Zaj Nyeem Ib
Hauj Lwm 2:1-11
Cov lus nyob hauv Ntawv Hauj Lwm
Thaum txog lub Hnub Nyoog Tsib Caug,
tas cov thwj tim huv tib si tuaj sib txoos ua ke.
Ib sij huam,
txawm muaj ib lub suab nrov saum ntuj tuaj xws li ib nthwv cua hlob hlob ntsawj,
lub suab ntawd nrov thoob plaws lub tsev uas lawv nyob.
Ces lawv pom tej ntshua nplaim zoo li nplaim taws,
ncau ua tej tus nplaim me ya tuaj tsaws saum cov thwj tim txhua tus.
Lawv sawv daws tau txais Leej Ntuj Plig Ntshiab puv hauv lawv,
ces lawv pib hais ntau xeem lus raws li Leej Ntuj Plig pub kom lawv hais tau.
Thaum ntawd,
muaj ib co Yus Das kub siab ntseeg tuaj ntawm tas cov teb chaws hauv lub qab ntuj khwb tuaj nyob Yes Lus Xas Les.
Thaum lawv hnov lub suab nrov,
tas ib tsoom neeg tuaj ntsauv vij vog.
Sawv daws ua siab poob nthav vim tias thaum cov thwj tim hais lus,
mas lawv nyias hnov hais nyias xeem lus.
Lawv ceeb tas nrho, xav tsis thoob, ces lawv hais tias :
"Tas cov neeg uas hais lus ntawd,
lawv tsis yog ib co Nkas Lis Lais lod ?
Ua li cas peb thiaj nyias hnov lawv hais nyias xeem lus ?
Peb yog ib co neeg Pas Tos, Mes Dias, Es Las Mias,
peb nyob Mes Xos Pos Tas Mias tuaj, Yus Das,
Kas Pas Dos, Poos Tus, As Xias, Fis Zias, Pas Fis Lias,
nyob Hais Nkws Tos
thiab Lis Npias teb chaws uas ze Xis Les Nas,
peb yog neeg Los Mas tuaj nyob ntawm no.
Peb yog ib co Yus Das thiab ib co teev dab txais kev ntseeg,
ib co Khes Tas, As Las Npias,
peb puav leej hnov lawv hais peb xeem lus cav txog Tswv Ntuj lub hwj chim."
Yog Tswv Ntuj lo Lus
Nkauj Paj Nruag Txais Ntuj Lus
NPN 104:1,24,29-30,31,34(30)
Txais: Huab Tais,
thov koj xa Leej Ntuj Plig Ntshiab nqes los ua kom lub ntiaj teb rov tshiab tuaj.
(Nqua Suab Cav Txog Tswv Ntuj, 167)
1. Kuv tus plig,
koj cav lus zoo txog Huab Tais !
Kuv tus Huab Tais Tswv Ntuj,
koj loj tas nrho.
Huab Tais,
koj cov hauj lwm ntau tas nrho.
Koj tsim txhua yam tsiaj nyob puv ntiaj teb. Teb.
2. Yog koj rho txoj pa ntawm leej twg mas lawv txoj sia tu,
lawv rov mus ua av luaj.
Thaum koj xa koj lub tswv yim tuaj mas lawv rov tsheej xeeb muaj txoj sia.
Koj ua kom lub ntiaj teb rov tshiab tuaj. Teb.
3. Thov kom Huab Tais lub koob meej nyob mus li,
kom Huab Tais zoo siab rau nws tej dej num,
kom kuv zaj paj huam ntxim nws siab !
Kuv yuav zoo siab nyob hauv Huab Tais. Teb.
Zaj Nyeem Ob
Los Mas 8:8-17
Cov lus Paj Lug sau tuaj rau Cov Ntseeg nyob Los Mas
Kwv tij sawv daws,
cov neeg mloog lub cev,
lawv ua xis Tswv Ntuj siab tsis tau.
Ntawm nej,
mas nej tsis zwm rau lub cev,
nej zwm rau lub tswv yim,
vim Tswv Ntuj Leej Tswv Yim nyob txawm hauv nej.
Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug.
Yog Leej Pleev nyob hauv nej,
tab yog lub cev tuag vim kev txhaum,
mas lub tswv yim muaj txoj sia vim kev ncaj.
Yog tus tau tsa Yes Xus tuag sawv rov los,
nws lub tswv yim nyob txawm hauv nej,
mas nws yuav pub txoj sia rau nej lub cev tuag,
vim Leej Ntuj Plig nyob txawm hauv nej.
