Zaj Nyeem Ib
His Xais 11:1-10
Cov lus nyob hauv Ntawv His Xais
Ib tug ceg yuav hlav ntawm Yes Xes lub hauv paus los, ib tug ntsuag yuav hlav ntawm Yes Xes cov cag los ib tug ntsuag yuav hlav ntawm Yes Xes cov cag los.
HUAB TAIS lub tswv yim yuav nyob txawm saum nws. Yog ib lub tswv yim thoob tsib thiab ntse, ib lub tswv yim pab xav tom ntej tom qab thiab pab ua siab loj, ib lub tswv yim paub txuj thiab hwm HUAB TAIS.
Nws yuav nrhiav kev hwm HUAB TAIS. Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais.
Nws yuav txiav txim ncaj rau cov tsis muaj zog, nws yuav pab cov neeg hauv txheej qis nyob hauv lub teb chaws, nws lub ncauj cov lus txiav yuav ntaus cov siab ceev, nws di ncauj yuav tshuab pa tua cov lim hiam.
Kev ncaj yuav yog nws txoj siv sia duav, kev hais qhov muaj tseeb yuav yog nws txoj siv sia ntawm ntsag.
Tus hma yuav nrog tus thav yaj nyob, tus tsov pom txwv yuav nrog tus thav tshis nyob ib nkuaj. Tus xyuas nyuj thiab tus tsov ntxhuav yuav ua ke nog zaub, ib tug me nyuam tub yuav caij nkawd.
Tus maum nyuj thiab tus maum dais ntaus phooj ywg, nkawd cov me nyuam yuav nyob hauv ib lub nkuaj, tus tsov ntxhuav yuav noj quav nplej xws li tus nyuj.
Tus me nyuam mos yuav ua si nyob ze ntawm tus nab liab tsaig, tus me nyuam nyuam qhuav cais mis yuav cev tes mus hauv nab ntsuab lub qhov.
Nyob saum kuv lub roob ntshiab, yuav tsis ua phem tsis ua nkhaus, vim kev paub HUAB TAIS yuav nyob puv ntiaj teb, ib yam li dej vov lub hiav txwv.
Hnub ntawd, Yes Xes lub hauv paus yuav sawv xws li ib tug chij hu tas txhia haiv neeg.
Yog TSWV NTUJ lo Lus
Nkauj Paj Nruag Txais Ntuj Lus
NPN 71:1-2,7-8,12-13,17 (7)
Txais: Lub caij nws ua vaj, txoj kev haum pheej tawg paj, lub qab ntuj neeg nyob thaj yeeb tsis muaj caij kawg.
(Nqua Suab Cav Txog Tswv Ntuj, 2)
1. TSWV NTUJ, thov koj pub txoj kev haum pheej rau tus vaj,
thov koj pub txoj kev ncaj rau vaj ntxwv leej tub
kom nws tswj koj haiv neeg raws kev ncaj,
kom nws kav cov neeg me raws kev haum pheej. Teb.
2. Lub caij nws ua vaj, txoj kev haum pheej tawg paj,
yuav muaj kev thaj yeeb mus txog thaum tsis muaj lub hli.
Nws yuav ua vaj kav txhua lub hiav txwv,
Nws yuav kav txij tus Niam Dej mus txog npoo ntiaj teb kawg. Teb.
3. Nws yuav npo pluag uas hu txog nws;
nws yuav cawm cov neeg me uas tsis muaj chaw khaub zig.
Nws yuav hlub tus pluag thiab tus neeg me tsis muaj tsim;
Nws yuav cawm cov pluag txoj sia. Teb.
4. Thov kom nws lub npe nto koob meej mus ib txhiab ib txhis,
kom nws lub npe nyob ntev li lub hnub.
Ib tsoom neeg yuav tau txais txoj hmoov zoo nyob hauv nws lub npe.
Txhua haiv neeg yuav tshaj tias nws txoj hmoov zoo. Teb.
Zaj Nyeem Ob
Los Mas 15:4-9
Cov lus Paj Lug sau tuaj rau Cov Ntseeg nyob Los Mas
Kwv tij sawv daws Tas txhua yam thaud, lawv muab sau tseg, mas yog vim lawv xav qhia peb: Ntawv qhia kom paub TSWV NTUJ lub siab ntev, paub TSWV NTUJ txoj kev nplij neeg, peb thiaj tso siab rau Ntuj.
