Zaj Nyeem Ib
Thoob Tsib 11:22-12:2
Cov lus nyob hauv Ntawv Thoob Tsib
Koj khuv leej sawv daws, vim koj peev xwm ua tau puas tsav yam ; koj qi muag rau tib neeg cov txhaum kom lawv thim xav.
Koj nyiam tas puas tsav yam tshwm sim los, koj tsis qias ib yam dab tsi koj tau tsim los. Yog muaj yam dab tsi koj ntxub, koj yuav tsis ua kom muaj.
Puas yuav muaj taus tus tsav dab tsi, yog koj tsis pub muaj ? Yam twg koj tsis nqee nws puas yuav nyob taus ?
Xib Hwb phooj ywg ciaj sia, koj txuag zias tas txhua yam, vim txhua yam yog koj tug;
Vim koj ntsuj plig tsis txawj puas ntsoog nyob hauv txhua yam.
Koj, tus ua tau cov qaug ncee nquag zuj zus ; koj qhia lawv, ua kom lawv pom lawv cov txhaum, muab qhov phem nrauj thiab ntseeg koj, HUAB TAIS !
Yog TSWV NTUJ lo Lus
Nkauj Paj Nruag Txais Ntuj Lus
NPN 145:1-2,8-9,10-11,13b-14(1)
Txais: Kuv tus HUAB TAIS TSWV NTUJ, kuv yuav cav txog koj lub npe mus ib txhiab ib txhis !
(Nqua Suab Cav Txog Tswv Ntuj, 200)
1. Kuv tus TSWV NTUJ, kuv cav lus zoo txog koj.
Kuv yuav cav lus zoo txog koj lub npe mus ib txhiab ib txhis.
Kuv yuav niaj hnub cav txog koj lub koob meej.
Kuv yuav cav lus zoo txog koj lub npe mus ib txhiab ib txhis. Teb.
2. HUAB TAIS siab zoo, nws khuv leej neeg, nws tsis npau taws sai.
HUAB TAIS ua zoo rau txhua leej txhua tus.
Nws hlub thiab txuag nws tej dej num. Teb.
3. HUAB TAIS, koj cov hauj lwm yuav cav txog koj.
Cov ntseeg txog koj yuav cav lus zoo txog koj.
Lawv yuav cav txog koj lub Ceeb Tsheej nto koob meej.
Lawv yuav tshaj txog koj cov hauj lwm muaj hwj xyeej. Teb.
4. TSWV NTUJ cov lus muaj tseeb thiab nws cov hauj lwm ntshiab huv tas nrho.
HUAB TAIS tsa cov neeg poob tsag, nws tsa cov neeg raug luag hiam sawv. Teb.
Zaj Nyeem Ob
2 Tes Xas Los Nis 1:11-2:2
Cov lus nyob hauv Tes Xas Los Nis Tsab Ntawv Ob
Yog vim peb xav txog tej yam li ntawd, mas peb thiaj thov Ntuj rau nej tsis tseg ; TSWV NTUJ yuav ua kom nej tsim nyog TSWV NTUJ hu nej, nws lub hwj huam yuav pab nej ua qhov zoo, thiab pab nej ua cov hauj lwm tawm hauv kev ntseeg los. Li ntawd, peb tus HUAB TAIS YES XUS lub npe yuav muaj koob meej nyob hauv nej, thiab nej yuav muaj koob meej nyob hauv nws, raws li peb tus TSWV NTUJ thiab HUAB TAIS YES XUS PLEEV lub txiaj ntsim.
Kwv tij sawv daws, hais txog thaum peb tus HUAB TAIS YES XUS PLEEV yuav tawm los, thiab peb yuav sib sau nyob ze nws, mas kuv thov nej, kom nej txhob ntxhov siab sai. Luag lam ua Yaj Saub qhia ub qhia no, nej txhob txhawj. Luag khaws tej lo lus los tej tsab ntawv, uas luag dag tias yog kuv sau. Tej lo lus ntawd ua kom nej xav tias twb txog HUAB TAIS lub Hnub Nyoog lawm.
Yog TSWV NTUJ lo Lus
Nkauj Cav Txog Lub Moo Zoo
Zam 3:16
As les lus yas. As les lus yas. TSWV NTUJ nyiam lub sim ceeb tas nrho, nws muab nws Leej Tub twm zeej rau kom xwv cov uas ntseeg txog nws muaj txoj sia nyob mus li. As les lus yas.
(Nqua Suab Cav Txog Tswv Ntuj, 226, nqe 2)
Ntawv Moo Zoo
Lus Kas 19:1-10
Nej mloog ib zag nyob hauv Lus Kas Ntawv Moo Zoo
YES XUS mus hauv Yes Lis Kos, nws hla lub tsheej. Muaj ib tug neeg lub npe hu ua Ntxas Kais, nws yog ib tug nom hauv cov sau se, nws nplua nuj. Nws nrhiav kom tau kev pom saib YES XUS yog leej twg, tab sis nws tsis tau kev, vim neeg coob dhau, thiab nws yog neeg qig taub. Ces nws khiav mus ua ntej, nws nce saum tsob txiv cev kom tau pom YES XUS, vim YES XUS yuav hla ntawd mus. Thaum YES XUS los txog ntawm qhov chaw ntawd, nws tsa muag ntsia, nws hais tias : "Ntxas Kais, koj nqes los sai, vim hnub no kuv yuav tsum mus hauv koj tsev." Ntxas Kais nqes nrawm nroos los, nws zoo siab txais YES XUS. Sawv daws pom li ntawd, lawv yws yws hais tias : "Nws mus so hauv ib tug neeg txhaum lub tsev !" Hos Ntxas Kais sawv ntsug, nws hais rau HUAB TAIS tias : "HUAB TAIS, saib, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab plaub npaug pauj rau nws." YES XUS hais rau Ntxas Kais tias : "Hnub no, txoj kev cawm los txog hauv lub tsev no, vim tus no kuj yog Has Nplas Has ib leeg tub thiab. Vim tias Neeg Leej Tub tuaj nrhiav thiab tuaj cawm yam uas ploj lawm."
Yog Huab Tais Yes Xus Lub Moo Zoo
