HNUB CHIV NQAUM NPLOOJ XYOO C (CN Lễ Lá năm C)

UA COV KAB KE NQAUM NPLOOJ
Lus Kas 19:28-40

Nej mloog ib zag nyob hauv Lus Kas Ntawv Moo Zoo

Thaum Yes Xus hais cov lus ntawd tas,
nws mus pem Yes Lus Xas Les.
Nws mus kev ua ntej.
Thaum nws tuaj yuav txog Npes Fas Zes thiab Npes Tas Nias,
ze lub roob uas hu ua Roob Txiv Ntoo Roj,
nws xa ob tug thwj tim mus,
nws hais tias :
"Neb mus hauv lub zos uas nyob tom hauv ntej tod.
Thaum neb chaws mus hauv zos,
neb yuav pom ib tug me nyuam luj uas luag muab khi cia,
tsis tau muaj neeg caij ib zaug li.
Neb daws hlua, neb cab los.
Yog muaj neeg nug neb tias :
'Vim li cas neb daws tus me nyuam luj hlua ?'
Neb yuav hais li no :
'Yog vim Huab Tais yuav siv."
Ob tub thwj tim mus,
nkawd pom raws nraim li Yes Xus tau hais rau nkawd.
Thaum nkawd tab tom daws tus me nyuam luj txoj hlua,
cov tswv luj hais rau nkawd tias :
"Neb daws tus me nyuam luj ua dab tsi ?"
Nkawd hais tias :
"Yog vim Huab Tais yuav siv."
Ces nkawd cab los rau Yes Xus.
Nkawd muab nkawd cov tsho ntev pov mus pua me nyuam luj nraub qaum,
nkawd kom Yes Xus caij.
Thaum Yes Xus caij tus me nyuam luj mus,
mas tsoom neeg muab lawv cov tsho ntev pua txoj kev.
Thaum Yes Xus yuav nqes phab toj saum Roob Txiv Ntoo Roj,
ces ib tsoom thwj tim coob coob,
zoo siab,
lawv pib cav txog Tswv Ntuj nrov nrov rau tej hwj huam yees ntxwv uas lawv tau pom tas huv tib si.
Lawv hais tias :
Tus Vaj uas Huab Tais xa tuaj nto koob meej.
Nyob saum ntuj muaj kev thaj yeeb.
Nyob saum cov txheej ntuj siab,
yog lub koob meej."
Nyob hauv cov neeg ntawd,
muaj ib co Fas Lis Xais hais rau Yes Xus tias :
"Xib Hwb, koj qhuab ntuas koj cov thwj tim mas !"
Yes Xus teb rau lawv tias :
"Kuv hais rau nej :
Yog lawv cov no tswm seeb,
mas cov pob zeb yuav qw."

Yog Huab Tais Yes Xus Lub Moo Zoo

UA THAJ TXI NTUJ

Zaj Nyeem Ib
His Xais 50: 4-7

Cov lus nyob hauv Ntawv His Xais

Huab Tais Tswv Ntuj tau muab cov thwj tim tus nplaig rau kuv.
Nws qhia kuv kom kuv txawj hais ib lo lus nplij tus qaug zog.
Niaj tag kis nws tsa kuv pob ntseg kom kuv tsim dheev,
kom kuv mloog xws li cov thwj tim mloog.
Huab Tais Tswv Ntuj qhib kuv pob ntseg,
mas kuv tsis npau taws,
kuv tsis yig,
kuv tsis thaub qab.
Lawv ntaus kuv,
mas kuv tig kuv nraub qaum rau lawv ntaus.
Lawv xav rho kuv cov hwj txwv,
mas kuv tig kuv sab plhu rau lawv.
Lawv xav ib tawg ncuav rau kuv thiab xav nto qaub ncaug rau kuv ntsej muag,
los kuv tsis fee plhu rau lawv.
Tab sis Huab Tais Tswv Ntuj tsom kwm kuv,
vim qhov ntawd mas kuv tsis poob ntsej muag.
Ces kuv ua kuv ntsej muag tawv li pob zeb.
Kuv paub tias kuv yuav tsis raug kev txaj muag.

Yog Tswv Ntuj lo Lus

Nkauj Paj Nruag Txais Ntuj Lus
NPN 22:8-9,17-18,19-20,23-24(2a)

Txais: Kuv tus Huab Tais, kuv tus Tswv Ntuj ! Ua cas Koj tso kuv pov tseg ?
(Nqua Suab Cav Txog Tswv Ntuj, 17)

1. Leej twg pom kuv,
lawv thuam kuv,
lawv luag kuv.
Lawv co taub hau hnyos kuv tias:
“Nws tso siab rau Huab Tais,
cia Huab Tais npo nws.
Nws nyiam Huab Tais,
cia Huab Tais cawm nws mas !” Teb.