Kuv cov kwv tij,
yog li ntawd mas peb tshuav luag nuj nqis,
tab sis peb tsis tshuav lub cev nuj nqis.
Tsis tas peb yuav ua neej mloog lub cev.
Yog nej ua neej mloog lub cev mas nej yuav tuag.
Tab sis yog nej cia Leej Ntuj Plig muab lub cev cov hauj lwm tua pov tseg,
mas nej yuav muaj txoj sia.
Txhua leej txhua tus uas Tswv Ntuj Leej Tswv Yim coj,
mas lawv yog Tswv Ntuj cov me nyuam tas huv tib si.
Nej tsis tau txais ib lub tswv yim ua qhev ;
nej tsis txhob rov qab poob rau hauv txoj kev ntshai.
Nej tau txais ib lub tswv yim ua tub ki tshiab,
mas nej hu Tswv Ntuj tias :
‘As Npas ! Txiv !’
Leej Ntuj Plig nrog peb lub tswv yim zeem tseeb tias peb yog Tswv Ntuj cov me nyuam tiag.
Vim peb yog Ntuj cov me nyuam,
mas peb yog cov txais lub cuab tam :
peb yog cov txais Tswv Ntuj lub cuab tam ;
peb nrog Leej Pleev txais ib lub cuab tam,
vim peb nrog nws raug txom nyem,
peb yuav tau nrog nws muaj hwj chim.
Yog Tswv Ntuj lo Lus
Veni, Sancte Spiritus (Leej Ntuj Pljg Los)
Leej Txiv tus ib txhis Ntshiab thov xa Leej Ntuj Plig tuaj hloov ntiaj teb.
Huab Tais Cawm Seej thov pab xa Leej Ntuj Plig tuaj txhawb sawv daws.
Thov Koj tshuab ib pas Ntsuj Plig Ntshiab rau kuv dim ntawm Xas Tas txhais tes.
Tus nplaim taws muaj ceem txhawb kuv hla dhau kev txhaum yug ua Koj ib tus me nyuam.
Thov Koj ntxuav kuv kom huv li si li dej nag los ntxaum thaj av qhuav.
Thov Koj coj tus neeg yuam kev los rau txoj kev ncaj tus neeg siab txias kub lug.
Thov Koj pub kuv ib lub siab ntseeg Huab Tais txoj kev hlub thiab kev zam.
Pab kuv txhem txoj kev muab hlob tawm deb ntswm kuv mus thiaj li tau Koj txiaj ntsim.
Thov Leej Ntuj Plig pab qhia txoj kev kaj siab lug tuaj rau peb tib neeg.
Peb thiaj li muaj ub siab vam ntseeg Leej Zoo Txiv hauv Ntuj Plif Ntshiab lub txiaj ntsim.
Nkauj Cav Txog Lub Moo Zoo
As les lus yas. As les lus yas.
Los mas !
Leej Ntuj Plig Ntshiab,
koj los ua kom peb lub siab kub li hluav taws,
cog txoj kev ntseeg kom ruaj nreb hauv peb mus ib txhis.
As les lus yas.
(Nqua Suab Cav Txog Tswv Ntuj, 218, nqe 1)
Ntawv Moo Zoo
Zam 14:15-16,23b-26
Nej mloog ib zag nyob hauv Zam Ntawv Moo Zoo
"Yog nej nyiam kuv,
mas nej yuav coj rawv kuv cov lus qhia.
Kuv yuav thov Leej Txiv,
ces nws yuav xa dua ib leeg Nplij neeg los nrog nej nyob mus li.
Kuv Txiv wb yuav los nyob ze nws,
wb yuav ua tsev nyob hauv nws.
Tus tsis nyiam kuv,
nws tsis khaws kuv cov lus.
Lo lus uas nej hnov,
tsis yog kuv lo lus,
yog Leej Txiv uas xa kuv tuaj lo lus.
Thaum kuv tseem nyob ze nej,
kuv hais tej no rau nej.
Tab sis Leej Nplij Neeg,
uas yog Leej Ntuj Plig Ntshiab,
mas Leej Txiv yuav xa nws tuaj vim kuv lub npe,
nws yuav qhia tas ib puas tsav yam rau nej,
thiab nws yuav pab nej rov nco txog tas txhua yam uas kuv tau hais rau nej.
Yog Huab Tais Yes Xus Lub Moo Zoo
){kind=link}