THAJ TXI NTUJ THAWJ HNUB HAUV XYOO TSHIAB - Piv Txwv OB (Mùng Một Tết mẫu 2)

Zaj Nyeem Ib
His Xais 65:17-21
Kuv tsim cov txheej ntuj tshiab thiab ib lub ntiaj teb tshiab.
Cov lus nyob hauv ntawv yaj saub His Xais
¹⁷ Huab Tais hais li no : saib ntawm no, kuv tsim cov txheej ntuj tshiab thiab ib lub ntiaj teb tshiab. Yuav tsis nco txog yav tas los lawm. Yav tas lawd, yuav tsis ntsawv lub siab ntxiv.
¹⁸ Kuv tsim ib txog kev hom khaj mus ib txhiab ib txhis. Ntsia saib ! Kuv tsim Yes Lus Xas Les kom nws dhia hom khaj, kuv tsim nws tsoom pej xeem kom dhia zoo siab.
¹⁹ Kuv yuav dhia zoo siab cav txog Yes Lus Xas Les, yuav dhia hom khaj cav txog kuv haiv neeg. Nyob hauv Yes Lus Xas Les yuav hnov suab lom zem.
²⁰ Nyob Yes Lus Xas Les, yuav tsis muaj cov me nyuam mos yug los nyob ob peb hnub xwb. Tsis muaj ib tug neeg laus uas nyob tsis puv nws lub hnub nyoog. Tus tuag hluas tshaj, mas nws lub hnub nyoog twb puv ib puas xyoo. Tus nyob tsis puv ib puas xyoo yog vim nws raug tsawm.
²¹ Nyob Yes Lus Xas Les, lawv yuav txhim tsev rau lawv nyob. Lawv yuav cog ib co ntoo txiv cawv, lawv yuav tau noj cov txiv.
Yog Tswv Ntuj lo Lus

Nkauj Paj Nruag Txais Ntuj Lus
NPN 30: 2; 5-6; 11-12; 13 (2a)

Txais: Huab Tais kuv cav lus zoo txog koj, vim koj rub kuv tawm hauv lub qhov tim thaj.

1. Huab Tais kuv cav lus zoo txog koj,
vim koj rub kuv tawm hauv lub qhov tim thaj,
koj tsis cia kuv ua yeeb ncuab lub chaw zoo siab. Teb.

2. Cov ntseeg Huab Tais, nej hu nkauj rau nws,
nej nqaum paj nqaum nruas cav txog nws lub siab ntshiab :
Nws npau taws, tsuas npau ib pliag,
nws hlub neeg, nws hlub ib sid.
Hmo ntuj kua muag poob tsis tu, tab sis,
kaj ntug txoog lub suab zoo siab rov ntxhe dua. Teb.

3. Huab Tais, koj mloog mas ! Thov koj hlub !
Huab Tais, thov koj pab kuv!"
Koj muab kuv lub caij quaj nyiav los hloov ua caij dhia lom zem,
koj muab kuv tsoos ntaub tsaj hloov ua tsoos nqaum paj nqaum nruas. Teb.

4. Li ntawd, kuv tus ntsuj plig hu nkauj tsis so;
Huab Tais, kuv tus Tswv Ntuj,
kuv yuav ua koj tsaug mus li. Teb.

Zaj Nyeem Ob
Qhib Yav Tom Ntej 21:1-6
Ces kuv pom ib lub ntuj tshiab thiab ib lub ntiaj teb tshiab.
Cov lus nyob hauv Ntawv Qhib Yav Tom Ntej
¹ Kuv yog Zam, ces kuv pom ib lub ntuj tshiab thiab ib lub ntiaj teb tshiab. Vim tias thawj lub ntuj thiab thawj lub ntiaj teb ploj tas lawm. Hiav txwv kuj tsis nyob ntxiv lawm.
² Ces kuv pom lub nroog Ntshiab, uas yog Yes Lus Xas Les tshiab nqes saum ntuj, pem Tswv Ntuj los. Nws ua zam sees xws li tus nkauj nyab ntim zam tos nraug vauv.
³ Kuv hnov ib lub suab tuaj ntawm lub theej kiab tuaj tias : “Saib ! Tswv Ntuj lub tsev los nrog neeg nyob : Tswv Ntuj yuav nrog lawv nyob ! Lawv yuav yog nws haiv neeg. Tswv Ntuj yuav nrog lawv nyob.
⁴ Nws yuav so txhua lub kua muag ntws ntawm lawv qhov muag. Yuav tsis muaj kev tuag ntxiv. Yuav tsis muaj kev quaj kev nyiav, kev ntsaj, kev mob ntxiv. Vim tas txhua yam muaj sia uas tau xub tshwm sim los, puav leej ploj tas huv tib si lawm.”
⁵ Ces tus zaum saum lub theej kiab hais tias : “Nej saib ! Kuv tsim dua txhua tsav txhua yam tshiab.” Thiab nws hais tias : “Koj sau qhov no cia mog. Vim cov lus no yog lus pheej xeeb thiab lus tseeb.”
⁶ Ces nws hais rau kuv tias : “Ua tiav tas lawm. Kuv yog As Fas thiab Os Mes Nkas, yog lub hauv paus thiab lub ntsis. Tus twg nqhis, mas kuv yuav muab cov dej uas txhawv hauv lub qhov dej muaj txoj sia pub dawb rau nws.
Yog Tswv Ntuj lo Lus

Nkauj Cav Txog Lub Moo Zoo
1 Zam 2:5
As les lus yas. As les lus yas. Tus coj Leej Pleev lo lus, mas txoj kev nyiam Tswv Ntuj hlob tiav nyob hauv nws. As les lus yas.

Ntawv Moo Zoo
Mas Tais 5:43-48
Nej yuav ua neeg zoo tshaj, vim nej Txiv nyob saum ntuj yog tus zoo tshaj.
Nej mloog ib zag nyob hauv leej ntshiab Mas Tais Ntawv Moo Zoo
⁴³ Tseem muaj ib hnub, Yes Xus hais rau nws cov thwj tim tias : "Nej hnov tej lus qhia tias : Koj yuav nyiam tus nyob ze koj, koj yuav ntxub koj tus yeeb ncuab.
⁴⁴ Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ;
⁴⁵ nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus.
⁴⁶ Yog nej nyiam cov neeg nyiam nej, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd.
⁴⁷ Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd.
⁴⁸ Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.
Yog Huab Tais Yes Xus Lub Moo Zoo