2. Lawv zoo li pab dev sawv ncig kuv;
Cov neeg phem ntawd puav kuv kev,
lawv nkaug kuv tej tes taw.
Kuv suav tau kuv cov pob txha tas tib si. Teb.

3. Lawv muab kuv cov khaub ncaws los sib faib,
Lawv twv saib leej twg yuav tau kuv cov ris tsho.
Huab Tais,
thov Koj txhob txav mus deb kuv!
Koj yog kuv lub zog,
Koj tsuag tsuag tuaj pap kuv mas ! Teb.

4. Kuv yuav tshaj Koj lub npe rau kuv cov kwv tij.
Kuv yuav cav txog Koj hauv nruab nrab lub txoos.
Nej cov uas hwm Huab Tais,
nej cav lus zoo txog nws mog.
Yas Kos tsoom tub ki,
nej cav txog nws lub koob meej !
His Xas Lais tsoom tub ki,
nej hwm nws mog ! Teb.

Zaj Nyeem Ob
Fis Lis Pos 2:6-11

Cov lus nyob hauv Fis Lis Pos Tsab Ntawv

Kwv tij sawv daws,
Yes Xus Pleev yog Tswv Ntuj,
tiam sis nws tsis cia nws lub hwj chim Tswv Ntuj rau luag hawm:
nws muab nws lub hwj chim hle.
Nws yeem ua ib tug qhev,
nws yug los ua neeg xws li ib tsoom neeg.
Luag pom nws tus yam ntxwv yog yam ntxwv tib neeg.
Nws txo nws qis:
nws tuaj yeem mloog Ntuj lus mus txog qhov tuag,
thiab tseem xaiv txoj kev tuag saum ntoo cuam.
Vim li ntawd,
mas Tswv Ntuj thiaj tsa Yes Xus ua ib tug loj nyob siab siab.
Tswv Ntuj muab lub npe uas nyob siab dua lwm cov npe rau nws.
Li ntawd,
tus twg hnov tuav txog Yes Xus lub npe,
tsis hais nyob saum cov txheej ntuj,
los nyob ntiaj teb no,
los nyob nruab yeeb,
mas tus ntawd cia li txhos caug hawm.
Txhua xeem lus yuav tsum cav tias Yes Xus Pleev yog Huab Tais:
Leej Txiv Tswv Ntuj thiaj muaj koob meej nto moo lug.

Yog Tswv Ntuj lo Lus

Nkauj Cav Txog Lub Moo Zoo
Fis Lis Pos 2:8-9

Yes Xus Pleev,
peb cav txog Koj !
Koj yog tus vaj muaj koob meej nto moo lug.
Yes Xus Pleev tuaj yeem mloog Tswv Ntuj lus mus txog qhov tuag thiab nws tseem xaiv txoj kev tuag nyob saum tus ntoo cuam.
(Nqua Suab Cav Txog Tswv Ntuj, 239, nqe 11a)

