Zaj Nyeem Ib
His Xais 63:7-9
Kuv yuav nco ntsoov Huab Tais lub siab zoo vim Nws tau pub nplua mias li nws kev khuv leej thiab nws lub siab zoo.
Cov lus nyob hauv ntawv yaj saub His Xais
7 Kuv yuav nco ntsoov Huab Tais lub siab zoo kev qhuas Huab Tais tam ntua txhua yam Huab Tais pauj rau peb nco lug rau His Xas Lais tsev uas Nws tau pub nplua mias li Nws kev khuv leej thiab Nws lub siab zoo.
8 Nws hais tias : tseeb, lawv yog kuv haiv neeg, ib co tub ki tsis dag ; nws yog lawv ib tug cawm,
9 tag lawv kev txhawj xeeb ; tsis yog tus sawv nws pliaj plhu, nws yog tus cawm lawv vim nws kev hlub kev khuv leej, nws tau txhiv lawv, nws tau thiaj tau nqa lawv txhua hnub yav tas los.
Yog Tswv Ntuj lo Lus
Txais Ntuj Lus
NPN 136:1.3 ; 4.23 ;25-26
Txais: Huab Tais lub siab hlub nyob tas ib txhiab ib txhis.
1. Nej cav lus zoo txog Huab Tais,
nws siab zoo vim nws lub siab hlub nyob tas ib txhiab ib txhis.
Nej cav lus zoo txog tus Huab Tais kav tas tsoom huab tais,
vim nws lub siab hlub nyob tas ib txhiab ib txhis. Teb.
2. Nws tib leeg ua cov hauj lwm loj zoo nkauj zoo saib,
vim nws lub siab hlub nyob tas ib txhiab ib txhis.
Thaum peb poob qis, nws nco txog peb,
vim nws lub siab hlub nyob tas ib txhiab ib txhis. Teb.
3. Nws muab mov pub rau txhua tus muaj lub cev nqaij,
vim nws lub siab hlub nyob tas ib txhiab ib txhis.
Nej cav lus zoo txog tus Tswv Ntuj nyob txheej ntuj saud
vim nws lub siab hlub nyob tas ib txhiab ib txhis. Teb.
Zaj Nyeem Ob
1 Kos Lis Nthos 1:3-9
Peb tos peb tus Huab Tais Yes Xus Pleev yuav tawm los rau pom xyeem.
Cov lus nyob hauv leej ntshiab Paj Lug thawj tsab ntawv sau tuaj rau cov ntseeg nyob Kos Lis Nthos
3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej.
4 Kuv ua Tswv Ntuj tsaug tsis tseg, vim lub txiaj ntsim uas Tswv Ntuj tau pub rau nej, nyob hauv Yes Xus Pleev.
5 Vim nej nplua nuj nyob hauv Yes Xus : nej tau Lo Lus muaj nqe li nyiaj, nej tau zaj txuj ci muaj nqe li kub,
6 vim li ntawd, nej tej hauj lwm ua Leej Pleev tim khawv muaj zog tuaj.
7 Tsis tshuav ib lub txiaj ntsim uas nej tsis tau txais, thaum nej tos peb tus Huab Tais Yes Xus Pleev yuav tawm los rau pom xyeem.
8 Nws yuav ua kom nej nyob ruaj nreb txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej.
9 Tswv Ntuj yog tus pheej xeeb : yog nws hu nej kom los nrog nws Leej Tub, peb tus Huab Tais Yes Xus Pleev koom ib txog hmoov.
Yog Tswv Ntuj lo Lus
Nkauj Cav Txog Lub Moo Zoo
Lus Kas 1:49
As les lus yas. As les lus yas. Tus Muaj Hwj Huam ua tej yam loj rau kuv, Nws lub npe Ntshiab. As les lus yas.
Ntawv Moo Zoo
Lus Kas 1:39-55
Tus Muaj Hwj Huam ua tej yam loj rau kuv, Nws tsa cov neeg hauv txheej qis kom siab.
Nej mloog ib zag nyob hauv leej ntshiab Lus Kas Ntawv Moo Zoo
39 Lub caij ntawd, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das.
40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes.
41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes.
42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.
43 Ua cas Ntuj thiaj pub kom kuv tus Huab Tais leej niam tuaj xyuas kuv ?
44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab.
45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"
46 Ces Mab Liab hais tias : "Kuv tus plig cav txog Huab Tais lub hwj chim,
47 kuv lub tswv yim hom khaj nyob hauv Tswv Ntuj, tus Cawm kuv,
48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo,
49 vim tus Muaj Hwj Huam ua tej yam loj rau kuv, nws lub npe Ntshiab.
50 Nws lub siab hlub roos cov neeg hwm nws tiam dhau tiam.
51 Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg.
52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab.
53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav.
54 Huab Tais pab nws tus tub txib His Xas Lais, vim nws nco ntsoov tias nws lub siab hlub neeg,
55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis."
Yog Huab Tais Yes Xus Lub Moo Zoo
