Zaj Nyeem Ib
Xam Phaj 6:22-27
Thov kom Huab Tais foom hmoov zoo rau koj thiab pov hwm koj !
Cov lus nyob hauv Ntawv Xam Phaj
22 Huab Tais hais cov lus no rau Mais Xes :
23 "Koj hais lus rau As Loos thiab nws cov tub, koj hais rau lawv tias : Nej yuav foom hmoov zoo rau cov His Xas Lais, nej yuav foom lus zoo li no rau lawv :
24 'Thov kom Huab Tais foom hmoov zoo rau koj thiab pov hwm koj !
25 Thov kom Huab Tais lub ntsej muag ci ntsa iab rau saum koj thiab pub nws lub txiaj lub ntsim rau koj !
26 Thov kom Huab Tais qhib nws lub ntsej muag rau koj pom thiab pub kev thaj yeeb rau koj !'
27 Koj qhia kom lawv siv kuv lub npe rau saum cov His Xas Lais li no, ces kuv yuav foom hmoov zoo rau lawv."
Yog Tswv Ntuj lo Lus
Txais Ntuj Lus
NPN 121: 1-2 ; 3.4 ; 5-6 ; 7-8 (2)
Txais: Txoj kev pab kuv tuaj ntawm Huab Tais tuaj, tuaj ntawm tus tsim lub ntuj lub teb tuaj.
1. Kuv tsa muag ntsia toj roob hauv pes saib :
Txoj kev pab kuv yuav tuaj qhov twg tuaj ?
Txoj kev pab kuv tuaj ntawm Huab Tais tuaj,
tuaj ntawm tus tsim lub ntuj lub teb tuaj. Teb.
2. Thov kom nws txhob cia koj txhais taw qaij,
kom tus zov koj, txhob qaug dab ntub !
Tus zov His Xas Lais,
tsis qaug dab ntub tsis tsaug zog. Teb.
3. Huab Tais yog tus zov koj,
Huab Tais yog tus duab ntxoov ntxoo roos koj.
Nws nyob ntawm koj sab xis.
Nruab hnub, lub hnub yuav tsis ntaiv koj,
hmo ntuj, lub hli yuav tsis dub rau koj. Teb.
4. Huab Tais yuav txuag koj ntawm txhua hom kev phem.
Nws yuav txuag koj txoj sia.
Huab Tais yuav zov koj,
thaum koj mus thiab thaum koj los.
Nws zov koj nyem no mus ib txhiab ib txhis. Teb.
Zaj Nyeem Ob
1 Tes Xas Los Nis 5:16-26.28
Nej teev Ntuj tsis tseg. Tab txawm muaj xwm dab tsi tshwm sim tuaj, los nej yuav ua Ntuj tsaug mus li.
Cov lus nyob hauv leej ntshiab Paj Lug thawj tsab ntawv sau tuaj rau cov ntseeg nyob Tes Xas Los Nis
16 Kwv tij sawv daws, nej ua siab kaj lug mus li.
17 Nej teev Ntuj tsis tseg.
18 Tab txawm muaj xwm dab tsi tshwm sim tuaj, los nej yuav ua Ntuj tsaug mus li. Tswv Ntuj lub siab xav kom nej ua li ntawd nyob hauv Yes Xus Pleev.
19 Nej txhob tua Leej Ntuj Plig xws li tua teeb.
20 Nej txhob thuam lub txiaj ntsim ua Yaj Saub.
21 Nej hnov yam twg, mas nej tshuaj saib puas tseeb tso : yam twg zoo, mas nej khaws tseg.
22 Nej caiv txhua txoj kev phem mog.
23 Thov kom tus Tswv Ntuj siab kaj lug ua kom nej ntshiab tuaj. Thov kom nej txuag tau nej lub tswv yim, nej tus plig, kom nej lub cev txhob muaj chaw xyeej, mus txog lub caij peb tus Huab Tais Yes Xus Pleev rov los.
24 Tus hu nej, nws pheej xeeb : nws yuav ua xws li kuv hais saum no.
25 Kuv cov kwv tij, nej thov Ntuj rau peb thiab.
26 Nej xa peb cov lus hmov tshua mus rau cov kwv tij huv tib si ; nej sawv peb chaw nwj lawv hauv txoj kev ntshiab.
28 Thov kom peb tus Huab Tais Yes Xus Pleev lub txiaj ntsim nrog nej nyob.
Yog Tswv Ntuj lo Lus
Nkauj Cav Txog Lub Moo Zoo
Lus Kas 11:28
As les lus yas. As les lus yas. Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv haj yam tau txoj hmoov zoo. As les lus yas.
Ntawv Moo Zoo
Mas Tais 5:1-10
Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
Nej mloog ib zag nyob hauv leej ntshiab Mas Tais Ntawv Moo Zoo
1 Tseem muaj ib hnub, Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus.
2 Ces Yes Xus tsa ncauj qhia lawv hais tias :
3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug.
5 Cov tau txoj hmoov zoo, yog cov quaj ntsuag, vim Ntuj yuav nplij lawv.
6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis.
7 Cov tau txoj hmoov zoo, yog cov hlub luag tej, vim Ntuj yuav hlub lawv.
8 Cov tau txoj hmoov zoo, yog cov siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.
10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.
Yog Huab Tais Yes Xus Lub Moo Zoo
