* Chúa nhật này có thể dùng tất cả các bài đọc năm A
Zaj Nyeem Ib
His Xais 43:16-21
Peb yuav nco txog Tswv Ntuj cov hwj huan txheej thaud, tab sis peb kuj yuav txawj pom tias Tswv Ntuj pab peb tsoom ntseeg hla kom dhau lub caij peb khuam ntiaj teb no, yog ib yam hwj huam loj kawg thiab.
Cov lus nyob hauv ntawv yaj saub His Xais
16 Huab Tais hais lo lus li no : Huab Tais yog tus tho ib txog kev hla nruab hiav txwv, tho ib txog kev nyob hauv cov dej muaj zog. Huab Tais ua kom Fas Las Oos cov tsheb rog, cov nees thiab tsoom tub rog siab loj sawv daws ua ke sawv mus ntaus rog.
17 Nyem no, lawv pw, lawv yuav tsis sawv, lawv tuag xws li tus teeb xeeb uas kug tas. Huab Tais hais li ntawd.
18 Nej txhob nco txog thawj cov xwm, txhob xav tswv yim txog tej yam thaum ub tshwm sid.
19 Ntsia saib ! Kuv rov ua dua ib yam tshiab. Yam ntawd twb hlav kaus. Nej tsis pom lod ? Muaj tseeb ! Kuv yuav tho ib txog kev hauv teb chaws suab puam, kuv yuav ua kom tej tus dej txhawv hauv cov teb chaws maj sab.
20 Tej tsiaj nruab nrag, tej hma thiab tej qaib nyuj yuav cav lus zoo txog kuv lub koob meej, vim kuv yuav ua kom dej txhawv hauv teb chaws suab puam los, haiv neeg kuv xaiv thiaj tau dej haus.
21 Haiv neeg kuv tsim los yuav cav txog kuv lub koob meej mus li."
Yog Tswv Ntuj lo Lus
Txais Ntuj Lus
NPN 126:1-2a, 2b-3, 4-5, 6 (3)
(Nqua Suab Cav Txog Tswv Ntuj, 154)
Txais : Peb zoo siab hom khaj vim Huab Tais ua tej yam loj kawg rau peb.
1. Thaum Huab Tais coj Xis Yoos cov neeg nyob txim rov los,
peb xav tias yog npau suav.
Peb lub ncauj muaj suab luag, peb tus nplaig hu nkauj zoo siab. Teb.
2. Pej kum haiv neeg hais zom zaws tias,
“Huab Tais tau ua tej yam loj tas nrho rau lawv.”
Huab Tais tau ua tej yam loj rau peb, peb zoo siab tas nrho. Teb.
3. Huab Tais, koj coj peb cov neeg nyob txim rov los
xws li dej sab siv huam nyob teb chaws suab puam.
Cov neeg tseb nplej, tseb ntxuag kua muag.
Thaum lawv sau nplej, lawv sau nrog suab luag. Teb.
4. Thaum mus, lawv quaj vim lawv ris cov seev noob.
Thaum lawv rov los, lawv hu nkauj vim lawv ris cov nplej tshiab los. Teb.
Zaj Nyeem Ob
Fis Lis Pos 3:8-14
Paj Lug ntsib Yes Xus tas, ces nws tso txhia yam nws nyiam yav thaud. Nws xav npuab Yes Xus nyob hauv nws txoj kev tuag thiab nws txoj kev sawv rov los.
Cov lus nyob hauv leej ntshiab Paj Lug tsab ntawv sau tuaj rau cov ntseeg nyob Fis Lis Pos.
8 Kwv tij sawv daws, kuv saib txhua yam tsis muaj nqis, vim kuv muab piv rau ib yam muaj nqe tas nrho, yog txoj kev paub Yes Xus Pleev, kuv tus Huab Tais. Vim nws, mas kuv tau tso tas ib puas tsav yam pov tseg ; kuv saib tas puas tsav yam tsis muaj qab hau, vim kuv xav tau Leej Pleev.
9 Kuv xav kom Tswv Ntuj ntsib kuv nyob hauv Leej Pleev. Kuv tsis muaj ib txog kev ncaj ua kuv tug ; kuv tsis muaj txoj kev ncaj tuaj ntawm Txoj Cai tuaj. Kuv tsuas muaj txoj kev ncaj tuaj ntawm txoj kev ntseeg txog Leej Pleev thiab ntawm Tswv Ntuj tuaj xwb, yog txoj kev ncaj uas nrhau cag rau hauv txoj kev ntseeg.
