Zaj Nyeem Ib
His Xais 9:1-6
Ib tug me nyuam yug los nyob hauv nruab nrab peb. Nws coj txoj kev ncaj tuaj rau lub ntiaj teb neeg.
Cov lus nyob hauv ntawv yaj saub His Xais
1 Tsoom pej xeem uas lawv maub hauv qhov tsaus ntuj, lawv pom ib qho pom kev loj. Ib qho pom kev ci tuaj rau saum cov nyob hauv lub teb chaws tsaus ntuj nti.
2 Huab Tais, koj tau ua kom kev hom khaj hlob mus, kom muaj chaw zoo siab ntau. Sawv daws zoo siab nyob ntawm koj xub ntiag, ib yam li cov sau qoob loo zoo siab, ib yam li co tub rog sib faib cov toob xib lawv txeeb tau lawv dhia lom zem.
3 Tus quab uas tsuam lawv, tus ntas nyob saum lawv xub pwg, tus zov cov neeg nyob txim rab qws, koj muab tsuj, xws li thaum Mas Dias lub hnub nyoog.
4 Cov suab khau tub rog nrov ncha tas huv si, cov tsho tshaj sab lo ntshav tas huv si, nplaim taws yuav noj, hluav taws yuav hlawv.
5 Vim ib tug me nyuam yug los rau peb, Ntuj pub ib tug tub rau peb. Lub tuam teb nyob saum nws xub pwg. Luag tis nws npe hu ua : tus qhia tswv yim zoo tas nrho, tus Tswv Ntuj siab loj, tus vaj txheeb pub kev thaj yeeb.
6 Das Vis lub theej kiab thiab lub teb chaws nws yuav kav yog ib lub tuam teb dav thiab nyob thaj yeeb tsis muaj caij kawg. Nws yuav muab Txoj Cai thiab kev ncaj los tsa thiab nres nws lub tuam teb, txij no mus txog ib txhiab ib txhis. Tus Huab Tais kav tsoom tub rog nws lub siab hlub muaj khib yuav ua tej ntawd.
Yog Tswv Ntuj lo Lus
Nkauj Paj Nruag Txais Ntuj Lus
NPN 96: 1-2a. 2b-3. 11-12a. 12b-13 (Lus Kas 2:11)
Txais: Hnub no, Tus Cawm peb yug los lawm, Nws yog Leej Pleev, thiab yog Huab Tais.
1. Nej hu ib zag nkauj tshiab rau Huab Tais,
tas lub ntiaj teb, nej hu nkauj rau Huab Tais mas;
Nej hu nkauj rau Huab Tais, nej foom koob hmoov rau nws ! Teb.
2. Hnub dhau hnub, nej tshaj nws txoj kev cawm.
Nej ceeb toom nws lub koob meej rau tsoom kuj cuab paub,
piav nws cov dej num nto moo rau tsoom haiv neeg. Teb.
3. Kom lub ntuj zoo siab, lub teb dhia daj dhia luag,
kom dej ntuj thiab cov tsiaj uas nyob hauv luag ua suab ntas ntua !
Kom cov liaj cov teb nqaum paj nqaum nruas. Teb.
4. Kom txhua hom xyoob ntoo tom hav zoov nqee suab lom zem.
rau ntawm Huab Tais xub ntiag, vim nws tuaj lawm,
nws tuaj tswj fwm lub ntiaj teb,
nws tswj fwm lub sim ceeb raws txoj kev haum pheej,
nws tswj fwm cov haiv neeg nyob hauv txoj kev ncaj. Teb.
Zaj Nyeem Ob
Tis Tos 2:11-14
Tswv Ntuj lub txiaj ntsim tawm tuaj vim Yes Xus coj peb.
Cov lus nyob hauv leej ntshiab Paj Lug sau tuaj rau leej ntshiab Tis Tos
11 Kuv sau ntawv tuaj rau Tis Tos, kuv tus tseem tub nyob hauv peb txoj kev ntseeg. Sawv daws yuav coj tus yam ntxwv zoo, vim Tswv Ntuj lub txiaj ntsim yog lub qhov dej uas txhawv txoj kev cawm txhua leej txhua tus. Tswv Ntuj lub txiaj ntsim tawm los rau sawv daws pom xyeem.
