Zaj Nyeem Ib
His Xais 60:1-6
Koj sawv ! Kom koj qhov pom kev ci ntsa iab mas !
Cov lus nyob hauv Ntawv His Xais
1 Yes Lus Xas Les, koj sawv ! Kom koj qhov pom kev ci ntsa iab mas ! Vim koj qhov pom kev tuaj txog, thiab Huab Tais lub hwj chim sawv los ziab koj.
2 Ntsia saib ! Qhov tsaus ntuj vov tas lub ntiaj teb. Ib twv huab dub vov cov haiv neeg. Tab sis Huab Tais lub hwj chim nyob hauv koj.
3 Cov kuj cuab taug kev mus, nyob hauv koj qhov pom kev. Koj yog lub hnub tawm tuaj kaj cov vaj kom lawv pom kev mus.
4 Koj tsa muag ntsia nyob ncig koj mog ! Koj yuav pom sawv daws sib sau tuaj cuag koj. Koj cov tub tuaj tej teb chaws deb tuaj, lawv ris koj cov ntxhais ntawm duav.
5 Koj pom li ntawd, koj yuav ua ntsej muag luag ntxhi. Koj lub plawv yuav dhia paj paws, koj lub siab yuav nthuav. Tej txhab kub nram dej ntuj tuaj thawj koj. Cov kuj cuab tej nyiaj tej kub tuaj nyob hauv koj.
6 Cov ntxhuav tuaj ua npoj ntws. Cov thauj tuaj ntawm Mas Dias thiab Es Fais. Lwm cov tuaj Ses Npas tuaj, lawv thauj kub thiab txab txiv yoov tuaj, lawv tshaj Huab Tais cov hauj lwm loj.
Yog Tswv Ntuj lo Lus
Nkauj Paj Nruag Txais Ntuj Lus
NPN 19: 2-3, 4-5 (5)
Txais: Lub sim ceeb tej suab xwm yeem ncha puv ntiaj teb.
1. Cuaj txheej ntuj piav txog Tswv Ntuj lub koob meej,
lub ntuj ntsuab tshaj cov hauj lwm nws txhais tes tsim los.
Nruab hnub rov hais txog Tswv Ntuj lub koob meej rau nruab hnub mloog,
Ntuj tsaus qhia rau hmo ntuj paub. Teb.
2. Tsis yog ib co lus los ib zaj lus piav,
leej tib neeg hnov tsis tau lawv lub suab.
Lub sim ceeb tej suab xwm yeem ncha puv ntiaj teb,
lawv lo lus nrov txog tim npoo ntuj.
Tswv Ntuj tsa ib lub tsev tsam phooj rau lub hnub nyob sab ntuj puag tim ub. Teb.
Zaj Nyeem Ob (chọn một trong hai)
1 Tis Mos Tes 2: 1-8
Tswv Ntuj xav kom tas zeej tsoom txais kev cawm thiab paub qhov tseeb.
Cov lus Paj Lug sau tuaj rau Tis Mos Tes tsab ntawv ib
1 Tus zoo nyiam, li ntawd, kuv xav ntuas nej, kom nej xub thov Ntuj, teev Ntuj, thiab hais tej zaj ua Ntuj tsaug rau tas ib zeej tsoom.
2 Nej yuav thov Ntuj rau cov vaj, thiab cov muaj cai tswj luag tej, kom peb tau kev coj ib lub neej nyob nyab xeeb thiab tiaj tus nyob hauv txoj kev hwm Ntuj thiab muaj tsim.
3 Tej ntawd yog kev zoo thiab xis tus Tswv Ntuj cawm peb lub siab.
4 Tswv Ntuj xav kom tas zeej tsoom txais kev cawm thiab paub qhov tseeb.
5 Vim muaj tib tug Tswv Ntuj xwb. Nyob ntawm Tswv Ntuj thiab tsoom neeg kis nruab nrab, tsuas muaj tib tug cev lus xwb : yog Yes Xus Pleev. Nws yog neeg, nws muab nws los ua nqi txhiv peb sawv daws.
6 Thaum txog lub caij teem, nws tau ua tim khawv zeem tseeb txog tej yam ntawd.
7 Ntuj tsa kuv ua tus tshaj lus thiab tus Hauv Paus Xa Lus. Kuv hais lus tseeb, kuv tsis dag. Kuv yog tus thoob xwm Txoj Cai, qhia cov neeg teev pej kum dab, kom lawv paub txoj kev ntseeg thiab paub qhov tseeb.
8 Li ntawd, kuv xav kom nyob tas qhov txhia chaw, sawv daws thov Ntuj, thiab tsa tes hwm Ntuj, hu txog Ntuj, kom txhob muaj kev npau taws, txhob muaj lus sib ceg.
Yog Tswv Ntuj lo Lus
Hoặc : Zaj Nyeem Ob
Hauj Lwm 1: 3-8
Nej yuav ua Kuv cov tim khawv.
Cov Lus nyob hauv ntawv Hauj Lwm
3 Thaum Yes Xus sawv rov los lawm, thaum Yes Xus raug luag tsim txom tas, Nws yees tawm los xyuas cov Hauv Paus Xa Lus. Nws ua ntau yam zeem tseeb tias nws muaj txoj sia, nws tawm los rau lawv pom plaub caug hnub, nws tham txog Tswv Ntuj lub Ceeb Tsheej rau lawv.
