Zaj Nyeem Ib
As Mos 6:1a,4-7
Cov lus nyob hauv Ntawv As Mos
Cov tau zoo saum Xis Yoos thiab nyob qhuas ntxhias saum Xas Mas Lias lub roob cov thawj ntawm cov teb chaws His Xas Lais cuab yig mus thawj yuav ntsaj laws;
Cov nquag das saum tej txaj kaus ntxhw thiab pw ntog ntawm tej rooj tog noj thav yaj ntawm npoj thiab sib txeeb tej xyuas nyuj hauv nkuaj.
Rua ncauj lo xev suab thaj cheej seev rau lawv puav tam li Das Vis.
Cov haus tsheej ntim cawv thiab siv cov thawj roj thiab tsis paub txhawj Yos Xes tej xwv txheej hlo.
Vim li ntawd, ziag no, lawv yog pab ua thawj raug ntiab ntawm cov ntiab khiav ua tu noob nrho.
Yog TSWV NTUJ lo Lus
Nkauj Paj Nruag Txais Ntuj Lus
NPN 146:6-7,8-9a,9b-10(1b)
Txais: Kuv tus plig, koj cav lus zoo txog HUAB TAIS.
(Nqua Suab Cav Txog Tswv Ntuj, 195)
1. HUAB TAIS cov tub txib, nej cav lus zoo txog nws mas !
Nej cav txog nws kom nws lub npe nto moo lug,
txij no mus txog txhiab niag tim puas xyoo. Teb.
2. HUAB TAIS qhib cov neeg dig muag kom rov pom kev, nws tsa cov neeg qaug zog.
HUAB TAIS nyiam cov neeg ua ncaj,
nws pov hwm cov pej kum neeg. Teb.
3. Nws txhawb cov poj ntsuam thiab cov ntsuag nos.
Nws mooj cov siab phem kom lawv yuam kev.
HUAB TAIS yog tus vaj nyob mus li.
Xis Yoos, nws yog koj tus TSWV NTUJ mus tiam dhau tiam. Teb.
Zaj Nyeem Ob
1 Tis Mos Tes 6:11-16
Cov lus nyob hauv Tis Mos Tes Tsab Ntawv Ib
Ntawm koj, mas koj yog TSWV NTUJ tus neeg, koj txav mus deb ntawm tej ntawd tib si. Koj xyaum mus taug txoj kev ncaj, kev hwm Ntuj, kev ntseeg, kev nyiam, kev tij lim, kev hlub luag mos nyoos. Koj ntaus ntsug rog zoo los pab kev ntseeg. Koj yuav txeeb tau txoj sia nyob mus li : Ntuj hu koj los txais txoj sia ntawd. Thiab yog vim koj xav tau txoj sia nyob mus li, ces koj thiaj ua zaj zeem kev ntseeg zoo nkauj rau cov tim khawv pom. Kuv tuav txog TSWV NTUJ lub npe, uas nws pub txoj sia rau txhua tsav txhua yam thiab tuav txog YES XUS PLEEV lub npe, uas nws tau hais lo lus zeem tseeb zoo nkauj, nyob ntawm Poos Xyus Pis Las Tos xub ntiag. Koj coj lo lus qhia zoo, txhob ua ib yam tsis huv, txhob muaj chaw xyeej. Koj ua li ntawd mus txog hnub peb tus HUAB TAIS YES XUS PLEEV yuav tawm los rau pom xyeem. Thaum txog lub caij teem, tus yuav ua kom YES XUS tawm los, yog tus HUAB TAIS nto koob meej,
tus Vaj kav tas tsoom vaj,
tus HUAB TAIS kav tas tsoom huab tais,
yog tus muaj txoj sia tsis txawj tuag ua nws tug,
yog tus nyob txawm saum qhov pom kev, uas neeg mus tsis tau,
yog tus uas leej tib neeg tsis tau pom dua, thiab pom tsis tau.
Kev nto koob meej
thiab kev muaj hwj huam yog nws tug mus ib txhiab ib txhis ! Ua li !
Yog TSWV NTUJ lo Lus
Nkauj Cav Txog Lub Moo Zoo
2 Kos Lis Nthos 8:9
As les lus yas. As les lus yas. HUAB TAIS YES XUS PLEEV yog tus nplua nuj, tsis kav nws tuaj yeem ua ib tug neeg pluag. Nws txoj kev pluag yuav ua kom nej sawv daws nplua nuj tuaj. As les lus yas.
(Nqua Suab Cav Txog Tswv Ntuj, 221, nqe 3)
Ntawv Moo Zoo
Lus Kas 16:19-31
Nej mloog ib zag nyob hauv Lus Kas Ntawv Moo Zoo
"Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj tej rooj qav zoo kawg. Muaj ib tug pluag hu ua Las Ntxas Los, nws ib ce mob kiav txhab tas, nws pw ze ntawm tus nplua nuj lub rooj loog. Las Ntxas Los ntshaw noj tej yam poob ntawm tus nplua nuj lub rooj mov kom tsau nws plab... Dev tseem tuaj yaim nws tej qhov txhab thiab. Muaj ib hnub, tus pluag tuag, cov Tub Xo tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus.
Tus nplua nuj nyob hauv ntuj txias teb tsaus, nws txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv nws xub ntiag. Nws hu nrov tias : Txiv Has Nplas Has, thov koj khuv leej kuv, thov koj xa Las Ntxas Los tuaj muab nws ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no. Tab sis Has Nplas Has hais tias : Kuv tub, koj nco ntsoov tias thaum ua neej nyob koj tau txais koj cov nyiaj txiag, hos Las Ntxas Los tau txais kev mob. Zaum no Las Ntxas Los txais kev nplij nyob ntawm no, hos koj raug tsim txom. Thiab tsis tag li ntawd : muaj ib lub qhov ntuj tob kawg kem peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.
Ces tus nplua nuj hais tias : "Txiv, kuv thov koj xa Las Ntxas Los mus hauv kuv txiv tsev, vim kuv muaj tsib tug kwv tij, kom Las Ntxas Los mus ua pov thawj qhia lawv, kom lawv tsis txhob tuaj nyob hauv qhov chaw raug tsim txom no.” Ces Has Nplas Has hais tias : “Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia. Tab sis tus nplua nuj hais tias : “Txiv Has Nplas Has, yog tias ib tug hauv cov tuag mus cuag lawv, mas lawv yuav hloov siab. Tab sis Has Nplas Has hais rau nws tias : “Yog lawv tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv, lawv kuj yuav tsis ntseeg nws.”
Yog Huab Tais Yes Xus Lub Moo Zoo
