Zaj Nyeem Ib
2 Mas Kas Npes 7:1.20-23.27b-29
Lawv niam kuj ua tej yam txaus qhuas kawg vim nws ua ntsej muag luag ntxhi ris qhov ntawd vim nws tso siab rau Tswv Ntuj.
Cov lus nyob hauv Ntawv Mas Kas Npes Phau Ob
1 Lub caij ntawd, tus Vaj As Nthias Kus ntes tau xya leej kwv tij nrog lawv niam. Tus vaj yuam lawv kom lawv noj nqaij npuas uas lawv Txoj Cai txwv tsis pub noj. Nws kom xuas pas thiab xuas leeg nyuj plawm lawv.
20 Lawv niam kuj ua tej yam txaus qhuas kawg thiab tsim nyog yuav piav txog. Nws ntsia nws xya leej tub ib tug tuag zuj zus nyob hauv tib hnub nkaus. Tsis kav nws ua ntsej muag luag ntxhi ris qhov ntawd vim nws tso siab rau Tswv Ntuj.
21 Leej niam hais nws niam nws txiv xeem lus ntuas nws cov tub ib leeg dhau ib leeg.
Nws txawj xav zoo thiab txawj ntuas tej lo lus zoo kom nws cov tub muaj zog tuaj.
22 Leej niam hais rau lawv tias : "Kuv tsis paub nej xeeb zoo li cas los nyob hauv kuv lub cev. Tsis yog kuv muab txoj sia thiab lub tswv yim rau nej ! Tsis yog kuv tau tsim nej los zoo li nej nyem no.
23 Tus Tswv tsim lub ntiaj teb nws tsim kom neeg txawj yug los. Nws ua kom tas puas tsav yam muaj ib lub hauv paus chiv. Tswv Ntuj siab zoo, nws yuav rov muab txoj sia thiab lub tswv yim rau nej, vim nej tsis hlub nej lub cev nyem no, nej tsuas nyiam Tswv Ntuj Txoj Cai tshaj tas puas tsav yam."
27b Nws khoov mus siv nws xeem lus hais lus rau nws tus tub tias : "Me tub, koj hlub koj niam mog ! Koj niam tau nqa koj cuaj hlis nyob hauv nws xub ntiag, tau pub mis rau koj noj peb xyoos, tau tu koj qhia koj los txog nyem no.
28 Me tub, koj ntsia lub ntuj thiab lub ntiaj teb, tas puas tsav yam nyob hauv. Koj yuav paub tias Tswv Ntuj muab tej yam me me los tsim xwb. Nws tsim neeg ib yam li ntawd.
29 Koj tsis txhob ntshai tus xav tua neeg ntawd, koj yuav ua raws li koj cov tij laug kom tsim nyog ua lawv tus kwv, koj ua siab tuag mog ! Thaum txog lub caij Ntuj zam kuv thiaj tau pom koj nrog lawv ua ke."
Yog Tswv Ntuj lo Lus
Hoặc :
Zaj Nyeem Ib
Thoob Tsib 3:1-9
Tswv Ntuj txais lawv zoo li thaj txi Ntuj zoo txhij zoo txhua.
Cov lus nyob hauv Ntawv Thoob Tsib
1 Cov neeg ncaj tus plig nyob hauv Tswv Ntuj txhais tes. Tsis muaj ib yam xwv txheej dab tsi yuav raug tau lawv.
2 Cov neeg tsis muaj tswv yim xav tias cov neeg ncaj tuag lawm, hos lawv txoj kev ncaim mus yog ib yam xwv txheej loj,
3 thiab lawv txoj kev tawm rooj mus deb ntawm peb, yog ib txog kev puas tsuaj loj. Tab sis cov neeg ncaj ntawd nyob hauv kev thaj yeeb lawm.
4 Tib neeg xav tias cov siab ncaj tuag, mas yog lawv raug txim, tab sis lawv tso siab lug tias lawv muaj txoj sia nyob mus li.
5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Tswv Ntuj sim lawv, nws pom tias lawv tsim nyog ua nws tug.
6 Tswv Ntuj sim lawv, zoo li sim kub nyob hauv lub yeej vub. Tswv Ntuj txais lawv zoo li thaj txi Ntuj zoo txhij zoo txhua.
7 Thaum Tswv Ntuj tuaj xyuas lawv, mas lawv ci ntsa iab. Lawv yuav khiav nrawm cuag li hluav taws ri mus kis tej roob nqeeb qhuav.
8 Lawv yuav txiav txim rau cov kuj cuab, lawv yuav tswj cov haiv neeg. Huab Tais yuav ua vaj kav cov siab ncaj mus ib txhis.
