Zaj Nyeem Ib
His Xais 66:10-14a
Cov lus nyob hauv Ntawv His Xais
Nej kav tsij nrog Yes Lus Xas Les zoo siab mog !
Nej sawv daws uas nyiam Yes Lus Xas Les,
nej dhia hom khaj rau nws mas !
Nej sawv daws uas nej tau ntoo xyom vim Yes Lus Xas Les,
mas nyem no nej kav tsij dhia zoo siab hom khaj !
Nej thiaj yuav tau mis noj tsau npo,
nej yuav tau ntxais nws lub mis nplij neeg nyob ntawm nws lub xub ntiag muaj hwj chim.
Vim Huab Tais hais li no:
"Ntsia saib !
Kuv coj kev vam meej mus cuag Yes Lus Xas Les zoo li ib tug niam dej,
kuv coj tsoom kuj cuab kev nplua nuj mus cuag Yes Lus Xas Les xws li ib tug dej phwj.
Lawv ris Yes Lus Xas Les cov mos liab ntawm duav,
lawv plhws cov mos liab saum hauv caug.
Kuv yuav nplij nej xws li ib tug niam nplij nws tus me nyuam.
Nyob hauv Yes Lus Xas Les kuj yuav muaj tus nplij nej.
Nej pom muaj li ntawd,
nej yuav zoo siab dhia hom khaj,
nej cov pob txha yuav tawg paj xws li nroj.
Huab Tais cov tub txib yuav paub Huab Tais txhais tes.
Yog Tswv Ntuj lo Lus
Nkauj Paj Nruag Txais Ntuj Lus
NPN 66:1-3,4-5,6-7,16,20(1)
Txais: Tas lub ntiaj teb hu nkauj ntsaug qees cav txog Tswv Ntuj.
(Nqua Suab Cav Txog Tswv Ntuj, 183)
1. Tas lub ntiaj teb,
nej qw suab zoo siab cav txog Tswv Ntuj.
Nej hu nkauj cav txog nws lub npe muaj koob meej !
Nej seev lus paj huam cav txog nws.
Nej hais rau Tswv Ntuj hais tias,
“Koj tej hauj lwm muaj hwj xyeej tas nrho. Teb.
2. Tas lub ntiaj teb txhos caug pe koj,
ntiaj teb neeg hu nkauj cav txog koj lub npe.”
Nej tuaj,
nej yuav pom Tswv Ntuj cov hauj lwm.
Nws cov hauj lwm muaj hwj xyeej
nyob hauv As Das tsoom tub ki. Teb.
3. Nws ua kom dej ntuj hloov ua av qhuav.
Lawv hla dej,
dej tsis ntub lawv taw.
Peb nqaum paj nqaum nruas cav txog Tswv Ntuj.
Nws lub hwj huam yuav kav txheej dhau txheej. Teb.
4. Tas ib tsoom neeg hwm Ntuj,
nej mloog mas !
Nej thiaj yuav paub qhov uas Tswv Ntuj ua rau kuv.
Nws tsis xyeeb kuv cov lus thov.
Nws tsis tshem nws txoj kev hlub mus deb kuv. Teb.
Zaj Nyeem Ob
Nkas Las Tias 6:14-18
Cov lus Paj Lug sau tuaj rau Cov Ntseeg nyob Nkas Las Tias
Kwv tij sawv daws,
ntawm kuv,
mas yog kuv xav tau ntsej muag,
mas kuv kawg xav kom tau nyob hauv peb tus Huab Tais Yes Xus Pleev tus ntoo cuam xwb.
Nws muab lub ntiaj teb neeg dai saum ntoo cuam rau kuv,
thiab nws muab kuv dai saum ntoo cuam rau lub ntiaj teb neeg.
Ua lub cim txiav tsis muaj dab tsi zoo,
hos tsis ua lub cim txiav kuj tsis muaj dab tsi txawv :
qhov tseeb yog yuav tsum ua tus neeg tshiab.
Thov kom tas tsoom neeg taug txoj kev no,
thiab Tswv Ntuj tsoom His Xas Lais,
sawv daws tau nyob kaj siab lug,
thiab tau Ntuj txoj kev hlub.
Txij no mus,
txhob muaj neeg tsim kev ntxhov rau kuv ntxiv :
kuv ris Yes Xus cov caus pliav puv kuv lub cev.
Kwv tij sawv daws,
peb tus Huab Tais Yes Xus Pleev lub txiaj ntsim nrog nej lub tswv yim nyob.
A-men.
Yog Tswv Ntuj lo Lus
Nkauj Cav Txog Lub Moo Zoo
Kos Los Xais 3:15a,16a
As les lus yas. As les lus yas.
Thov kom Leej Pleev txoj kev thaj yeeb tuaj kav nej nruab siab
thiab kom Leej Pleev lo lus nyob txawm hauv nej mus li.
As les lus yas.
