Zaj Nyeem Ib
Os Xes 11:1.3-4.5c,8ac-9
Tswv Ntuj hlub nws haiv neeg xws li tus txiv hlub nws leej tub.
Cov lus nyob hauv Ntawv Os Xes
1 Huab Tais hais li no : Thaum haiv His Xas Lais tseem ua me nyuam kuv twb nyiam nws, kuv hu kuv tus tub khuam nyob Hais Nkws Tos teb kom los.
3 Hos kuv yog tus hwj cov Es Fais xyaum mus kev, kuv tuav lawv txhais npab. Lawv tsis to taub tias kuv saib xyuas lawv.
4 Kuv xuas ib co hlua mos cab lawv mus. Kuv tu lawv xws li ib tug niam puag nws tus me nyuam, kuv nyiam kuv hlub kuv plhws ntshis lawv. Kuv khoov cev rau saum lawv pub lawv noj.
5c tab sis lawv tsis kam rov los cuag kuv.
8ac His Xas Lais, kuv yuav tso nej pov tseg puas tau ! Kuv yuav muab nej muag rau luag tus qhua puas tau ! Kuv lub siab lub plawv ntxeev tas lwj tas hauv kuv lub nrog cev. Kuv tej siab ntsws rhiab tas.
9 Kuv yuav tsis tso kuv lub siab npau taws. Kuv yuav tsis rhuav His Xas Lais. Vim kuv yog Tswv Ntuj, kuv tsis yog neeg. Nyob hauv nruab nrab nej, kuv yog tus Ntshiab, kuv yuav tsis tuaj rhuav nej pov tseg.
Yog Tswv Ntuj Lo Lus
Nkauj Paj Nruag Txais Ntuj Lus
His Xais 12:2-3,4bcd,5-6(3)
(Nqua Suab Cav Txog Tswv Ntuj, 105)
Txais: Nej yuav zoo siab luag ntxhi mus ce cov dej txhawv pub txoj sia nyob mus li.
1. Tswv Ntuj yog tus cawm kuv tiag.
Kuv tso siab rau nws, kuv tsis txhawj.
Huab Tais yog kuv lub zog,
nws yog kuv lub peev xwm, yog tus cawm kuv.
Nej yuav zoo siab luag ntxhi mus ce nws cov dej cawm neeg. Teb.
2. Nej cav txog Huab Tais, nej hu txog nws lub npe.
Nej tshaj txog nws cov hauj lwm loj nyob hauv cov haiv neeg
kom sawv daws paub tias nws lub npe zoo tas nrho. Teb.
3. Nej ntaus paj nruag rau Huab Tais
vim nws tau ua nws lub hwj chim loj nrov ncha ntws nyob ntiaj teb no.
Tsoom neeg nyob Xis Yoos, nej seev suab lom zem
vim His Xas Lais tus Ntshiab muaj hwj xyeej nyob nruab nrab hauv nej. Teb.
Zaj Nyeem Ob
Es Fes Xos 3:8-12,14-19
Lub ntiaj teb neeg nrhiav kev kaj siab lug. Tab sis kev kaj siab lug tsuas yog nyob hauv txoj kev paub Yes Xus lub siab nyiam peb.
Paj Lug tsab ntawv sau tuaj rau Cov Ntseeg nyob Es Fes Xos
8 Kwv tij sawv daws, Tswv Ntuj pub lub txiaj ntsim no rau kuv, tus me dua cov hauv tsoom ntshiab, kom kuv tshaj Leej Pleev cov paj tshab uas neeg ntsuas tsis tau rau cov teev pej kum dab,
9 kom kuv qhia sawv daws paub tseeb tias cov txuj ci zais tob tob yog dab tsi : cov txuj no nyob zais ntshis tau txhiab tiam hauv Tswv Ntuj, hauv tus tsim tas ib puas tsav yam.
10 Nyem no, cov Tshiab ua vaj txheeb, thiab cov Tshiab muaj hwj huamsaum cov txheej ntuj pom Tswv Ntuj lub Koom Txoos, lawv thiaj paub Tswv Ntuj txoj kev thoob tsib uas tsis txawj kawg.
11 Vim Tswv Ntuj ib txwm npaj tej no nyob hauv peb tus Huab Tais Yes Xus Pleev.
12 Yog vim li no, peb muaj cuab kav tso siab lug txav los ze txoj kev ntseeg txog Leej Pleev.
14 Vim tej uas tau hais no, mas kuv txhos caug nyob ntawm Leej Txiv xub ntiag,
15 yog Leej Txiv uas tas ib tsoom ua txiv nyob saum ntuj, thiab nyob ntiaj teb no, txais lub npe txiv ntawm nws los.
16 Kuv thov kom Leej Txiv pub nws lub zog loj zog nchav los pab nej txoj sia sab hauv, nyob hauv Leej Ntuj Plig, thov nws pub raws nraim li nws lub hwj chim nplua nuj.
17 Kuv thov kom Leej Pleev los nyob txawm hauv nej lub siab, vim nej ntseeg, ces nej yuav nrhau cag rau hauv txoj kev nyiam, thiab nej cog lub siab rau hauv txoj kev nyiam.
18 Nej yuav txais ib lub zog pab nej, kom nej nrog tsoom ntshiab to taub Leej Pleev txoj kev nyiam dav npaum li cas, ntev li cas, siab li cas, tob li cas.
19 Nej yuav paub Leej Pleev txoj kev nyiam, uas tob tshaj txhua txoj kev paub txuj. Ces txhua hom txiaj ntsim hauv Tswv Ntuj yuav los nyob puv hauv nej.
Yog Tswv Ntuj Lo Lus
Nkauj Cav Txog Lub Moo Zoo
Mas Tais 11:29ab
(Nqua Suab Cav Txog Tswv Ntuj, 218, nqe 2)
As les lus yas. As les lus yas. Huab Tais hais tias : ‘Nej yuav txais Kuv tus quab. Nej kawm ntawm kuv, nej yuav khaws. Kuv cov lus qhia vim Kuv lub siab zoo tsis muab hlob.’ As les lus yas.
Hoặc :
1 Zam 4:10b
As les lus yas. As les lus yas. Tswv Ntuj tau nyiam peb, thiab yog Nws xa Nws Leej Tub tuaj ua nqi txhiv peb ntawm peb cov txhaum. As les lus yas.
Ntawv Moo Zoo
Zam 19:31-37
Yes Xus nyiam peb tas npaum no : nws zoo siab tuag kom tau pab peb, zoo siab cia luag nkaug nws lub plawv.
Nej mloog ib zag nyob hauv Zam Ntawv Moo Zoo
31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug ob sab ceg lov, thiab muab lwm tus uas nrog nws dai saum ntoo cuam ob sab ceg lov.
33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov,
34 tab sis ib tug tub rog xuas nws rab hmuv hno Yes Xus phab tav, tam sis ntawd ib co ntshav thiab ib co dej tawm los.
35 Tus uas tau pom qhov ntawd ua pov thawj hais. Nws ua tim khawv hais qhov tseeb, nws paub tias qhov nws hais muaj tiag. Nws hais tej ntawd kom nej ntseeg.
36 Tej xwm no tshwm sim kom muaj raws li Ntawv sau cia tias : Nws cov pob txha tsis lov ib tug li.
37 Tseem muaj lwm lo lus hauv Ntawv hais tias : Lawv yuav ntsia tus uas lawv nkaug.
Yog Huab Tais Yes Xus Lub Moo Zoo
){kind=link}