Ntawv Moo Zoo
Lus Kas 22:14-23:56

Huab Tais Yes Xus Kev Txom Nyem, raws li Lus Kas Ntawv Moo Zoo

P Thaum txog caij lawm, Yes Xus mus zaum ntawm rooj mov, cov Hauv Paus Xa Lus kuj nrog nws zaum thiab. Yes Xus hais rau lawv tias :
+ "Kuv xav nrog nej noj pluas Hla no kawg, kuv mam li mus txais kev tsim txom. Kuv hais rau nej : txij no mus kuv yuav tsis tau noj rooj qav Hla mus txog thaum lub Ntees Hla tiav tas nyob hauv Tswv Ntuj lub Ceeb Tsheej."
P Yes Xus tuav ib lub ntim, nws ua Ntuj tsaug tas, nws hais tias :
+ "Nej txais qhov no, nej sib faib haus. Kuv hais rau nej, txij no mus kuv yuav tsis haus kua txiv cawv mus txog thaum Tswv Ntuj lub Ceeb Tsheej los txog."
P Yes Xus tuav lub ncuav mov, nws ua Ntuj tsaug, nws muab ntais, nws cev rau lawv, nws hais tias :
+ "Qhov no yog kuv lub cev, uas kuv muab pub rau nej. Nej ua qho no kom nej nco txog kuv."
P Noj hmo tas, Yes Xus kuj tuav lub ntim ib yam li ntawd thiab, nws hais tias :
+ "Lub ntim no yog kev Cog Lus Tshiab hauv kuv cov ntshav, yog cov ntshav nchuav los cawm nej." Saib, tus uas muab kuv muag nrog kuv nyob ua ke, nws txhais tes nyob saum lub rooj mov no. Txawm tias Neeg Leej Tub taug nws txoj kev raws li Ntawv sau tseg, tsis kav, tus neeg uas muab nws muag tau txoj hmoov phem !"
P Ces lawv pib sib nug saib yog leej twg yuav ua li ntawd . Cov thwj tim tseem muaj lus sib cav saib nyob hauv lawv leej twg yog tus loj dua cov. Yes Xus hais rau lawv tias :
+ "Tsoom kuj cuab cov vaj tswj lawv. Cov muaj hwj huam uas kav cov kuj cuab, kom luag hu lawv ua niam txiv pov hwm. Hos nej, mas tsis yog li ntawd. Tus loj dua cov nyob hauv nej yuav ua tus hluas dua cov. Tus tswj yuav ua tus tsob hwb. Leej twg yog tus loj dua, puas yog tus zaum ntawm rooj mov los yog tus nqa zaub nqa mov ? Tsis yog tus zaum ntawm rooj mov lod ? Hos kuv, mas kuv nyob hauv nruab nrab nej xws li tus tsob hwb !" “Nej yog cov uas nrog nraim kuv thaum kuv raug kev sim siab. Kuv muaj ib lub Ceeb Tsheej uas kuv muab pub rau nej, ib yam li kuv Txiv tau pub rau kuv, kom nyob hauv kuv lub Ceeb Tsheej, nej noj thiab nej haus saum kuv lub rooj, thiab kom nej zaum saum ib co theej kiab txiav txim rau kaum ob lub xeem His Xas Lais.” "Xis Moos, Xis Moos, saib, Xas Tas taij kom tau muab nej tshau hauv vab tshaus xws li tshau hmoov nplej. Tab sis kuv thov Ntuj rau koj lawm, kom koj lub siab ntseeg txhob qaug. Hos koj, thaum koj rov qab los, koj yuav pab koj cov kwv tij kom lawv lub siab ruaj.
P Xis Moos hais rau Yes Xus tias :
L "Huab Tais, kuv tuaj yeem nrog koj mus nyob hauv tsev loj faj, thiab nrog koj tuag."
P Yes Xus hais tias :
+ "Pob Zeb, kuv hais rau koj : Hnub no, thaum qaib tsis tau qua, koj twb yuav tsis lees peb zaug tias koj paub kuv ."
P Yes Xus hais rau cov thwj tim tias :
+ "Thaum kuv xa nej mus, nej tsis nqa nas nyiaj, tsis nqa hnab, tsis nqa khau. Nej puas tshaib nqhis dab tsi ?’
P Lawv hais tias :
L "Tsis tau tshaib tsis tau nqhis dab tsi."
P Yes Xus hais rau lawv tias :
+ "Hos zaum no, mas tus muaj nas nyiaj, kom nws nqa. Tus muaj hnab, kom nws ris. Tus tsis muaj riam, nws yuav muag nws lub tsho ntev, kom muas tau ib rab riam. Kuv hais rau nej tias, qhov uas Ntawv sau txog kuv, yuav tsum tshwm sim kom tiav. Vim Ntawv sau lo lus no tseg tias : 'Luag suav nws nrog cov tsis mloog txoj cai,' ces tas txhia yam uas hais txog kuv, yuav tiav nto ntsis."
P Cov thwj tim hais tias :
L "Huab Tais, nyob ntawm no, muaj ob rab ntaj."
P Yes Xus hais tias :
+ "Txaus lawm."
P Yes Xus tawm mus pem lub Roob Txiv Ntoo Roj, xws li nws ua kam. Nws cov thwj tim kuj raws nws mus thiab.
(Sawv daws zaum)
Yes Xus tuaj txog qhov chaw ntawd, nws hais rau cov thwj tim tias :
