Zaj Nyeem Ib
Hauv Paus 1:14-18
Kom muaj tej lub ci ci nyob saum lub ntuj ntsuab saud, … cia ua tej lub cim xam hnub xam nyoog thiab suav hnub suav xyoo.
Cov lus nyob hauv Ntawv Hauv Paus
14 Tswv Ntuj hais tias : "Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo,
15 kom tej lub ci ci nyob saum lub ntuj ntsuab ua kom ntiaj teb pom kev." Ces txawm muaj li ntawd tuaj.
16 Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub.
17 Tswv Ntuj muab lawv txawb rau saum lub ntuj ntsuab saud kom ntiaj teb pom kev,
18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo.
Yog Tswv Ntuj lo Lus
Nkauj Paj Nruag Txais Ntuj Lus
NPN 37, 3-4; 5-6; 23-24; 25-26 (5)
Txais: Koj tig koj txoj hauv kev mus rau Huab Tais, Nws yuav lis dej num rau koj.
1. Koj tso siab rau Huab Tais,
koj ua qhov zoo,
koj yuav tau nyob hauv lub teb chaws,
tau ua neej nyob nyab xeeb.
Koj nrhiav kev kaj siab hauv Huab Tais,
nws yuav pub rau koj raws li koj lub siab thov. Teb.
2. Koj tig koj txoj hauv kev mus rau Huab Tais,
koj tso siab rau nws,
nws yuav lis dej num rau koj.
Nws yuav ua kom koj txoj kev ncaj ci li hauv ntuj ntsa,
ua kom koj txoj cai ncaj ziab li lub hnub thaum tav su. Teb.
3. Vim muaj Huab Tais pab,
neeg thiaj mus tau kev khov kho,
txoj kev nws taug xis nws siab.
Yog nws dawm taw,
nws tsis ntog,
vim Huab Tais tuav rawv nws tes. Teb.
4. Txij kuv yav hluas los txog hnub kuv laus,
kuv tsis pom Ntuj tso tus neeg ncaj pov tseg ib zaug li,
tsis pom nws cov xeeb ntxwv thov khawv noj.
Tus neeg ncaj niaj hnub hlub luag,
nws qiv rau luag,
nws cov xeeb ntxwv yog ib txog hmoov zoo. Teb.
Zaj Nyeem Ob
Fis Lis Pos 4:4-8
Nej yuav zoo siab mus li nyob hauv Huab Tais. Kuv rov hais dua tias nej zoo siab tiag mog !
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Fis Lis Pos
4 Kwv tij sawv daws, nej yuav zoo siab mus li nyob hauv Huab Tais. Kuv rov hais dua tias nej zoo siab tiag mog !
5 nej yuav ua kom sawv daws paub tias, nej txawj yuav luag siab, vim Huab Tais los txog ze lawm.
6 Nej tsis txhob txhawj dab tsi. Thaum nej thov Ntuj, thiab nej teev Ntuj, mas nej kuj yuav ua Ntuj tsaug. Thiab tej yam nej xav tau, nej yuav hais rau Tswv Ntuj paub.
7 Tswv Ntuj txoj kev thaj yeeb zoo tshaj qhov yus xav tau : nws txoj kev thaj yeeb yuav txuag nej lub siab thiab nej lub tswv yim kom nyob hauv Yes Xus Pleev.
8 Kwv tij sawv daws, tej yam muaj tsim, tej yam ncaj, tej yam huv, tej yam zoo nyiam, tej yam tsim nyog hwm, tas txhia yam zoo uas neeg ua thiab neeg cav txog, mas nej yuav ntshaw tas zog.
Yog Tswv Ntuj lo Lus
Nkauj Cav Txog Lub Moo Zoo
NPN 145:2
As les lus yas. As les lus yas. Kuv xav niaj hnub foom koob meej rau Tswv Ntuj, kuv xav cav lus zoo txog Koj lub npe mus ib txhiab ib txhis. As les lus yas.
Ntawv Moo Zoo
Mas Tais 6:25-34
Nej xub nrhiav nej Txiv lub Ceeb Tsheej thiab Nws txoj kev ncaj tso.
Nej mloog ib zag nyob hauv leej ntshiab Mas Tais Ntawv Moo Zoo
25 Muaj ib zaug, Yes Xus hais rau nws cov thwj tim tias : Nej txhob txhawj txog nej txoj sia tias yuav muab dab tsi los noj, txhob txhawj txog nej lub cev tias yuav muab dab tsi los hnav. Nej txoj sia tsis muaj nqi dua txhiam xws noj lod ? Nej lub cev tsis muaj nqi dua tej tsoos hnav lod ?
26 Nej ntsia cov noog saum ntuj saib : lawv tsis tseb nplej, tsis hlais nplej, tsis sau qoob rau hauv txhab, nej Txiv nyob saum ntuj pub rau lawv noj. Nej tsis muaj nqi dua cov noog ntawd lod ?
27 Nej leej twg txhawj txhawj, nws puas rub tau txoj sia kom ntev ib tshim ntxiv ?
28 Hais txog tej tsoos tsho, nej yuav txhawj dab tsi ? Nej ntsia cov paj ntoos nyob tom tej nras saib, lawv cia li hlob xwb ! Lawv tsis khwv, tsis ua maj ua ntuag.
29 Kuv hais rau nej, tab yog Xas Los Moos, thaum nws muaj koob meej nto moo lug, tsis kav nws tsis tau hnav zoo npaum li ib lub paj ntoos.
30 Tej nroj nruab nrag, hnub no ciaj, tag kis luag twb yuav muab pov hlawv hauv qhov txos, tsis kav Tswv Ntuj tseem muab zam zoo rau lawv hnav. Neeg ntseeg tsis ti txha, Tswv Ntuj tseem yuav tsis ua zoo tshaj rau nej lod ?
31 Nej txhob ua siab fab tias : 'Peb yuav muab dab tsi los noj ? Yuav muab dab tsi los haus ? Yuav muab dab tsi los hnav ?'
32 Tej ntawd, yog tas puas tsav yam uas cov neeg teev pej kum dab nrhiav. Hos nej Txiv nyob saum ntuj paub tias nej yuav tsum muaj tej ntawd huv si.
33 Nej xub nrhiav nej Txiv lub Ceeb Tsheej thiab nws txoj kev ncaj tso, ces Ntuj yuav pub tas puav tsav yam ntawd tib si ntxiv rau nej.
34 Nej txhob ua siab fab txog tag kis : tag kis mam li txhawj rau tag kis. Vim niaj hnub twb muaj kev iab kev khwv txaus ris thawm hnub lawm.
Yog Huab Tais Yes Xus Lub Moo Zoo
){kind=link}