(Nqua Suab Cav Txog Tswv Ntuj, 233, nqe 2)
Ntawv Moo Zoo
Lus Kas 10:1-12,17-20
Dhau qhov ntawd lawm,
Huab Tais tseem xaiv xya caum ob leeg,
nws xa lawv mus tej pab ob leeg,
ua nws ntej mus rau hauv cov nroog
thiab tej qhov chaw uas nws yuav mus.
Nws hais rau lawv tias :
"Qoob loo zoo sau muaj ntau kawg,
tab sis cov tub zog muaj tsawg.
Nej thov tus Tswv qoob kom nws xa ib co tub zog tuaj sau nws cov qoob.
Nej saib !
Kuv xa nej zoo li ib co yaj mus nyob nruab nrab ib cov hma.
Nej tsis txhob nqa nas nyiaj,
txhob ris hnab,
txhob rau khau,
txhob hais lus hawm leej twg ntawm kev.
Nej chaws mus hauv lub tsev twg,
nej xub hais tias :
"Lub tsev no nyob kaj lug !"
Yog muaj txoj kev kaj lug ib leeg tub nyob ntawd,
mas nej txoj kev kaj lug yuav roos nws.
Yog tsis muaj,
mas nej txoj kev kaj lug yuav rov los rau nej.
Nej nyob hauv lub tsev ntawd,
nej noj nej haus tej yam uas lawv muaj hauv tsev,
vim tus tub zog tsim nyog txais nqi zog.
Nej txhob tawm hauv ib lub tsev mus nyob dua lwm lub.
Nej mus hauv lub nroog twg,
yog luag txais nej,
nej noj tej yam uas luag muab rau nej.
Nej kho cov neeg mob hauv lub nroog ntawd kom zoo,
thiab nej hais rau lawv tias :
"Tswv Ntuj lub Ceeb Tsheej tuaj txog ze nej lawm."
Tab sis yog nej mus hauv lub nroog twg,
luag tsis txais nej,
nej tawm mus nraum tej tshav puam nej hais tias :
"Tab yog tej plua av uas lo peb ko taw hauv nej lub nroog no,
peb muab so tseg rau nej huv si.
Tab sis,
nej yuav tsum paub tias Tswv Ntuj lub Ceeb Tsheej tuaj txog ze lawm."
Kuv hais rau nej,
Hnub ntawd,
lub nroog Xos Dos Mas yuav raug txim sib dua lub nroog ntawd
Pab xya caum ob leeg rov qab los txog,
lawv zoo siab,
lawv hais tias :
"Huab Tais,
tab yog cov dab phem,
tsis kav lawv zwm rau peb,
vim koj lub npe."
Yes Xus hais rau lawv tias :
"Kuv twb ntsia Xas Tas poob saum ntuj los zoo li ib kab xob laim !
Nej saib !
Kuv pub hwj huam rau nej kom nej ko taw tsuj tau nab,
tsuj kab lij tshooj,
tsuj Yeeb Ncuab lub hwj huam tib si,
tsis muaj dab tsi ua xwv txheej tau rau nej.
Nej tsis txhob zoo siab vim dab zwm rau nej.
Nej yuav zoo siab vim nej lub npe muab sau cia saum ntuj lawm."
Yog Huab Tais Yes Xus Lub Moo Zoo
Zaj luv (Bài ngắn)
Lus Kas 10:1-9
Nej mloog ib zag nyob hauv Lus Kas Ntawv Moo Zoo
Dhau qhov ntawd lawm,
Huab Tais tseem xaiv xya caum ob leeg,
nws xa lawv mus tej pab ob leeg,
ua nws ntej mus rau hauv cov nroog
thiab tej qhov chaw uas nws yuav mus.
Nws hais rau lawv tias :
"Qoob loo zoo sau muaj ntau kawg,
tab sis cov tub zog muaj tsawg.
Nej thov tus Tswv qoob kom nws xa ib co tub zog tuaj sau nws cov qoob.
Nej saib !
Kuv xa nej zoo li ib co yaj mus nyob nruab nrab ib cov hma.
Nej tsis txhob nqa nas nyiaj,
txhob ris hnab,
txhob rau khau,
txhob hais lus hawm leej twg ntawm kev.
Nej chaws mus hauv lub tsev twg,
nej xub hais tias :
"Lub tsev no nyob kaj lug !"
Yog muaj txoj kev kaj lug ib leeg tub nyob ntawd,
mas nej txoj kev kaj lug yuav roos nws.
Yog tsis muaj,
mas nej txoj kev kaj lug yuav rov los rau nej.
Nej nyob hauv lub tsev ntawd,
nej noj nej haus tej yam uas lawv muaj hauv tsev,
vim tus tub zog tsim nyog txais nqi zog.
Nej txhob tawm hauv ib lub tsev mus nyob dua lwm lub.
Nej mus hauv lub nroog twg,
yog luag txais nej,
nej noj tej yam uas luag muab rau nej.
Nej kho cov neeg mob hauv lub nroog ntawd kom zoo,
thiab nej hais rau lawv tias :
"Tswv Ntuj lub Ceeb Tsheej tuaj txog ze nej lawm."
Yog Huab Tais Yes Xus Lub Moo Zoo
){kind=link}