+ "Nej teev Ntuj mog, kom nej txhob swb txoj kev ntxias."
P Ces Yes Xus ncaim ntawm lawv rau ib qho, kwv yees deb li txawb ib pob zeb. Yes Xus txhos caug, nws teev Ntuj. Nws hais tias :
+ "Txiv, yog koj pom zoo, thov koj tshem lub ntim no mus deb kuv. Tab sis, koj txhob ua raws li kuv xav. Koj ua raws li koj xav."
P Ces ib tug Tub Xo nqes saum ntuj los rau nws pom, pab nws ua siab loj. Thaum ntawd, Yes Xus txhawj kawg. Nws teev Ntuj heev dua, nws tawm tej cev hws xws li tej tee ntshav nrog rau hauv pem teb. Yes Xus teev Ntuj tas, nws sawv los cuag cov thwj tim, nws pom lawv tsaug zog vim lawv tu siab. Ces Yes Xus hais rau lawv tias :
+ "Vim li cas nej tsaug zog ? Nej sawv, nej teev Ntuj kom nej txhob swb txoj kev ntxias."
P Thaum Yes Xus tseem hais lus, ib sij huam, ib pab neeg tuaj txog. Tus ua lawv ntej, yog tus hu ua Yus Das, nws yog ib tug hauv Pab Kaum Ob. Yus Das txav los ze Yes Xus, nws nwj Yes Xus. Ces Yes Xus hais rau nws tias :
+ "Yus Das, koj nwj Neeg Leej Tub kom tau muab nws rau luag ntes lod ?"
P Thaum cov nyob ncig Yes Xus pom tias luag tuaj ua dab tsi, ces lawv nug tias :
L "Huab Tais, peb puas xuas ntaj tua lawv ?"
P Ces cov nrog Yes Xus muaj ib tug, tib ntag rau tus Tuam Leej Choj tus qhev, txiav raug nws sab pob ntseg xis tu nrho. Tab sis Yes Xus qhib ncauj hais tias :
+ "Tsum li no."
P Yes Xus kov tus qhev yav pob ntseg, kho nws zoo hlo. Ces Yes Xus hais rau cov Thawj Leej Choj, cov thawj zov keeb saib lub Tuam Tsev Teev Ntuj thiab cov txwj laus uas tuaj ntes nws tias :
+ "Nej nqa ntaj nqa qws tawm tuaj ntes kuv xws li ntes ib tug tub sab. Kuv niaj hnub nrog nej nyob hauv lub Tuam Tsev Teev Ntuj, nej ho tsis cev tes ntes kuv. Tab sis, nyem no, yog nej lub sij hawm thiab yog Kev Tsaus Ntuj lub hwj huam."
P Lawv ntes Yes Xus, lawv coj nws mus. Lawv coj nws mus hauv tus Tuam Leej Choj lub tsev. Pob Zeb raws qab deb. Thaum lawv rauv tau taws rau hauv nruab nrab lub tshav loog, lawv sawv daws zaum ncig, Pob Zeb kuj nrog lawv zaum thiab. Ib tug ntxhais txib pom Pob Zeb zaum ze lub cub tawg, nws ntsia ntsoov Pob Zeb, ces nws hais tias :
L "Tus neeg ntawd nrog Yes Xus thiab."
P Tab sis Pob Zeb tsis lees, nws hais tias :
L "Phauj, kuv tsis paub tus ntawd."
P Ib me ntsis tom qab, muaj dua ib tug neeg pom Pob Zeb, nws hais tias :
L "Koj yog lawv ib tug thiab."
P Tab sis Pob Zeb hais tias :
L "Npawg, kuv tsis yog."
P Kwv yees li ib teev tom qab, tseem muaj dua ib tug hais tsis tseg tias :
L "Muaj tseeb tiag, tus neeg ntawd yog ib tug nrog Yes Xus, nws twb yog neeg Nkas Lis Lais."
P Tab sis Pob Zeb hais tias :
L "Yawg, kuv tsis paub xyov koj hais dab tsi !"
P Lub sij hawm uas Pob Zeb tseem hais lus ntawd, ces ib tug qaib qua. Huab Tais tig los ntsia Pob Zeb. Ces Pob Zeb nco txog Huab Tais lo lus uas nws hais rau Pob Zeb tias : "Hnub no, thaum qaib tsis tau qua, koj yuav tsis lees kuv peb zaug." Ces Pob Zeb tawm mus nraum zoov, nws quaj, nws tu siab kawg. Thaum ntawd, cov neeg zov Yes Xus thuam nws thiab ntaus nws. Lawv muab ib daim ntaub npog Yes Xus ntsej muag, lawv nug nws tias :
L "Ua yaj saub saib, tus ntaus koj yog leej twg ?"
P Lawv tseem hais ntau lo lus thuam Yes Xus. Thaum kaj ntug, pej xeem cov txwj laus, nrog cov Thawj Leej Choj thiab cov Kws Ntawv Ntshiab sib sau ua rooj sab laj. Lawv coj Yes Xus mus rau lub rooj txwj laus Xas Nes Nrees. Lawv hais rau Yes Xus tias :
L "Saib koj yog Leej Pleev no, mas koj qhia peb."
P Yes Xus hais rau lawv tias :
+ "Yog kuv hais qhia nej, los nej yuav tsis ntseeg. Yog kuv nug nej, los nej yuav tsis teb. Txij no mus, Neeg Leej Tub yuav zaum ntawm Tswv Ntuj lub hwj huam sab xis."
