Zaj Nyeem Ib
Npes Xis Las 44:1,10-15
Peb yuav cav txog cov neeg uas yog peb cov yawg koob.
Cov lus nyob hauv Ntawv Npes Xis Las
1 Nyem no, peb yuav cav txog cov neeg nto moo loj, uas yog peb cov yawg koob.
10 Tab sis muaj ib co zoo, sawv daws tsis hnov qab lawv tej hauj lwm ncaj.
11 Lawv tej xeeb ntxwv yog zoo li ib lub cuab tam zoo nyob mus li.
12 Lawv tsoom xeeb ntxwv, lawv tej tub ki coj nraim cov lus uas lawv cog.
13 Lawv tsoom xeeb ntxwv yuav nyob mus li ib txhis, lawv lub koob meej yuav tsis ploj.
14 Lawv lub cev mus zwm av nyob hauv txoj kev thaj yeeb, lawv lub npe yuav ciaj mus txheej dhau txheej.
15 Cov haiv neeg yuav cav lawv kev thoob tsib. Lub txoos yuav tshaj lus zoo txog lawv.
Yog Tswv Ntuj lo Lus
Nkauj Paj Nruag Txais Ntuj Lus
NPN 128: 1-2; 3; 4-5a; 5b-6 (1)
Txais: Cov neeg hwm Huab Tais, thiab cov mus taug nws txoj kev, lawv txoj hmoov zoo.
1. Cov neeg hwm Huab Tais, thiab cov mus taug nws txoj kev, lawv txoj hmoov zoo.
Koj tau noj tej txhiam xws koj ob txhais tes khwv,
Koj txoj hmoov zoo ! Koj tau lub neej kaj siab ! Teb.
2. Koj poj niam yog zoo li tsob txiv cawv txi ncw ncw nyob hauv koj tsev.
Koj cov tub zoo li cov ntsuag txiv ntoo roj, ncig koj rooj mov. Teb.
3. Huab Tais foom koob hmoov zoo li ntawd rau tus hwm nws.
Thov kom Huab Tais nyob saum Xis Yoos foom hmoov zoo rau koj. Teb.
4. Niaj hnub tas koj sim neej,
koj yuav pom Yes Lus Xas Les vam meej,
Koj yuav pom koj cov tub, lawv tej tub tej ki tom qab.
Kev thaj yeeb nyob hauv His Xas Lais ! Teb.
Zaj Nyeem Ob
Es Fes Xos 6:1-4,18-23
Koj hwm koj niam koj txiv, koj thiaj yuav tau nyob zoo, thiab koj yuav ua neej nyob ntev xyoo nyob ntiaj teb no.
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Es Fes Xos
1 Kwv tij sawv daws, cov me nyuam, nej yuav mloog nej niam nej txiv, nyob hauv Huab Tais : qhov no yog txoj kev ncaj.
2 ‘Koj yuav hwm koj niam koj txiv’, yog thawj lo lus qhia ; Ntuj cog lus tias, yuav pub koob haum rau cov neeg mloog lo lus qhia ntawd.
3 Ntuj cog lus tias : ‘Koj hwm koj niam koj txiv, koj thiaj yuav tau nyob zoo, thiab koj yuav ua neej nyob ntev xyoo nyob ntiaj teb no’.
4 Cov ua niam ua txiv, nej txhob qhuab qhia nej cov me nyuam nruj dhau kev cai. Nej yuav siv tej lo lus ntuas, los tej lus qhia, tej txoj kev cob qhia tuaj ntawm Huab Tais tuaj.
18 Nej yuav coj ib lub neej teev Ntuj, thiab thov Ntuj tsis tseg. Nej yuav teev Ntuj tsis muaj caij muaj thaum, nyob hauv Leej Ntuj Plig. Nej yuav teev Ntuj tsis paub sab tsis paub nkees : nej thov Ntuj rau tsoom ntshiab.
19 Kuv kuj vam nej thov Ntuj rau kuv thiab, kom kuv tau kev qhib ncauj hais lus, tsis ntshai tshaj cov txuj zais tob tob hauv lub Moo Zoo
20 vim kuv yog lub Moo Zoo tus Tiam Lis nyob hauv cov saw hlau no. Nej thov Ntuj, kom kuv muaj cuab kav hais txog lub Moo Zoo, raws li kuv yuav tsum hais.
21 Kuv xav kom nej paub tias kuv ua dab tsi, thiab kuv nyob zoo li cas : Tws Sis Kos yuav qhia rau nej paub tib si. Tws Sis Kos yog tus kwv zoo nyiam, tus tsis hloov siab, uas nrog kuv, thiab pab kuv ua hauj lwm nyob hauv Huab Tais.
22 Kuv txhob txwm xa nws tuaj fi peb lub moo rau nej, thiab pab nej ua siab loj.
23 Kuv thov kom Leej Txiv Tswv Ntuj, thiab Huab Tais Yes Xus Pleev, pub kev thaj yeeb rau tsoom kwv tij, pub kev nyiam, thiab kev ntseeg.
Yog Tswv Ntuj lo Lus
Nkauj Cav Txog Lub Moo Zoo
NPN 112:1-2
As les lus yas. As les lus yas. Tus hwm Huab Tais thiab nyiam Huab Tais cov lus qhia, nws txoj hmoov zoo : Nws caj ce yuav muaj zog nyob ntiaj teb, ntuj yuav foom hmoov zoo rau haiv neeg siab ncaj. As les lus yas.
Ntawv Moo Zoo
Mas Tais 15:1-6
Koj yuav hwm yuav saib koj niam koj txiv.
Nej mloog ib zag nyob hauv leej ntshiab Mas Tais Ntawv Moo Zoo
1 Thaum ntawd, ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau Yes Xus tias :
2 "Vim li cas koj cov thwj tim hla cov yawg koob tej kab ke ? Vim thaum lawv noj mov, lawv tsis xub ntxuav tes ?"
3 Yes Xus teb rau lawv tias : "Ua cas nej hla Tswv Ntuj cov lus qhia vim tej qub kev cai ?
4 Tswv Ntuj twb hais tias : "Koj yuav hwm yuav saib koj niam koj txiv, tus hais phem txog nws niam nws txiv, yuav raug lub txim tuag."
5 Tab sis nej, mas nej hais tias tus twg hais rau nws niam nws txiv tias 'tej nyiaj txiag uas kuv yuav muab pab koj, kuv muab qee rau Ntuj lawm.'
6 Mas tus ntawd tsis tas yuav saib xyuas niam thiab txiv kuj tau. Nej muab nej tej kev cai los rhuav Tswv Ntuj lo lus.
Yog Huab Tais Yes Xus Lub Moo Zoo