12 Tswv Ntuj lub txiaj ntsim qhia peb kom tso kev tsis hwm Ntuj pov tseg, tso txoj kev ntshaw txog lub sim ceeb no tseg, kom tiam neej no, peb ua neej nyob hauv txoj kev cheem peb lub siab, hauv txoj kev ncaj, thiab kev hwm Ntuj.
13 Vim peb tos thiab peb vam ntsoov txoj kev kaj siab lug. Peb tos kom peb tus Tswv Ntuj loj, Yes Xus Pleev uas yog tus cawm peb lub hwj chim tawm los rau qhov muag pom xyeem.
14 Yes Xus Pleev, nws muab nws rau luag ntes, kom nws txhiv tau peb ntawm txhua txoj kev phem. Nws ntxuav ib haiv neeg kom huv los ua nws tug, thiab kub siab ua cov dej num zoo.
Yog Tswv Ntuj lo Lus
Nkauj Cav Txog Lub Moo Zoo
Lus Kas 2:10-11
As les lus yas. As les lus yas. Kuv tuaj xa ib tsab xov zoo uas yuav ua kom nej zoo siab : Hnub no, Tus Cawm nej yug los lawm, Nws yog Leej Pleev, thiab yog Huab Tais. As les lus yas.
Ntawv Moo Zoo
Lus Kas 2:1-14
Hmo no, tus cawm peb yug los lawm.
Nej mloog ib zag nyob hauv leej ntshiab Lus Kas Ntawv Moo Zoo
1 Lub zwj ceeb ntawd, vaj ntxwv Xes Ntxas Aus Nkus Tus tshaj lus ceeb toom kom tas ntiaj teb txheeb tsoom mej hwm.
2 Thaum txheeb tsoom mej hwm thawj zaug no, yog lub caij Kis Lis Nyus ua nom tswj Xis Lias teb.
3 Txhua leej txhua tus sawv kev mus, nyias mus sau nyias npe hauv nyias lub nroog.
4 Yos Xes kuj sawv kev hauv lub nroog Nas Xas Les, xeev Nkas Lis Lais mus pem Das Vis lub nroog hu ua Npes Les Hes, nyob hauv xeev Yus Das, vim Yos Xes yog Das Vis tsev neeg thiab Das Vis caj ces.
5 Yos Xes xav muab Mab Liab lub npe sau nrog nws lub npe, vim Mab Liab yog tus nws qhaib thiab Mab Liab cev hnyav lawm.
6 Thaum nkawd nyob Npes Les Hes, txog lub caij Mab Liab yuav daws cev.
7 Nws yug nws tus tub, nws muab ntaub qhwv, thiab muab tso pw hauv ib lub dab nyuj, vim lub tsev txais qhua tsis muaj chaw rau nkawd so.
8 Nyob thaj tsam ntawd, muaj ib co neeg zov yaj. Lawv nyob nruab teb. Hmo ntuj, lawv nyob zov lawv pab yaj.
9 Huab Tais tus Tshiab tawm los rau lawv pom, Huab Tais lub hwj chim ci dawb paug ncig lawv, lawv ntshai kawg.
10 Tus Tshiab hais rau lawv tias : "Nej txhob ntshai, vim kuv tuaj xa ib tsab xov zoo uas yuav ua kom nej zoo siab thiab ib tsoom neeg zoo siab.
11 Hnub no, nyob hauv Das Vis lub nroog, tus Cawm nej yug los lawm, Nws yog Leej Pleev, thiab yog Huab Tais.
12 Lub cim yuav ua kom nej paub yog lub cim no : nej yuav pom ib tug me nyuam mos qhwv ntaub pw hauv ib lub dab nyuj."
13 Ib sij huam, txawm muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias :
14 "Nyob saum cov txheej ntuj siab, Tswv Ntuj nto meej nto moo, nyob ntiaj teb, tsoom neeg Tswv Ntuj nyiam, nyob thaj yeeb."
Yog Huab Tais Yes Xus Lub Moo Zoo
){kind=link}