9 Cov neeg tso siab rau Huab Tais yuav paub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nws tuaj xyuas cov nws xaiv.
Yog Tswv Ntuj lo Lus
Nkauj Paj Nruag Txais Ntuj Lus
NPN 126:1-2ab.2cd-3.4-5.6 (5)
Txais: Cov neeg tseb nplej,
tseb ntxuag kua muag,
lawv sau nplej ntxuag suab nkauj.
1. Thaum Huab Tais coj Xis Yoos cov neeg nyob txim rov los,
peb xav tias yog npau suav.
Peb lub ncauj muaj suab luag nqhua,
peb tus nplaig qw kev zoo siab. Teb.
2. Hos luag pej kum cuab hais zom zaws tias :
"Huab Tais ua yam loj tas nrho rau lawv !"
Huab Tais ua tej yam loj rau peb tiag,
peb zoo siab tas nrho. Teb.
3. Huab Tais,
koj coj peb cov neeg nyob txim rov qab los
xws li dej sab siv huam nyob teb chaws suab puam Nes Nkes.
Cov neeg tseb nplej, tseb ntxuag kua muag,
lawv sau nplej ntxuag suab nkauj. Teb.
4. Thaum mus, lawv quaj,
vim lawv ris seev noob,
thaum lawv rov los, lawv hu nkauj,
vim lawv ris cov rev nplej tshiab los. Teb.
Zaj Nyeem Ob
Los Mas 8:31b-39
Tsis muaj dab tsi yuav cais tau peb ntawm Tswv Ntuj txoj kev nyiam. Txawm yog txoj kev tuag los txoj sia.
Cov lus Paj Lug sau tuaj rau cov ntseeg nyob Los Mas
31b Kwv tij sawv daws, yog Tswv Ntuj tuaj peb tog, mas leej twg yuav tiv peb ?
32 Tswv Ntuj twb tsis txuag nws Leej Tub ; nws cia nws Leej Tub raug kev ploj, kom nws pab tau peb txhua leej : yog tias peb nrog Leej Tub, ua cas Tswv Ntuj thiaj yuav tsis pub nws cov txiaj ntsim rau peb ?
33 Leej twg yuav muaj cuab kav muab txim rau cov neeg uas Tswv Ntuj xaiv ? Tswv Ntuj yog tus saib tias lawv ncaj tuaj.
34 Leej twg yuav muab txim ? Puas yog Yes Xus Pleev uas nws tuag, nws sawv rov los, nws nyob ntawm Tswv Ntuj sab xis thov Tswv Ntuj rau peb tsis tseg ?
35 Leej twg yuav cais tau kom peb ncaim ntawm Leej Pleev uas nyiam peb ? Puas yog kev raug xwv txheej ? Puas yog kev txhawj xeeb ? Puas yog kev tshaib kev nqhis ? Puas yog kev pluag ? Puas yog kev poob tsag ? Puas yog kev raug luag hiam ? Puas yog txoj kev tuag ?
36 Tsis muaj dab tsi yuav ua tau kom peb ncaim ntawm Yes Xus, vim niaj hnub peb nco ntsoov txog lo lus nyob hauv Ntawv tias : ‘Huab Tais, vim peb nyiam koj, mas niaj hnub lawv thiaj muab peb tua. Sawv daws saib peb yog ib co yaj uas lawv yuav muab tua.’
37 Tab yog peb raug tej yam li ntawd, mas peb kuj yeej sawv daws, vim Yes Xus nyiam peb.
38 Kuv paub tseeb tias tsis muaj dab tsi yuav cais tau peb ntawm Tswv Ntuj txoj kev nyiam. Txawm yog txoj kev tuag los txoj sia, yim phiaj cuaj phiaj Tshiab, txhua yam uas nyem no ua neej nyob thiab txhua yam uas tseem yuav xeeb los nyob rau yav tom ntej,
39 tas txhua yam nyob saum ntuj thiab nyob nruab yeeb, txhua yam uas Ntuj tsim los : yeej tsis muaj ib yam yuav cais tau peb ntawm tus Tswv Ntuj uas nyiam peb nyob hauv peb tus Huab Tais Yes Xus Pleev.
Yog Tswv Ntuj lo Lus
Hoặc :
Zaj Nyeem Ob
Qhib Yav Tom Ntej 7:9-17
Lawv yog cov uas hla dhau txoj kev raug luag hiam hnyav los.
Cov lus nyob hauv Ntawv Qhib Yav Tom Ntej
9 Kuv yog Zam, dhau tej ntawd tas lawm, ces kuv pom ib pab neeg coob coob suav tsis txheeb ; muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes.