10 Kuv xav paub Leej Pleev, xav paub nws txoj kev sawv rov los muaj zog npaum li cas, xav npuab nws nyob hauv nws txoj kev raug txom nyem, thiab kuv xav yoog nws tus piv txwv nyob hauv txoj kev tuag,
11 saib kuv puas yuav sawv tau hauv cov tub tuag rov los.
12 Kuv tsis hais tias, kuv twb mus txog chaw lawm, los kuv twb zoo txhij zoo txhua tas lawm. Kuv khiav ntxiv kom kuv tuav tau Leej Pleev, vim Yes Xus Pleev twb tuav tau kuv lawm.
13 Kwv tij, kuv tsis khav tias, kuv tuav tau Leej Pleev lawm. Kuv tsuas hais li no : kuv hnov qab tias, kuv tau khiav kev deb li cas lawm.
14 Kuv khoov cev ncaj qha khiav mus rau tom hauv ntej, kuv tso sas ntws kom mus txog chaw, vim kuv pom cov paj tshab, uas Tswv Ntuj hu peb mus txais nyob txheej saud, nyob hauv Yes Xus Pleev.
Yog Tswv Ntuj lo Lus
Nkauj Cav Txog Lub Moo Zoo
Yos Es 2:12-13
(Nqua Suab Cav Txog Tswv Ntuj, 239, nqe 10)
Huab Tais hais tias : "Nej rov qab los cuag Kuv, tig nej lub siab los npuab Kuv vim Kuv khuv leej nej, Kuv hlub nej tas siab nrho.
Yes Xus Pleev, peb cav txog koj ! Koj yog tus vaj muaj koob meej nto moo lug.
Ntawv Moo Zoo
Zam 8:1-11
Yes Xus zam txhaum, tsis yog vim nws saib kev ua txhaum yog ib yam me. Yes Xus zam txhaum, vim nws xav pab peb kom yeej kev txhaum yav tom ntej.
Nej mloog ib zag nyob hauv leej ntshiab Zam ntawv Moo Zoo
1 Muaj ib zaug, Yes Xus mus pem Roob Txiv Ntoo Roj.
2 Thaum kaj ntug txoog, Yes Xus rov mus hauv lub Tuam Tsev Teev Ntuj. Tas tsoom pej xeem tuaj cuag nws. Yes Xus zaum, nws thiaj pib qhia lawv.
3 Cov kws ntawv thiab cov Fas Lis Xais coj ib tug poj niam tuaj rau Yes Xus : luag ntes nws thaum tab tom deev hluas nraug. Lawv coj tus poj niam tuaj sawv ntsug hauv nruab nrab.
4 Lawv hais rau Yes Xus tias : "Xib Hwb, tus poj niam no, luag pom nws tab tom deev hluas.
5 Nyob hauv Txoj Cai, mas Mais Xes kom peb xuas pob zeb txawb cov poj niam zoo li ntawd. Koj ne, koj hais li cas ?"
6 Lawv hais li ntawd vim lawv xav sim Yes Xus, lawv thiaj li tau kev mus kom nws. Tab sis Yes Xus khoov, nws xuas ntiv tes sau npe ntawv rau hauv pem teb.
7 Lawv pheej rov nug tsis tseg, ces Yes Xus sawv ntsug, nws hais rau lawv tias : "Nyob hauv nej, yog leej twg tsis muaj txhaum, mas kom nws xub txawb ib lub pob zeb rau tus poj niam ntawd."
8 Ces Yes Xus rov khoov, nws rov sau npe ntawv hauv pem teb.
9 Thaum lawv hnov hais li ntawd, lawv nyias rov mus nyias zuj zus. Cov xub mus yog cov laus dua. Tshuav Yes Xus tib leeg thiab tus poj niam uas sawv hauv nruab nrab xwb.
10 Yes Xus rov sawv ntsug, nws hais rau tus poj niam tias : "Me ntxhais, lawv dua twg tas lawm ? Tsis muaj leej twg muab txim rau koj lod ?"
11 Tus poj niam teb tias : "Huab Tais, tsis muaj leej twg." Ces Yes Xus hais tias : "Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog."
Yog Huab Tais Yes Xus Lub Moo Zoo
){kind=link}