4 Thaum Yes Xus nrog lawv nyob, nws hais rau lawv kom tsis txhob tawm hauv Yes Lus Xas Les mus, kom lawv nyob tos Leej Txiv lo lus cog tseg : "Lo lus uas nej hnov kuv hais tias :
5 Zam ua kab ke ntxuav nyob hauv dej. Hos nej, mas tshuav hnub puav xwb, nej yuav txais kab ke ntxuav nyob hauv Leej Ntuj Plig Ntshiab."
6 Thaum cov Hauv Paus Xa Lus nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa tus vaj His Xas Lais ?"
7 Yes Xus hais rau lawv tias : "Tsis yog nej hauj lwm yuav paub txog lub zim txwv thiab lub sij hawm uas Leej Txiv siv nws lub hwj huam los teem cia.
8 Tab sis, Leej Ntuj Plig Ntshiab yuav nqes los saum nej, ces nej yuav txais hwj huam, nej yuav ua kuv cov tim khawv nyob Yes Lus Xas Les, nyob thoob lub xeev Yus Das, thiab Xas Mas Lias, mus txog puag tim npoo ntiaj teb."
Yog Tswv Ntuj lo Lus
Nkauj Cav Txog Lub Moo Zoo
Mas Tais 28:19-20
As les lus yas. As les lus yas.
Nej mus, nej ua kom tas ib tsoom haiv neeg los ua kuv thwj tim.
Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.
Nej qhia kom lawv coj tas puas tsav yam uas kuv qhia rau nej.
Hos kuv, mas kuv niaj hnub nrog nej nyob mus txog lub zim txwv ntiaj teb kawg.
As les lus yas.
Ntawv Moo Zoo (chọn một trong ba)
Mas Kos 16:15-20
Huab Tais nrog lawv lis hauj lwm.
Nej mloog ib zag nyob hauv Mas Kos Ntawv Moo Zoo
15 Tom qab no, Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas Ntuj yuav cawm nws, hos tus tsis ntseeg yuav raug txim.
17 Cov cim no yuav nrog nraim cov uas yuav ntseeg : lawv hu txog kuv lub npe, lawv yuav ntiab dab tau, lawv yuav hais ib co lus tshiab,
18 lawv yuav tuav nab tau, yog lawv haus tshuaj lom neeg, tshuaj yuav tsis ua xwv txheej rau lawv, thaum lawv tsa tes rau saum cov neeg mob, mas cov mob yuav zoo."
19 Thaum Huab Tais Yes Xus hais cov lus no tas rau lawv, ces Ntuj nqa nws nce mus saum ntuj. Nws zaum ntawm Tswv Ntuj sab xis.
20 Cov thwj tim tawm mus tshaj lub Moo Zoo rau tas qhov txhia chaw, Huab Tais nrog lawv lis hauj lwm, nws ua ib co cim nres Lo Lus.
Yog Huab Tais Yes Xus Lub Moo Zoo
Hoặc : Ntawv Moo Zoo
Mas Tais 28: 16-20
Nej mus, nej ua kom tas ib tsoom haiv neeg los ua Kuv thwj tim.
Nej mloog ib zag nyob hauv Mas Tais Ntawv Moo Zoo
16 Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv.
17 Lawv pom Yes Xus, lawv pe ; ib txhia tseem ua xyem xyav.
18 Yes Xus txav los ze lawv, nws hais cov lus no rau lawv : "Ntuj pub ib puas tsav yam hwj huam rau kuv nyob saum ntuj thiab nyob ntiaj teb no.
19 Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.
20 Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg.
Yog Huab Tais Yes Xus Lub Moo Zoo
Hoặc : Ntawv Moo Zoo
Lus Kas 24:44-53
Kuv yuav xa qhov uas kuv Txiv cog lus tuaj rau nej.
Nej mloog ib zag nyob hauv Lus Kas Ntawv Moo Zoo
44 Thaum lawv tseem sib tham tias Yes Xus muaj txoj sia nyob. Nws sawv ntsug hauv nruab nrab lawv, Yes Xus hais rau lawv tias : "Thaum kuv tseem nrog nej nyob, kuv hais cov lus no rau nej : Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, yuav tsum tshwm sim kom tiav."
45 Ces Yes Xus qhib lawv lub tswv yim kom lawv to taub Ntawv.
46 Nws hais rau lawv tias : "Ntawv sau hais tias Leej Pleev yuav raug luag tsim txom. Hnub peb, nws yuav sawv hauv cov tuag rov los.
47 Thiab Ntawv tseem hais tias yuav tsum tshaj txoj kev tig los hloov siab ntxub kev txhaum kom Ntuj zam txhaum rau ib tsoom haiv neeg nyob hauv Leej Pleev lub Npe. Yuav xub tshaj nyob Yes Lus Xas Les.
48 Nej yuav ua tim khawv txog tej ntawd.
49 Kuv yuav xa qhov uas kuv Txiv cog lus tuaj rau nej. Ua li mas nej nyob hauv lub nroog no mus txog hnub nej tau txais lub zog nqes saum txheej siab los hnav tso."
50 Yes Xus coj lawv mus txog Npes Tas Nias, ces nws tsa tes foom hmoov zoo rau lawv.
51 Thaum nws tseem tab tom foom hmoov zoo, mas nws txav ntawm lawv mus. Ces Ntuj nqa nws mus saum ntuj.
52 Hos lawv, mas lawv txhos caug pe Yes Xus. Lawv rov qab mus Yes Lus Xas Les, lawv zoo siab tas nrho.
53 Lawv nyob hauv lub Tuam Tsev Teev Ntuj tas mus li cav txog Tswv Ntuj.
Yog Huab Tais Yes Xus Lub Moo Zoo
){kind=link}