Zaj Nyeem Ib
Cov Paj Lug 8:22-31
Cov lus nyob hauv Ntawv Cov Paj Lug
Txij lub hauv paus los,
thaum tseem tsis tau muaj cov hnub nyoog,
thaum lub ntiaj teb tseem tsis tau xeeb los,
mas kuv twb nyob lawm.
Thaum tseem tsis muaj cov tiv txwv,
tseem tsis tau muaj cov qhov dej txhawv,
kuv twb yug los.
Thaum tseem tsis tau muaj cov toj roob hauv pes sawv,
kuv twb nyob lawm.
Thaum tseem tsis tau muaj ntiaj teb,
tsis muaj lub sim ceeb thawj cov plua av plua tshauv,
kuv twb yug los.
Thaum Huab Tais tsim cuaj txheej ntuj,
thaum nws kos lub voj xov npoo ntuj,
kuv twb nyob ntawd.
Thaum nws sau cov huab nyob txheej ntuj saud,
thaum nws ua kom cov qhov dej hauv tiv txwv phwj los,
kuv nyob ntawd.
Thaum Huab Tais tu ciam teb rau cov dej ntuj kom lawv txhob hla dhau lawv tej ntug,
kuv nyob ntawd.
Kuv nyob rawv ntawm Huab Tais xws li ib leeg ntxhais.
Txhua txhia hnub kuv dhia hom khaj nyob ntawm Huab Tais xub ntiag,
ua nws chaw kaj siab lom zem."
Yog Tswv Ntuj lo Lus
Nkauj Paj Nruag Txais Ntuj Lus
NPN 145:6b-7a.7b-8.9-10; His Xais 35:4
Txais: Peb tus Huab Tais Tswv Ntuj,
koj lub npe muaj hwj chim nyob puv ntiaj teb.
(Nqua Suab Cav Txog Tswv Ntuj, 168)
1. Thaum kuv ntsia lub ntuj uas koj txhais tes tsim los,
ntsia lub hli thiab cov hnub qub uas koj tsim,
neeg yog dab tsi,
koj thiaj nco txog. Teb.
2. Koj muab neeg tsa siab yuav luag cuag li koj ib tug Tub Xo.
Koj uab koob meej thiab hwj chim los cog rau neeg.
Koj tsa neeg kav tas puas tsav yam koj txhais tes tsim los.
Koj tso tas puas tsav yam rau hauv neeg qab xib taws. Teb.
3. Tas cov tsiaj nyeg,
tsiaj qus,
me noog ya saum ntuj,
me ntses khiav hauv dej,
koj muab tas puas tsav yam koj tsim los rau neeg kav. Teb.
Zaj Nyeem Ob
Los Mas 5:1-5
Cov lus Paj Lug sau tuaj rau Cov Ntseeg nyob Los Mas
Kwv tij sawv daws,
Yog vim peb txais kev ncaj ntawm kev ntseeg tuaj,
mas peb thiaj nrog Tswv Ntuj nyob kaj siab lug nyob hauv peb tus Huab Tais Yes Xus Pleev.
Yes Xus Pleev pub kev ntseeg,
ces peb tau txais txiaj ntsim ;
peb tau los nyob hauv lub txiaj ntsim ;
peb cav lus zoo
thiab peb tso siab tias peb yuav txais Tswv Ntuj lub hwj chim.
Tab yog peb raug kev txom nyem,
peb tseem cav lus zoo thiab,
vim peb paub tseeb tias txoj kev txom nyem rub lub siab kom ntev,
lub siab ntev tsim tus yam ntxwv zoo xwm yeem,
tus yam ntxwv zoo xwm yeem tsim kev tso siab.
Kev tso siab ua kom peb tsis muaj chaw khuv xim,
vim Leej Ntuj Plig Ntshiab,
uas Ntuj pub rau peb,
nws hliv Tswv Ntuj txoj kev nyiam rau hauv peb lub siab.
Yog Tswv Ntuj lo Lus
Nkauj Cav Txog Lub Moo Zoo
Qhib Yav Tom Ntej 1:8
As les lus yas. As les lus yas.
Huab Tais Leej Txiv,
Huab Tais Leej Tub
thiab Huab Tais Leej Ntuj Plig muaj koob meej nto moo lug.
Yog tus Huab Tais ib txwm nyob thiab yog tus tseem yuav los.
As les lus yas.
(Nqua Suab Cav Txog Tswv Ntuj, 237, nqe 5)
Ntawv Moo Zoo
Zam 16:12-15
Nej mloog ib zag nyob hauv Zam Ntawv Moo Zoo
Muaj ib zaug,
Yes Xus hais rau nws cov thwj tim tias :
Kuv tseem tshuav ntau yam yuav hais rau nej,
tab sis nyem no nej ris tsis taus.
Thaum Leej Ntuj Plig qhia qhov tseem ceeb tuaj txog,
nws yuav coj nej mus rau qhov tseeb tas huv si.
Vim nws yuav tsis hais nws cov lus,
nws yuav hais qhov nws hnov,
thiab nws yuav xub qhia nej txog tej xwm uas yuav tshwm sim tuaj.
Nws yuav ua kom kuv muaj koob meej,
vim nws yuav coj yam uas yog kuv tug tuaj qhia rau nej.
Tas ib puas tsav yam uas yog Leej Txiv tug,
mas kuj yog kuv tug huv tib si.
Vim li ntawd kuv thiaj hais rau nej tias :
Leej Nplij Neeg yuav coj yam uas yog kuv tug tuaj qhia rau nej.
Yog Huab Tais Yes Xus Lub Moo Zoo
){kind=link}