P Ces tas lawv sawv daws hais tias :
L "Ua li mas koj yog Tswv ntuj Leej Tub puas tiag lod ?"
P Yes Xus hais rau lawv tias :
+ "Nej hais nej tias : kuv yog."
P Ces lawv hais tias :
L "Peb tseem yuav nrhiav tim khawv ua dab tsi ? Peb twb hnov kiag ntawm nws lub ncauj lawm."
P Tas cov neeg tuaj sib txoos ntawd ib txhij sawv tsees, lawv coj Yes Xus mus rau Pis Las Tos. Lawv pib liam rau Yes Xus tias :
L "Peb pom tus neeg ntawd cob peb haiv neeg kom ua phem. Nws txwv tsis pub them se rau Xes Ntxas, thiab nws hais tias nws yog tus Vaj Pleev."
P Pis Las Tos nug Yes Xus tias :
L "Koj puas yog cov Yus Das tus vaj ?"
P Yes Xus teb tias :
+ "Yog koj hais li ntawd."
P Ces Pis Las Tos hais rau cov Thawj Leej Choj thiab rau tsoom sid tias :
L "Kuv tsis pom ib lub txim nyob hauv tus neeg no."
P Tsis kav, lawv hais tsis tseg tias :
L "Nws haub tsoom pej xeem kom ntxeev siab. Nws pib qhia hauv Nkas Lis Lais mus thoob xeev Yus Das, tuaj txog ntawm no."
P Thaum Pis Las Tos hnov hais li ntawd, nws nug saib Yes Xus puas yog neeg Nkas Lis Lais. Thaum Pis Las Tos paub tias Yes Xus zwm rau Hes Los, ces nws xa Yes Xus mus rau Hes Los. Vim lub caij ntawd Hes Los kuj tuaj nyob Yes Lus Xas Les thiab. Thaum Hes Los pom Yes Xus, nws zoo siab heev. Tau ntev los lawm, Hes Los ntshaw pom Yes Xus vim tej yam nws hnov luag hais txog Yes Xus, thiab nws vam tias Yes Xus yuav ua tej zaj hwj huam. Ces Hes Los nug Yes Xus txog ntau yam, tab sis Yes Xus tsis teb dab tsi rau Hes Los. Cov Thawj Leej Choj thiab cov Kws Ntawv Ntshiab kuj sawv ntsug nyob ntawd thiab, lawv liam heev kawg rau Yes Xus. Hes Los nrog nws cov zov keeb thuam thiab ua ntau yam tub qaug Yes Xus. Lawv muab ib lub tsho zoo nkauj rau Yes Xus hnav, ces lawv xa nws rov mus rau Pis Las Tos. Txij hnub ntawd los, Hes Los thiab Pis Las Tos nkawd ua phooj ywg, hos yav thaud mas nkawd sib ntxub. Pis Las Tos hu cov Thawj Leej Choj, cov nom, thiab cov pej xeem tuaj, nws hais rau lawv tias :
L "Nej coj tus neeg no tuaj rau kuv, xws li ib tug haub pej xeem kom ntxeev siab. Nyem no, kuv nug nws nyob ntawm nej xub ntiag, kuv tsis pom nws muaj txim xws li nej liam. Hes Los kuj tsis pom nws muaj txim, Hes Los thiaj xa nws rov los rau peb. Nws tsis tau ua ib yam tsim nyog tuag. Kuv yuav muab nws nplawm, ces kuv yuav tso nws mus."
P Tab sis tas sawv daws qw ntsuag qees tias :
L "Tus neeg ntawd yuav tsum tuag ! Koj tso Npas Las Npas rau peb."
P Npas Las Npas raug kaw hauv tsev loj faj, vim nws sawv ua rog ntxeev siab nyob hauv lub nroog thiab nws tua neeg. Pis Las Tos xav tso Yes Xus mus, ces nws rov qab hais lus rau lawv. Tab sis lawv nthe nthe hais tias :
L "Muab nws dai saum ntoo cuam ! Muab nws dai saum ntoo cuam !"
P Pis Las Tos rov hais lus zaum peb rau lawv tias :
L "Tus neeg no tau ua dab tsi phem ? Kuv tsis pom dab tsi txaus muab nws tua. Kuv yuav muab nws nplawm, ces kuv yuav tso nws mus."
P Tab sis lawv qw nrov, taij tsis tseg kom muab Yes Xus dai saum ntoo cuam. Lawv qw nrov nrov muaj ceem zuj zus. Ces Pis Las Tos txiav txim raws li lawv taij. Pis Las Tos tso tus uas raug kaw hauv tsev loj faj vim nws ntxeev siab thiab tua neeg ; nws tso tus uas lawv taij. Hos nws muab Yes Xus rau lawv ua ywj lawv siab.
(Sawv daws sawv)
Thaum lawv coj Yes Xus mus, lawv nthos ib tug txiv neej hu ua Xis Moos tuaj Xis Les Nas tuaj. Nws mus ua teb rov los. Lawv muab tus ntoo cuam rau nws, kom nws kwv lawv Yes Xus qab. Ib pab pej xeem coob coob raws Yes Xus mus. Muaj ib co poj niam ntaus lawv hauv siab thiab quaj hlub Yes Xus. Yes Xus tig mus ntsia cov poj niam, nws hais tias :
