Zaj Nyeem Ib
Hauv Paus 2:4b-9,15
Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj.
Cov lus nyob hauv Ntawv Hauv Paus
4b Thaum lub caij Huab Tais Tswv Ntuj tsim lub ntiaj teb thiab lub ntuj,
5 tseem tsis tau muaj ib tug me yub ntoo, ib tug nroj tsuag tuaj li, vim Huab Tais Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av.
6 Tab sis muaj dej txhawv hauv av los ywg tas nrho daim npoo av.
7 Huab Tais Tswv Ntuj muab ib thooj av nplaum los puab ua tib neeg. Huab Tais Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia.
8 Huab Tais Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj.
9 Huab Tais Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.
15 Huab Tais Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj.
Yog Tswv Ntuj lo Lus
Nkauj Paj Nruag Txais Ntuj Lus
NPN 104: 1bc.14a; 14b-15; 20-21; 22-23; 24 (1bc)
Txais: Huab Tais, kuv tus Tswv Ntuj, Koj loj tas nrho !
1. Huab Tais, kuv tus Tswv Ntuj, koj loj tas nrho !
Koj hnav hwj chim ci ntsa iab : Koj ua kom nroj tsuag hlob los yug tsiaj,
ua kom neeg cov qoob loo hlob. Teb.
2. Kom neeg tau mov tawm nruab av los.
Koj ua cawv los nplij neeg lub siab,
ua roj los pleev neeg lub ntsej muag kom ci tshiab.
Koj ua kom mov ntxiv zog rau neeg lub plawv. Teb.
3. Koj tso plhuav kev tsaus ntuj nqes los, ces yog hmo ntuj,
yog lub caij tsiaj qus hauv hav xub tsuag nkag zom zaws.
Tsov ntxhuav nyooj laws caum nqaij taij nqaij taij hno ntawm Tswv Ntuj. Teb.
4. Thaum hnub tawm plaws tuaj,
cov tsov nyias mus nraim nyias,
lawv mus pw hauv lawv tej chaw nkaum.
Tib neeg tawm mus pib nws lub luag hauj lwm,
ua nws tej qoob loo txog tsaus ntuj. Teb.
5. Huab Tais, koj cov hauj lwm ntau ua luaj !
Koj tsim tas txhua yam raws kev thoob tsib,
cov tsiaj koj tsim los nyob puv tas ntiaj teb. Teb.
Zaj Nyeem Ob
Hauj Lwm 20:32-35
Nej paub tias yog kuv ob txhais tes no ua rau kuv thiab kuv cov phooj ywg noj xwb.
Cov lus nyob hauv Ntawv Hauj Lwm.
32 Muaj ib zaug, Paj Lug hais rau cov txwj laus nyob Es Fes Xos tias : Nyem no, kuv tso nej rau Tswv Ntuj thiab rau nws Lo Lus pub txiaj ntsim. Lo Lus ntawd muaj hwj huam txhim tau lub tuam tsev, thiab muaj hwj huam pub tau lub cuab tam rau cov ntshiab.
33 Kuv tsis tau ntshaw leej twg cov nyiaj, cov kub, los cov tsoos tsho.
34 Nej paub tias yog kuv ob txhais tes no ua rau kuv thiab kuv cov phooj ywg noj xwb.
35 Kuv ua txhij ua txhua li ntawd kom tau qhia nej tias peb yuav tsum khwv thiaj yuav pab tau cov tsis muaj zog, thiab peb tseem yuav nco ntsoov Huab Tais Yes Xus cov lus tias : "Thaum koj pub, koj muaj kev kaj siab ntau dua thaum koj tau txais."
Yog Tswv Ntuj lo Lus
Nkauj Cav Txog Lub Moo Zoo
Zam 15: 4a.5b
As les lus yas. As les lus yas. Huab Tais hais tias : nej nyob hauv Kuv, ib yam li Kuv nyob hauv nej. Tus uas nyob hauv Kuv, mas nws txi txiv ncw. As les lus yas.
Ntawv Moo Zoo
Mas Tais 25:14-30
Huab Tais, tsib nras nyiaj no yog koj muab rau kuv : hos ntawm no yog tsib nras uas kuv coj mus ntxeev tau paj ntxiv.”
Nej mloog ib zag nyob hauv leej ntshiab Mas Tais Ntawv Moo Zoo
14 Thaum ntawd, Yes Xus hais zaj paj lug no : Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev.
15 Nws muab tsib nras nyiaj rau thawj tug, muab ob nras rau tus ob, hos muab ib nras xwb rau tus peb. Nws muab rau lawv raws li lawv lub peev xwm, ces nws mus tawm rooj deb lawm. Tam sis ntawd,
16 tus uas tau txais tsib nras nyiaj, nqa cov nyiaj ntawd mus ntxeev, nws tau paj tsib nras ntxiv.
17 Tus tau txais ob nras kuj ua li ntawd thiab : nws tau paj ob nras ntxiv.
18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv.
19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj.
20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias : “Huab Tais, tsib nras nyiaj no yog koj muab rau kuv : hos ntawm no yog tsib nras uas kuv coj mus ntxeev tau paj ntxiv.”
21 Tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam tsawg, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.”
22 Ces tus tau txais ob nras tuaj txog, nws hais tias : “Huab Tais, ob nras nyiaj no yog koj muab rau kuv : hos ntawm no yog ob nras uas kuv coj mus ntxeev tau paj ntxiv.”
23 Nws tus tswv hais rau nws tias : “Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.”
24 Tus tub txib uas tau txais ib nras nyiaj xwb tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau.
25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.”
26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej teb uas kuv tsis tau tseb, thiab kuv sau qoob hauv tej chaw uas kuv tsis tau pov noob rau.
27 Tsim nyog koj yuav nqa kuv cov nyiaj mus rau cov tub ceev nyiaj. Thaum kuv rov los, kuv yuav tau kuv cov nyiaj nrog cov paj.
28 Nej rho nras nyiaj ntawm nws, nej muab rau tus uas muaj kaum nras lawm.
29 Vim tias Ntuj yuav pub rau tus uas twb muaj lawm, ces nws yuav tau ntau ntxiv. Hos tus uas tsis muaj, Ntuj yuav thau qhov me me uas nws muaj.
30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj : nyob ntawd yuav quaj tom hniav nkawv.”
Yog Huab Tais Yes Xus Lub Moo Zoo
