawd, nws muab kwv saum xwb pwg, nws zoo siab tas nrho. Nws rov los tsev, ces nws nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' Kuv hais rau nej tias, thaum ib tug neeg txhaum hloov siab los ntxub kev txhaum, mas muaj kev zoo siab loj nyob saum ntuj. Kev zoo siab ntawd loj dua kev zoo siab rau cuaj caum cuaj leeg siab ncaj uas tsis tas yuav hloov siab los ntxub kev txhaum.”
“Hos tus poj niam uas nws muaj kaum lub txiaj nyiag, yog ib lub poob lawm, mas nws yuav taws teeb cheb tsev, ua tib zoo nrhiav kom tau nws lub txiaj nyiag. Thaum nws nrhiav tau lawm, nws nqua hu nws cov phooj ywg thiab cov nyob ze nws tuaj, nws hais tias : ‘Nej nrog kuv zoo siab mas ! Vim kuv nrhiav tau lub txiaj uas poob lawm ! Kuv hais rau nej tias, thaum ib tug neeg txhaum hloov siab, mas muaj kev zoo siab loj nyob hauv TSWV NTUJ tsoom Tshiab ib yam li ntawd thiab.”
Yog Huab Tais Yes Xus Lub Moo Zoo