+ "Cov ntxhais nyob Yes Lus Xas Les, nej txhob quaj hlub kuv, nej quaj hlub nej thiab hlub nej cov me nyuam mog ! Vim yuav muaj tej hnub uas luag hais tias : Cov tau txoj hmoov zoo, yog cov poj niam tab seeb, yog lub plab uas tsis yug tub ki, thiab ob lub mis uas tsis muaj me nyuam noj ! Thaum ntawd, lawv yuav hais rau cov roob tias : Nej vau los tsuam peb mas ! Thiab hais rau cov pov roob tias : Nej nphau los vov peb mas ! Vim tias, yog luag ua li no rau tus ntoo nyoos, luag yuav ua li cas rau tus ntoo qhuav ?"
P Lawv kuj coj ob tug neeg tau ua phem nrog Yes Xus mus, lawv yuav muab nkawd tua thiab. Thaum lawv mus txog qhov chaw hu ua Khauj Khaum Taub Hau, lawv muab Yes Xus dai rau saum ntoo cuam. Lawv kuj muab ob tug neeg tau ua phem dai saum ntoo cuam thiab, ib tug nyob sab xis, ib tug nyob sab laug. Yes Xus hais tias :
+ "Txiv, koj zam rau lawv, vim lawv tsis paub lawv ua dab tsi ?"
P Ces lawv muab Yes Xus cov ris tsho sib faib, lawv twv saib leej twg tau daim twg. Tsoom pej xeem sawv ntsug ntawd ntsia. Cov thawj coj hnyos Yes Xus, lawv hais tias :
L "Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag, kom nws rov cawm nws mas !"
P Cov tub rog kuj thuam Yes Xus. Lawv txav los, lawv cev ib co dej qaub rau Yes Xus. Lawv hais tias :
L "Saib koj yog cov Yus Das tus vaj no, koj cia li cawm koj mas !"
P Tseem muaj ib co npe ntawv sau nyob siab me ntsis saum Yes Xus taub hau, hais tias : "Tus no yog cov Yus Das tus Vaj." Ob tug neeg phem dai saum ntoo cuam, muaj ib tug tsawm Yes Xus tias :
L "Koj tsis yog Leej Pleev lod ? Koj rov cawm koj, thiab cawm wb mas."
P Tab sis lwm tus qhib ncauj hais lus, nws cem tias :
L "Koj tseem tsis ntshai Tswv Ntuj lod ? Koj twb raug tib lub txim zoo li nws thiab ! Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li."
P Ces nws hais tias :
L "Yes Xus, thaum koj mus txog hauv koj lub Ceeb Tsheej, thov koj nco txog kuv."
P Ces Yes Xus hais rau nws tias :
+ "Kuv hais tseeb rau koj : Hnub no, koj yuav nrog kuv nyob hauv lub Nras Lom Zem."
P Kwv yees txij tav su, ces lub hnub ploj ntais lawm. Tas lub ntiaj teb tsaus ntuj nti mus txog peb teev hnub qaij. Daim ntaub hauv Kem Ntshiab ntuag rhe hauv nruab nrab. Yes Xus hu ib suab nrov nrov hais tias :
+ "Txiv, kuv tso kuv txoj sia rau hauv koj txhais tes."
P Yes Xus hais li ntawd tas, nws txoj sia tu nrho.
(Sawv daws txhos caug)
Tus xab txheeb pom qhov uas nyuam qhuav tshwm sim ntawd, nws cav txog Tswv Ntuj lub hwj chim, nws hais tias :
L "Tus no yog ib tug neeg siab ncaj tiag !"
P Tas cov pab neeg uas tuaj sib sau ua ke ntsia tej xwm no, pom qhov uas nyuam qhuav tshwm sim tas los, mas lawv rov mus tsev, lawv ntaus lawv hauv siab. Tas Yes Xus cov swm neeg huv tib si, thiab ib co poj niam uas raws Yes Xus hauv xeev Nkas Lis Lais tuaj, lawv sawv ntsug deb ntsia tej xwm ntawd. Muaj ib tug txiv neej hu ua Yos Xes, nws yog ib tug nyob hauv Rooj Sab Laj, nws siab zoo thiab siab ncaj. Thaum lawv npaj muab Yes Xus tua, mas nws tsis nrog lawv pom zoo. Nws nyob As Lis Mas Tias, uas yog cov Yus Das ib lub nroog. Nws tos txog Tswv Ntuj lub Ceeb Tsheej. Nws mus cuag Pis Las Tos, nws thov Yes Xus lub cev. Nws txo Yes Xus lub cev saum ntoo cuam los. Nws muab qhwv hauv ib daim ntaub qhwv tuag, ces nws muab zwm rau ib lub ntxa txaug hauv phab tsua, uas tseem tsis tau tso ib tug neeg rau hauv li. Hnub ntawd yog Hnub Npaj, Xas Npas Tos twb pib ci lawm. Cov poj niam uas nrog Yes Xus tuaj Nkas Lis Lais tuaj, lawv raws Yos Xes qab. Lawv ntsia ntsoov lub ntxa thiab ntsia ntsoov luag tso Yes Xus lub cev li cas. Cov poj niam rov mus tsev. Lawv npaj tshuaj tsw qab thiab roj tsw qab. Hnub Xas Npas Tos, lawv nyob twj ywm raws li Txoj Cai qhia.

