Zaj Nyeem Ib
2 Mas Kas Npes 7:1-2,9-14
Cov lus nyob hauv Ntawv Mas Kas Npes Phau Ob
Tus Vaj As Nthias Kus ntes tau xya leej kwv tij nrog lawv niam. Tus vaj yuam lawv kom lawv noj nqaij npuas uas lawv Txoj Cai txwv tsis pub noj. Nws kom xuas pas thiab xuas leeg nyuj plawm lawv. Ib tug tub txawm sawv xya leej kwv tij thiab lawv niam chaw hais rau tus vaj tias : "Koj xav paub saib peb xav li cas. Mas peb yeem tuag zoo dua qhov hla peb cov yawg koob Txoj Cai."
Thaum nws yuav tuag, nws hais tias : "Ib tug neeg siab phem li koj, koj tsis pub peb ua neej nyob. Tab sis tus vaj kav lub ntiaj teb yuav tsa peb sawv rov los kom peb tau ib lub neej tsis txawj kawg, rau qhov peb tuag vim nws Txoj Cai."
Tus ob no tuag tas, lawv coj tus peb los. Lawv kom nws hlev nplaig, ces nws hlev nplaig tam sim ntawd thiab nws xyab nws ob txhais caj npab tam sim rau lawv. Nws tseem muaj cuab kav hais tias : "Kuv txais kuv ob txhais tes no ntawm Ntuj los, vim nws tej kev cai mas kuv ntxub kuv ob txhais tes. Kuv tso siab tias nws yuav rov muab kuv ob txhais tes no rau kuv." Tus vaj thiab nws cov neeg sawv daws ceeb tas tias vim li cas tus tub hluas ntawd yuav muaj lub siab loj kawg. Nws saib nws qhov txom nyem zoo li tsis muaj nqis dab tsi.
Nws txoj sia tu lawm, lawv kuj coj tus plaub los ua phem li ntawd rau thiab. 14 Thaum tus plaub yuav tuag, nws hais tias : "Kuv yeem tuag nyob hauv neeg txhais tes. Kuv tso siab tias Tswv Ntuj yuav tsa kuv ciaj rov los. Ntawm koj, mas koj yuav tsis tau ciaj rov los muaj txoj sia."
Yog TSWV NTUJ lo Lus
Nkauj Paj Nruag Txais Ntuj Lus
NPN 17:1,5-6,8,15(15b)
Txais: HUAB TAIS, thaum koj lub hwj chim tawm tuaj, txoj kev zoo siab yuav puv kuv tej siab ntsws.
(Nqua Suab Cav Txog Tswv Ntuj, 201)
1. HUAB TAIS, thov koj mloog ib zaj lus ncaj ncees.
Koj muab siab rau mloog kuv lub suab quaj.
Koj tig ntsej los mloog kuv lo lus thov,
kuv lub ncauj tsis dag. Teb.
2. Kuv taug koj hneev taw, kuv yuav tsis npleem ko taw.
Kuv tus TSWV NTUJ, kuv hu txog koj, koj yeej yuav teb kuv.
Koj tig ntsej los mloog kuv lo lus. Teb.
3. Koj txuag kuv zoo li txuag lub ntsiab muag.
Koj zais kuv rau hauv koj phab tis qhov ntxoov.
Kuv yuav pom koj lub ntsej muag.
Kuv tsim dheev los, koj tus duab nyob puv kuv siab ntsws. Teb.
Zaj Nyeem Ob
2 Tes Xas Los Nis 2:16-3:5
Cov lus nyob hauv Tes Xas Los Nis Tsab Ntawv Ob
Thov kom peb tus HUAB TAIS YES XUS PLEEV, thiab peb Txiv TSWV NTUJ nkawd nplij nej siab. TSWV NTUJ yog tus hlub peb, nws pub kev nplij mus li, thiab pub kev tso siab lom zem. Thov kom nkawd nplij nej lub siab thiab nres nej tej hauj lwm, thiab nej tej lus huv tib si kom khov kho.
