Zaj Nyeem Ib
Qhib Yav Tom Ntej 7: 2-4.9-14
Kuv pom ib pab neeg coob coob suav tsis txheeb ; muaj tas txhua teb chaws, txhua haiv neeg, txhua xeem lus.
Cov Lus nyob hauv ntawv Qhib Yav Tom Ntej
2 Kuv yog Zam, kuv pom dua ib tug Tshiab tawm sab Toob Fab tuaj ; nws nqa tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias :
3 “Nej txhob rawm tso xwv txheej mus rau lub ntiaj teb, lub hiav txwv, thiab tej me ntoo. Tos peb ntaus cim rau saum Tswv Ntuj cov tub txib hauv pliaj tso.”
4 Ces kuv hnov lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeem His Xas Lais.
9 Dhau tej ntawd tas lawm, ces kuv pom ib pab neeg coob coob suav tsis txheeb ; muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes.
10 Lawv qw nrov muaj ceem tias : “Kev yeej yog peb tus Tswv Ntuj uas nws zaum saum lub theej kiab tug, thiab yog Leej Yaj tug !”
11 Ces tas tsoom Tshiab uas sawv ncig lub theej kiab, ncig cov Laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj.
12 Lawv hais tias : “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj tug, mus tas ib txhiab ib txhis ! Ua li.”
13 Ib tug Laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov twg tuaj ?”
14 Kuv teb tias : “Huab Tais, yog koj thiaj paub.” Nws rov hais tias : “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb.”
Yog Tswv Ntuj lo Lus
Nkauj Paj Nruag Txais Ntuj Lus
NPN 24:1-2,3-4,5-6(6)
(Nqua Suab Cav Txog Tswv Ntuj, 213)
Txais: Huab Tais, tsoom neeg no tos ntshis xav pom koj lub ntsej muag.
1. Lub ntiaj teb thiab txhua yam uas nyob hauv lub sim ceeb yog Huab Tais li.
Lub qab ntuj khwb thiab tas tsoom neeg nyob hauv yog Huab Tais tug.
Huab Tais yog tus txawb lub ntiaj teb rau saum dej hiav txwv,
nws tsa lub ntiaj teb ruaj rau saum npoo dej. Teb.
2. Leej twg thiaj yuav tau nce mus saum Huab Tais lub roob ?
Leej twg thiaj yuav sawv taus nyob hauv nws lub chaw ntshiab ?
Yog tus neeg siab huv tes tsis lo txhaum,
tus siab tsis xib rau qhov phem,
tus tsis twv ntuj twv teb cog lus cuav. Teb.
3. Nws yuav tau txais Huab Tais lo lus foom hmoov zoo uas yog txiaj ntsim paj tshab tuaj ntawm nws tus Huab Tais Cawm Seej tuaj.
Haiv neeg nrhiav Tswv Ntuj yuav tau txais nws tej paj tshab
vim lawv nrhiav Yas Kos tus Tswv Ntuj lub ntsej muag. Teb.
Zaj Nyeem Ob
1 Zam 3:1-3
Tswv Ntuj zoo li cas, mas peb yuav pom Nws zoo li ntawd.
Cov lus nyob hauv Zam Tsab Ntawv Ib
1 Kwv tij sawv daws, nej ntsia saib, Leej Txiv txoj kev nyiam peb loj tas npaum no : yam li peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv.
2 Cov zoo nyiam, nyem no, peb yog Tswv Ntuj cov me nyuam. Qhov uas yav tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd.
3 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.
Yog Tswv Ntuj lo Lus
Nkauj Cav Txog Lub Moo Zoo
Mas Tais 11:28
(Nqua Suab Cav Txog Tswv Ntuj, 240, nqe 1)
As les lus yas. As les lus yas.
Yes Xus hais tias, “Nej sawv daws uas raug txoj kev iab thaib kev khwv, nej tuaj cuag kuv mas, nej yuav tau so los siav. As les lus yas.
Ntawv Moo Zoo
Mas Tais 5:1-12a
Nej zoo siab thiab nej hom khaj mog, vim nej yuav tau txais koob haum loj nyob saum ntuj.
Nej mloog ib zag nyob hauv Mas Tais Ntawv Moo Zoo
1 Tseem muaj ib hnub, Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus.
2 Ces Yes Xus tsa ncauj qhia lawv hais tias :
3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug.
5 Cov tau txoj hmoov zoo, yog cov quaj ntsuag, vim Ntuj yuav nplij lawv.
6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis.
7 Cov tau txoj hmoov zoo, yog cov hlub luag tej, vim Ntuj yuav hlub lawv.
8 Cov tau txoj hmoov zoo, yog cov siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.
10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.
11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.
12a Nej zoo siab thiab nej hom khaj mog, vim nej yuav tau txais koob haum loj nyob saum ntuj.
Yog Huab Tais Yes Xus Lub Moo Zoo