Yog Huab Tais Yes Xus Lub Moo Zoo

Los sis Zaj luv luv
Lus Kas 23:1-49

Huab Tais Yes Xus Kev Txom Nyem, raws li Lus Kas Ntawv Moo Zoo

P Tas cov neeg tuaj sib txoos ntawd ib txhij sawv tsees, lawv coj Yes Xus mus rau Pis Las Tos. Lawv pib liam rau Yes Xus tias :
L "Peb pom tus neeg ntawd cob peb haiv neeg kom ua phem. Nws txwv tsis pub them se rau Xes Ntxas, thiab nws hais tias nws yog tus Vaj Pleev."
P Pis Las Tos nug Yes Xus tias :
L "Koj puas yog cov Yus Das tus vaj ?"
P Yes Xus teb tias :
+ "Yog koj hais li ntawd."
P Ces Pis Las Tos hais rau cov Thawj Leej Choj thiab rau tsoom sid tias :
L "Kuv tsis pom ib lub txim nyob hauv tus neeg no."
P Tsis kav, lawv hais tsis tseg tias :
L "Nws haub tsoom pej xeem kom ntxeev siab. Nws pib qhia hauv Nkas Lis Lais mus thoob xeev Yus Das, tuaj txog ntawm no."
P Thaum Pis Las Tos hnov hais li ntawd, nws nug saib Yes Xus puas yog neeg Nkas Lis Lais. Thaum Pis Las Tos paub tias Yes Xus zwm rau Hes Los, ces nws xa Yes Xus mus rau Hes Los. Vim lub caij ntawd Hes Los kuj tuaj nyob Yes Lus Xas Les thiab. Thaum Hes Los pom Yes Xus, nws zoo siab heev. Tau ntev los lawm, Hes Los ntshaw pom Yes Xus vim tej yam nws hnov luag hais txog Yes Xus, thiab nws vam tias Yes Xus yuav ua tej zaj hwj huam. Ces Hes Los nug Yes Xus txog ntau yam, tab sis Yes Xus tsis teb dab tsi rau Hes Los. Cov Thawj Leej Choj thiab cov Kws Ntawv Ntshiab kuj sawv ntsug nyob ntawd thiab, lawv liam heev kawg rau Yes Xus. Hes Los nrog nws cov zov keeb thuam thiab ua ntau yam tub qaug Yes Xus. Lawv muab ib lub tsho zoo nkauj rau Yes Xus hnav, ces lawv xa nws rov mus rau Pis Las Tos. Txij hnub ntawd los, Hes Los thiab Pis Las Tos nkawd ua phooj ywg, hos yav thaud mas nkawd sib ntxub. Pis Las Tos hu cov Thawj Leej Choj, cov nom, thiab cov pej xeem tuaj, nws hais rau lawv tias :
L "Nej coj tus neeg no tuaj rau kuv, xws li ib tug haub pej xeem kom ntxeev siab. Nyem no, kuv nug nws nyob ntawm nej xub ntiag, kuv tsis pom nws muaj txim xws li nej liam. Hes Los kuj tsis pom nws muaj txim, Hes Los thiaj xa nws rov los rau peb. Nws tsis tau ua ib yam tsim nyog tuag. Kuv yuav muab nws nplawm, ces kuv yuav tso nws mus."
P Tab sis tas sawv daws qw ntsuag qees tias :
L "Tus neeg ntawd yuav tsum tuag ! Koj tso Npas Las Npas rau peb."
P Npas Las Npas raug kaw hauv tsev loj faj, vim nws sawv ua rog ntxeev siab nyob hauv lub nroog thiab nws tua neeg. Pis Las Tos xav tso Yes Xus mus, ces nws rov qab hais lus rau lawv. Tab sis lawv nthe nthe hais tias :
L "Muab nws dai saum ntoo cuam ! Muab nws dai saum ntoo cuam !"
P Pis Las Tos rov hais lus zaum peb rau lawv tias :
L "Tus neeg no tau ua dab tsi phem ? Kuv tsis pom dab tsi txaus muab nws tua. Kuv yuav muab nws nplawm, ces kuv yuav tso nws mus."
P Tab sis lawv qw nrov, taij tsis tseg kom muab Yes Xus dai saum ntoo cuam. Lawv qw nrov nrov muaj ceem zuj zus. Ces Pis Las Tos txiav txim raws li lawv taij. Pis Las Tos tso tus uas raug kaw hauv tsev loj faj vim nws ntxeev siab thiab tua neeg ; nws tso tus uas lawv taij. Hos nws muab Yes Xus rau lawv ua ywj lawv siab.
(Sawv daws sawv)
