Zaj Nyeem Ib
Txoj Cai Ob 4: 32-34.39-40
Thaud, Tswv Ntuj pab nws haiv neeg. Nyem no, nws kuj pab tsoom ntseeg ib yam li thaud. Peb yuav ua li cas rau nws ? Peb yuav mloog nws coj peb kev.
Cov lus nyob hauv Ntawv Txoj Cai Ob
32 Muaj ib zaug, Mais Xes hais rau cov His Xas Lais tias : "Nej sim nug tej laus saib, txij hnub Tswv Ntuj tsim neeg los nyob ntiaj teb, los txog hnub no, txij qab ntug mus txog hauv ntuj, puas muaj ib lo lus muaj hwj chim npaum li Tswv Ntuj lo lus ? Puas muaj neeg tau hnov dua ib lo lus zoo li ntawd ?
33 Puas muaj lwm haiv neeg tau hnov tus Tswv Ntuj muaj txoj sia lub suab hais lus hauv hluav taws tuaj li nej tau hnov tas, thiab lawv tseem muaj txoj sia nyob ntxiv ?
34 Puas muaj lwm tus Tswv Ntuj uas tuaj xaiv ib haiv neeg hauv lwm cov haiv neeg los ua nws tug ? Puas muaj lwm tus Tswv Ntuj tau ua tej yam los sim neeg siab, tej lub cim loj thiab tej yam txaus qhuas, tau sawv ntaus tej tsam rog, tau siv nws txhais tes muaj hwj huam thiab xyab nws txhais npab muaj zog, tau siv nws lub peev xwm ua tej yam txaus ntshai kawg, xws li nej tus Huab Tais Tswv Ntuj tau ua pab nej nyob Hais Nkws Tos teb, rau nej qhov muag pom ?
39 Hnub no, nej yuav tsum paub, yuav tsum nco ntsoov rau nruab siab tias : Huab Tais yog Tswv Ntuj tiag, nws yog Tswv Ntuj nyob saum ntuj thiab nyob ntiaj teb no tib si. Tsis muaj dua lwm tus Tswv Ntuj.
40 Nej yuav khaws Huab Tais txoj cai thiab nws cov lus qhia uas kuv ceeb toom rau nej, kom nej thiab nej cov tub ki tau txoj hmoov zoo, thiab tau nyob ntev niaj ntau xyoo hauv lub teb chaws uas nej tus Huab Tais Tswv Ntuj muab pub rau nej nyob mus ib txhis."
Yog Tswv Ntuj lo Lus
Nkauj Paj Nruag Txais Ntuj Lus
NPN 33:4-5,6,9,18-19,20,22(12b)
(Nqua Suab Cav Txog Tswv Ntuj, 103)
Txais: Cov tau txoj hmoov zoo yog cov Tswv Ntuj xaiv los ua Nws tug.
1. Huab Tais, lo lus yog lus ncaj,
nws cov dej num nyob ruaj nreb.
Nws nyiam kev ncaj thiab kev haum pheej.
Huab Tais txoj kev hlub ntws puv lub ntiaj teb. Teb.
2. Huab Tais lo lus tsim yim txheej cuaj txheej ntuj.
Nws muab nws txoj pa los tsim cov hnub qub.
Nws hais ib lo lus ces txhua yam tshwm sim tuaj.
Nws txib cees txhua tsav puas yam ua raws li nws hais. Teb.
3. Huab Tais zov cov neeg hwm nws.
Nws zov cov neeg tso siab rau nws lub siab zoo.
Nws npo lawv dim ntawm kev tuag.
Nws txuag lawv txoj sia thaum lub teb chaws raug kev tshaib kev nqhis. Teb.
4. Peb tus ntsuj plig tso ntsoov Huab Tais.
Nws yog tus pab peb, nws yog peb daim leem phiaj.
Huab Tais, thov kom koj lub siab hlub roos peb.
Peb chaw tso siab yog nyob hauv koj. Teb.
Zaj Nyeem Ob
Los Mas 8:14-17
Peb nrog Yes Xus ua Tswv Ntuj cov tub. Leej Ntuj Plig pab peb ntseeg tias peb yog Tsvw Ntuj cov tub.
Paj Lug tsab ntawv sau tuaj rau cov ntseeg nyob Los Mas
14 Kwv tij sawv daws, txhua leej txhua tus uas Tswv Ntuj Leej Tswv Yim coj, mas lawv yog Tswv Ntuj cov me nyuam tas huv tib si.
15 Nej tsis tau txais ib lub tswv yim ua qhev ; nej tsis txhob rov qab poob rau hauv txoj kev ntshai. Nej tau txais ib lub tswv yim ua tub ki tshiab, mas nej hu Tswv Ntuj tias : ‘As Npas ! Txiv !’
16 Leej Ntuj Plig nrog peb lub tswv yim zeem tseeb tias peb yog Tswv Ntuj cov me nyuam tiag.
17 Vim peb yog Ntuj cov me nyuam, mas peb yog cov txais lub cuab tam : peb yog cov txais Tswv Ntuj lub cuab tam ; peb nrog Leej Pleev txais ib lub cuab tam, vim peb nrog nws raug txom nyem, peb yuav tau nrog nws muaj hwj chim.
Yog Tswv Ntuj lo Lus
Nkauj Cav Txog Lub Moo Zoo
Qhib Yav Tom Ntej 1:8
(Nqua Suab Cav Txog Tswv Ntuj, 237, nqe 5)
As les lus yas. As les lus yas. Huab Tais Leej Txiv, Huab Tais Leej Tub thiab Huab Tais Leej Ntuj Plig muaj koob meej nto moo lug. Yog tus Huab Tais ib txwm nyob thiab yog tus tseem yuav los. As les lus yas.
Ntawv Moo Zoo
Mas Tais 28:16-20
Huab Tais Yes Xus qhia peb tuav txog peb leeg Huab Tais lub npe. Peb nrog lawv peb leeg ua ib cuab ib yig.
Nej mloog ib zag nyob hauv Mas Tais Ntawv Moo Zoo
16 Muaj ib hnub, Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv.
17 Lawv pom Yes Xus, lawv pe ; ib txhia tseem ua xyem xyav.
18 Yes Xus txav los ze lawv, nws hais cov lus no rau lawv : "Ntuj pub ib puas tsav yam hwj huam rau kuv nyob saum ntuj thiab nyob ntiaj teb no.
19 Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.
20 Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg.
Yog Huab Tais Yes Xus Lub Moo Zoo
){kind=link}