Kuv thov tus TSWV NTUJ siab ntev txawj nplij neeg zoo li ntawd, kom nws ua peb lub siab ntshaw sib nyiam sib hlub raws li YES XUS PLEEV tus lwj lwm. Ces nej yuav koom siab koom ntsws, thiab koom suab hu nkauj cav txog TSWV NTUJ uas yog peb tus HUAB TAIS YES XUS PLEEV Leej Txiv.
Ua li mas, nej ib leeg yuav txais ib leeg zoo, xws li YES XUS tau txais nej tuaj hwm TSWV NTUJ. Kuv hais tias, thaum YES XUS PLEEV tuaj nws tau pab haiv His Xas Lais, vim nws xav kom TSWV NTUJ nto moo tias TSWV NTUJ siab ncaj, nws xav ua kom muaj raws li TSWV NTUJ tau cog lus rau cov yawg koob His Xas Lais. Nyem no, tas txhia haiv neeg thiaj cav txog tus TSWV NTUJ khuv leej neeg. Raws nraim li Ntawv lo lus hais tias: ‘Kuv yuav cav txog koj nyob hauv nruab nrab txhua haiv neeg, kuv yuav hu nkauj cav txog koj lub npe.’
Yog TSWV NTUJ lo Lus
Nkauj Cav Txog Lub Moo Zoo
Lus Kas 3:4.6
As les lus yas. As les lus yas. Nej npaj kev tos HUAB TAIS! Nej kho kom nws txoj kev ncaj ces tas ib zeej tsoom yuav pom HUAB TAIS txoj kev cawm. As les lus yas.
(Nqua Suab Cav Txog Tswv Ntuj, 229, nqe 1)
Ntawv Moo Zoo
Mas Tais 3:1-12
Nej mloog ib zag nyob hauv Mas Tais Ntawv Moo Zoo
Thaum, muaj ib ntus, Zam Ntxuav Plig mus ntuas tsoom sid nyob hauv teb chaws suab puam Yus Das. Nws hais tias: "Nej hloov siab mog, vim Ntuj lub Ceeb Tsheej los txog ze lawm." Nws yog tus uas yaj saub His Xais hais txog tias: Tus qw hauv teb chaws quav poj lub suab hais tias: Nej npaj txoj kev rau HUAB TAIS, nej ua kom nws txoj kev ncaj tuaj.
Zam cov ris tsho yog xuas plaub ntxhuav ua, nws sia ib daim siv tawv tsiaj ncig nws lub duav. Nws noj kooj thiab zib mu qus. Tas cov nyob Yes Lus Xas Les, cov nyob Yus Das teb, thiab cov nyob ib thaj tsam raws tus dej Yos Las Das puav leej tuaj cuag Zam. Lawv lees txhaum, thiab thov nws ntxuav lawv nyob hauv tus dej Yos Las Das. Thaum Zam pom coob tus Fas Lis Xais thiab ntau tus Xas Dus Kais tuaj txais kab ke ntxuav, nws hais rau lawv tias: "Caj ces nab muaj taug, leej twg qhia nej khiav kom nej dim ntawm Ntuj Txoj Kev Npau Taws uas tuaj yuav txog ? Nej kav tsij txi ib co txiv tsim nyog tus neeg hloov siab. Nej txhob khav rau nruab siab tias: ‘Peb muaj Has Nplas Has ua peb txiv.’ Kuv hais rau nej tias, TSWV NTUJ yuav ua kom Has Nplas Has ib co xeeb ntxwv tawm hauv cov pob zeb no los kuj tau. Zaum no, rab taus twb nyob ntawm cag ntoo lawm, tsob ntoo twg tsis txi txiv zoo, yuav tsum muab txiav pov hlawv hauv hluav taws. Ntawm kuv, mas kuv ntxuav nej nyob hauv dej kom nej tig los yuav ib lub siab tshiab; hos tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. Tus ntawd yuav ntxuav nej nyob hauv LEEJ NTUJ PLIG NTSHIAB thiab nyob hauv hluav taws. Nws txhais tes tuav rawv ib lub vab, nws yuav ntxuaj nws lub tshav ntaus nplej. Nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag."
Yog Huab Tais Yes Xus Lub Moo Zoo