Kwv tij sawv daws, nej thov Ntuj rau peb thiab mog ! Nej thov kom HUAB TAIS Lo Lus mus taug nws txoj kev ntxiv, thiab kom Lo Lus nto koob meej ntxiv, ib yam li Lo Lus tau nto koob meej nyob hauv nej. Nej thov Ntuj, kom peb dim ntawm cov neeg siab phem yuam kev : vim Ntuj tsis pub kev ntseeg rau sawv daws. Tiam sis HUAB TAIS pheej xeeb : nws yuav nres nej kom ruaj nreb, nws yuav txuag nej ntawm tus phem. Nyob hauv HUAB TAIS, peb tso siab rau nej kawg. Txhua yam peb qhia, mas nej ua raws, thiab nej yuav ua ntxiv mus. Kuv thov kom HUAB TAIS coj nej lub siab, mus txog TSWV NTUJ txoj kev nyiam thiab txog Leej Pleev txoj kev ruaj nreb.
Yog TSWV NTUJ lo Lus
Nkauj Cav Txog Lub Moo Zoo
Qhib Yav Tom Ntej 1:5a,6b
As les lus yas. As les lus yas. TSWV NTUJ nyiam lub sim ceeb tas nrho, nws muab nws Leej Tub twm zeej rau kom xwv cov uas ntseeg txog nws muaj txoj sia nyob mus li. As les lus yas.
(Nqua Suab Cav Txog Tswv Ntuj, 238, nqe 9)
Ntawv Moo Zoo
Lus Kas 20:27-38
Nej mloog ib zag nyob hauv Lus Kas Ntawv Moo Zoo
Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. Lawv nug YES XUS tias : "Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv. Muaj xya leej kwv tij. Thawj tug yuav poj niam, nws tuag tsis tau muaj tub ki. Tus ob kuj tuag ib yam li ntawd. Tus peb qaws tus poj niam. Tas lawv xya leej puav leej tuag tsis muaj tub ki li. Thaum kawg, tus poj niam kuj tuag lawm thiab. Ua li mas lub zim txwv neeg tuag yuav sawv rov los, tus poj niam ntawd yuav yog tus twg poj niam ? Vim lawv xya leej tau yuav nws ua poj niam."
YES XUS thiaj hais rau lawv tias : "Cov tub ki hauv lub qab ntuj no sib qaws ua txij ua nkawm. Tab sis cov uas Ntuj txiav tias lawv tsim nyog txais ib feem nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv. Rau qhov lawv yuav tsis txawj tuag ntxiv. Lawv nrog cov Tshiab sib txig. Lawv yog TSWV NTUJ cov tub, vim lawv yog kev sawv rov los cov tub. Hais txog cov tuag sawv rov los, Mais Xes twb qhia txog qhov ntawd nyob hauv zaj hais txog Tsob Pos, thaum nws hu HUAB TAIS ua Has Nplas Has tus TSWV NTUJ, His Xas Has tus TSWV NTUJ, Yas Kos tus TSWV NTUJ. Ua li mas TSWV NTUJ tsis yog cov tuag tus TSWV NTUJ, yog cov neeg ciaj tus TSWV NTUJ. Tas sawv daws muaj txoj sia kom tau hwm TSWV NTUJ."
Yog Huab Tais Yes Xus Lub Moo Zoo
Lus Kas 20:27.34-38
Nej mloog ib zag nyob hauv Lus Kas Ntawv Moo Zoo
Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. YES XUS thiaj hais rau lawv tias : "Cov tub ki hauv lub qab ntuj no sib qaws ua txij ua nkawm. Tab sis cov uas Ntuj txiav tias lawv tsim nyog txais ib feem nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv. Rau qhov lawv yuav tsis txawj tuag ntxiv. Lawv nrog cov Tshiab sib txig. Lawv yog TSWV NTUJ cov tub, vim lawv yog kev sawv rov los cov tub. Hais txog cov tuag sawv rov los, Mais Xes twb qhia txog qhov ntawd nyob hauv zaj hais txog Tsob Pos, thaum nws hu HUAB TAIS ua Has Nplas Has tus TSWV NTUJ, His Xas Has tus TSWV NTUJ, Yas Kos tus TSWV NTUJ. Ua li mas TSWV NTUJ tsis yog cov tuag tus TSWV NTUJ, yog cov neeg ciaj tus TSWV NTUJ. Tas sawv daws muaj txoj sia kom tau hwm TSWV NTUJ."
Yog Huab Tais Yes Xus Lub Moo Zoo