Thaum lawv coj Yes Xus mus, lawv nthos ib tug txiv neej hu ua Xis Moos tuaj Xis Les Nas tuaj. Nws mus ua teb rov los. Lawv muab tus ntoo cuam rau nws, kom nws kwv lawv Yes Xus qab. Ib pab pej xeem coob coob raws Yes Xus mus. Muaj ib co poj niam ntaus lawv hauv siab thiab quaj hlub Yes Xus. Yes Xus tig mus ntsia cov poj niam, nws hais tias :
+ "Cov ntxhais nyob Yes Lus Xas Les, nej txhob quaj hlub kuv, nej quaj hlub nej thiab hlub nej cov me nyuam mog ! Vim yuav muaj tej hnub uas luag hais tias : Cov tau txoj hmoov zoo, yog cov poj niam tab seeb, yog lub plab uas tsis yug tub ki, thiab ob lub mis uas tsis muaj me nyuam noj ! Thaum ntawd, lawv yuav hais rau cov roob tias : Nej vau los tsuam peb mas ! Thiab hais rau cov pov roob tias : Nej nphau los vov peb mas ! Vim tias, yog luag ua li no rau tus ntoo nyoos, luag yuav ua li cas rau tus ntoo qhuav ?"
P Lawv kuj coj ob tug neeg tau ua phem nrog Yes Xus mus, lawv yuav muab nkawd tua thiab. Thaum lawv mus txog qhov chaw hu ua Khauj Khaum Taub Hau, lawv muab Yes Xus dai rau saum ntoo cuam. Lawv kuj muab ob tug neeg tau ua phem dai saum ntoo cuam thiab, ib tug nyob sab xis, ib tug nyob sab laug. Yes Xus hais tias :
+ "Txiv, koj zam rau lawv, vim lawv tsis paub lawv ua dab tsi ?"
P Ces lawv muab Yes Xus cov ris tsho sib faib, lawv twv saib leej twg tau daim twg. Tsoom pej xeem sawv ntsug ntawd ntsia. Cov thawj coj hnyos Yes Xus, lawv hais tias :
L "Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag, kom nws rov cawm nws mas !"
P Cov tub rog kuj thuam Yes Xus. Lawv txav los, lawv cev ib co dej qaub rau Yes Xus. Lawv hais tias :
L "Saib koj yog cov Yus Das tus vaj no, koj cia li cawm koj mas !"
P Tseem muaj ib co npe ntawv sau nyob siab me ntsis saum Yes Xus taub hau, hais tias : "Tus no yog cov Yus Das tus Vaj." Ob tug neeg phem dai saum ntoo cuam, muaj ib tug tsawm Yes Xus tias :
L "Koj tsis yog Leej Pleev lod ? Koj rov cawm koj, thiab cawm wb mas."
P Tab sis lwm tus qhib ncauj hais lus, nws cem tias :
L "Koj tseem tsis ntshai Tswv Ntuj lod ? Koj twb raug tib lub txim zoo li nws thiab ! Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li."
P Ces nws hais tias :
L "Yes Xus, thaum koj mus txog hauv koj lub Ceeb Tsheej, thov koj nco txog kuv."
P Ces Yes Xus hais rau nws tias :
+ "Kuv hais tseeb rau koj : Hnub no, koj yuav nrog kuv nyob hauv lub Nras Lom Zem."
P Kwv yees txij tav su, ces lub hnub ploj ntais lawm. Tas lub ntiaj teb tsaus ntuj nti mus txog peb teev hnub qaij. Daim ntaub hauv Kem Ntshiab ntuag rhe hauv nruab nrab. Yes Xus hu ib suab nrov nrov hais tias :
+ "Txiv, kuv tso kuv txoj sia rau hauv koj txhais tes."
P Yes Xus hais li ntawd tas, nws txoj sia tu nrho.
(Sawv daws txhos caug)
Tus xab txheeb pom qhov uas nyuam qhuav tshwm sim ntawd, nws cav txog Tswv Ntuj lub hwj chim, nws hais tias :
L "Tus no yog ib tug neeg siab ncaj tiag !"
P Tas cov pab neeg uas tuaj sib sau ua ke ntsia tej xwm no, pom qhov uas nyuam qhuav tshwm sim tas los, mas lawv rov mus tsev, lawv ntaus lawv hauv siab. Tas Yes Xus cov swm neeg huv tib si, thiab ib co poj niam uas raws Yes Xus hauv xeev Nkas Lis Lais tuaj, lawv sawv ntsug deb ntsia tej xwm ntawd.

Yog Huab Tais Yes Xus Lub Moo Zoo