Zaj Nyeem Ib
Hauj Lwm 1:12-14
Cov lus nyob hauv Ntawv Hauj Lwm
Cov thwj tim nqes pem lub roob uas hu ua "Txiv Ntoo Roj" rov mus rau Yes Lus Xas Les. Lub roob ntawd nyob ze ntawm Yes Lus Xas Les li ntu kev uas hnub Xas Npas Tos kheev mus. Thaum lawv rov los txog, lawv nce mus saum chav tsev siab uas yog lawv qhov chaw nyob : muaj Pob Zeb thiab Zam, Yas Kos thiab As Nres, Fis Lis Pos thiab Tos Mas, Npas Tos Los Mas Yos thiab Mas Tais, Yas Kos uas yog As Fas Yos tus tub, thiab Xis Moos Siab Kub, Yus Das uas yog Yas Kos tus tub. Tas lawv cov no sawv daws koom ib lub siab, lawv kub siab teev ntuj. Muaj ob peb tug poj niam nrog lawv thiab. Nyob hauv cov poj niam ntawd, muaj Mab Liab uas yog YES XUS niam, thiab muaj YES XUS cov kwv tij.
Yog TSWV NTUJ lo Lus
Nkauj Paj Nruag Txais Ntuj Lus
Lus Kas 1:46-47,48-49,50-51,52-53,54-55(49b)
Txais: Vim tus Muaj Hwj Huam ua tej yam loj rau kuv, nws lub npe Ntshiab.
1. "Kuv tus plig cav txog HUAB TAIS lub hwj chim,
kuv lub tswv yim hom khaj nyob hauv TSWV NTUJ, tus Cawm kuv. Teb.
2. Vim nws dauv muag ntsia nws tus ntxhais txib hauv txheej qis.
Vim li ntawd, txij no mus,
txhua tiam neeg yuav hais tias kuv txoj hmoov zoo,
vim tus Muaj Hwj Huam ua tej yam loj rau kuv,
nws lub npe Ntshiab. Teb.
3. Nws lub siab hlub roos cov neeg hwm nws tiam dhau tiam.
Nws sab npab nthuav nws lub zog rau sawv daws pom.
Cov neeg uas lub siab muab hlob,
HUAB TAIS ua kom lawv tawg. Teb.
4. HUAB TAIS nchuav cov muaj hwj huam poob ntawm lawv lub theej kiab.
Nws tsa cov neeg hauv txheej qis kom siab.
Nws pub tej yam zoo rau cov neeg tshaib noj seem noj so,
hos nws ntiab cov neeg muaj rov qab mus tes qhuav. Teb.
5. HUAB TAIS pab nws tus tub txib His Xas Lais,
vim nws nco ntsoov tias nws lub siab hlub neeg,
nws ua raws li nws tau tshaj rau peb cov yawg koob,
nws ua zoo tas nrho rau Has Nplas Has
thiab Has Nplas Has cov xeeb ntxwv mus ib txhiab ib txhis." Teb.
Zaj Nyeem Ob
Nkas Las Tias 4:4-7
Cov lus Paj Lug sau tuaj rau Cov Ntseeg nyob Nkas Las Tias
Kwv tij sawv daws, tiam sis nyem no, txog lub caij Ntuj teem, TSWV NTUJ tso nws Leej Tub tuaj yug ntawm ib tug poj niam los. Nws zwm rau Mais Xes Txoj Cai. Nws tuaj txhiv cov uas zwm rau Mais Xes Txoj Cai, kom nws rub tau peb los ua Ntuj cov Tub. Vim nej yog Ntuj cov tub, mas TSWV NTUJ thiaj xa nws Leej Tub lub tswv yim tuaj nyob hauv peb lub siab, nws qw hauv peb nruab siab tias : ‘As Npas, Txiv !’ Ua li mas koj tsis yog ib tug tub qhev lawm. Koj yog ib leeg tub cag, mas koj kuj yog tus yuav txais TSWV NTUJ lub cuab tam, vim TSWV NTUJ pub li ntawd.
Yog TSWV NTUJ lo Lus
Nkauj Cav Txog Lub Moo Zoo
Lus Kas 1:28
As les lus yas. As les lus yas. Tus Tub Xo chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! HUAB TAIS nrog koj nyob." As les lus yas.
Ntawv Moo Zoo
Lus Kas 1:26-38
Nej mloog ib zag nyob hauv Lus Kas Ntawv Moo Zoo
Lub rau hli, TSWV NTUJ xa tus Tub Xo Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab.
Tus Tub Xo chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! HUAB TAIS nrog koj nyob." Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi.
Tus Tub Xo hais rau Mab Liab tias : "Mab Liab, koj tsis txhob ntshai. TSWV NTUJ saib koj ntxim TSWV NTUJ siab. Zaum no, koj yuav xeeb tub, koj yuav yug ib tug tub, koj yuav tis nws npe hu ua YES XUS. Nws yuav yog ib tug loj, luag yuav hu nws ua tus Nyob Siab leej Tub. HUAB TAIS TSWV NTUJ yuav muab nws txiv Das Vis lub theej kiab rau nws. Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg."
Mab Liab hais rau tus Tub Xo tias : "Qhov ntawd yuav muaj tuaj zoo li cas, vim kuv tsis paub ib tug txiv neej."
Tus Tub Xo teb rau Mab Liab tias : "LEEJ NTUJ PLIG NTSHIAB yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua TSWV NTUJ Leej Tub. Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas TSWV NTUJ ua tsis tau."
Ces Mab Liab hais tias : "Kuv yog HUAB TAIS tus ntxhais txib. Kuv xav kom muaj raws li koj hais." Tus Tub Xo thiaj tso Mab Liab tseg.
Yog Huab Tais Yes Xus Lub Moo Zoo