10 Lawv qw nrov muaj ceem tias : “Kev yeej yog peb tus Tswv Ntuj uas nws zaum saum lub theej kiab tug, thiab yog Leej Yaj tug !”
11 Ces tas tsoom Tshiab uas sawv ncig lub theej kiab, ncig cov Laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj.
12 Lawv hais tias : “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj tug, mus tas ib txhiab ib txhis ! A-men.”
13 Ib tug Laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov twg tuaj ?”
14 Kuv teb tias : “Huab Tais, yog koj thiaj paub.” Nws rov hais tias : “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb.
15 Vim li ntawd, lawv thiaj nyob ze Tswv Ntuj lub theej kiab, lawv hawm nws nruab hnub hmo ntuj, nyob hauv nws lub tuam tsev. Tus zaum saum lub theej kiab yuav nthuav nws lub tsev tsam phooj rau lawv.
16 Lawv yuav tsis tshaib tsis nqhis ib zaug ntxiv. Lub hnub yuav tsis ntaiv lawv. Pa sov yuav tsis kub lawv ntxiv.
17 Leej Yaj, uas nyob nruab nrab lub theej kiab, yuav ua Tswv zov lawv, nws yuav coj lawv mus txog cov qhov dej muaj txoj sia. Tswv Ntuj yuav so cov kua muag ntws ntawm lawv qhov muag.”
Yog Tswv Ntuj lo Lus
Nkauj Cav Txog Lub Moo Zoo
Mas Tais 5:10
As les lus yas. As les lus yas. Cov tau txoj hmoov zoo,
yog cov raug luag hiam vim txoj kev ncaj,
Ntuj lub Ceeb Tsheej yog lawv tug. As les lus yas.
Ntawv Moo Zoo
Lus Kas 9:23-26
Hos tus twg ua nws txoj sia ploj vim kuv, mas tus ntawd cawm nws txoj sia.
Nej mloog ib zag nyob hauv Lus Kas Ntawv Moo Zoo
23 Muaj ib zaug, Yes Xus hais rau sawv daws tias : "Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam, ces nws yuav lawv kuv qab.
24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd cawm nws txoj sia.
25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj, los ua nws tus kheej puas tsuaj, mas nws tau dab tsi zoo ?
26 Tus twg txaj muag lees kuv thiab kuv cov lus, mas thaum Neeg Leej Tub rov los muaj koob meej, muaj Leej Txiv lub koob meej thiab muaj cov Tub Xo ntshiab lub koob meej, nws kuj yuav txaj muag lees tus ntawd thiab.
Yog Huab Tais Yes Xus Lub Moo Zoo
Hoặc :
Ntawv Moo Zoo
Zam 17:11b-19
Lub qab ntuj neeg thiaj li ntxub lawv.
Nej mloog ib zag nyob hauv Zam Ntawv Moo Zoo
11b Muaj ib zaug, Yes Xus tsa muag ntsia saum ntuj, Nws hais tias : Leej Txiv Ntshiab, koj zov lawv nyob hauv koj lub Npe uas koj muab rau kuv, kom xwv lawv ua ib leeg xws li wb ua ib leeg.
12 Thaum kuv nrog lawv nyob, kuv zov lawv nyob hauv koj lub Npe uas koj muab rau kuv. Kuv txuag lawv, ces tsis muaj ib tug ploj li, tsuas muaj kev ploj tus tub, kom tshwm sim raws li Ntawv sau cia.
13 Zaum no kuv rov los cuag koj, kuv hais tej no rau hauv lub qab ntuj neeg, kom xwv lawv tau kuv txoj kev kaj siab phwj yaws los nyob hauv lawv.
14 Kuv muab koj lo lus pub rau lawv, lub qab ntuj neeg thiaj li ntxub lawv, vim lawv tsis yog qab ntuj neeg tug, ib yam li kuv tsis yog qab ntuj neeg tug.
15 Kuv tsis thov kom koj rho lawv hauv lub qab ntuj neeg mus, kuv thov kom koj txuag lawv ntawm tus Phem.
16 Lawv tsis yog lub qab ntuj neeg tug ib yam li kuv tsis yog lub qab ntuj neeg tug.
17 Thov koj qee lawv mus nyob hauv txoj kev tseeb : Koj lo lus yog qhov tseeb.
18 Kuv xa lawv mus nyob hauv lub qab ntuj neeg, ib yam li koj xa kuv los nyob hauv lub qab ntuj neeg.
19 Kuv rov qee kuv, kom lawv ntshiab tuaj nyob hauv qhov tseeb.
Yog Huab Tais Yes Xus Lub Moo Zoo
){kind=link}