Zaj Nyeem Ib
Mas Kas Npes Ob 12::43-45
Cov lus nyob hauv Ntawv Mas Kas Npes phau Ob
Yus Das sau tau ob txhiab
tawm lub txiag,
nws xa mus rau Yes Lus Xas Les,
kom tau pub ib thaj txi Ntuj them txim txhaum.
Nws ua zoo li ntawd,
vim nws nco txog txoj kev yuav sawv rov qab los.
Yog nws tsis ntseeg tias cov tub rog tuag lawm yuav sawv rov qab los,
mas kev thov Ntuj rau cov tub tuag yog nkim caij nkim zog xwb.
Thiab nws xav tias,
cov neeg tuag nyob hauv txoj kev teev Ntuj mas lawv yuav tau txais paj tshab zoo nkauj.
Yog Tswv Ntuj lo Lus
Nkauj Paj Nruag Txais Ntuj Lus
NPN 41:2,3,5bcd(3a)
Txais: Kuv tus plig nqhis Tswv Ntuj,
nqhis tus Tswv Ntuj muaj txoj sia.
1. Kuv tus Tswv Ntuj,
kuv tus plig seev yees txog koj puav tam li
mos lwj seev yees txog qhov dej txhawv. Teb.
2. Kuv tus plig nqhis Tswv Ntuj,
nqhis tus Tswv Ntuj muaj txoj sia :
thaum twg kuv mam tau mus pom nws lub ntsej muag ? Teb.
3. Kuv hla lub rooj vag coj zeej tsoom nqaum paj nqaum nruas,
hu nkauj lom zem,
thiab cav lus zoo mus hauv Tswv Ntuj tsev. Teb.
Zaj Nyeem Ob
Qhib Yav Tom Ntej 21:1-5a.6b-7
Cov lus nyob hauv Ntawv Qhib Yav Tom Ntej
Ces kuv pom ib lub ntuj tshiab
thiab ib lub ntiaj teb tshiab.
Vim tias thawj lub ntuj
thiab thawj lub ntiaj teb ploj tas lawm.
Hiav txwv kuj tsis nyob ntxiv lawm.
Ces kuv pom lub nroog Ntshiab,
uas yog Yes Lus Xas Les tshiab nqes saum ntuj,
pem Tswv Ntuj los. Nws ua zam sees xws li tus nkauj nyab ntim zam tos nraug vauv.
Kuv hnov ib lub suab tuaj ntawm lub theej kiab tuaj tias :
“Saib !
Tswv Ntuj lub tsev los nrog neeg nyob :
Tswv Ntuj yuav nrog lawv nyob !
Lawv yuav yog nws haiv neeg.
Tswv Ntuj yuav nrog lawv nyob.
Nws yuav so txhua lub kua muag ntws ntawm lawv qhov muag.
Yuav tsis muaj kev tuag ntxiv.
Yuav tsis muaj kev quaj kev nyiav,
kev ntsaj,
kev mob ntxiv.
Vim tas txhua yam muaj sia uas tau xub tshwm sim los,
puav leej ploj tas huv tib si lawm.”
Ces tus zaum saum lub theej kiab hais tias :
“Nej saib !
Kuv tsim dua txhua tsav txhua yam tshiab.”
Kuv yog As Fas
thiab Os Mes Nkas,
yog lub hauv paus
thiab lub ntsis.
Tus twg nqhis,
mas kuv yuav
muab cov dej uas txhawv hauv lub qhov
dej muaj txoj sia pub dawb rau nws.
Tus ntaus yeej,
nws yuav tau txais tej ntawd los ua nws tug.
Kuv yuav yog nws tus Tswv Ntuj,
ces nws yuav yog kuv tus tub.
Yog Tswv Ntuj lo Lus
Nkauj Cav Txog Lub Moo Zoo
Mas Tais 11:25
As les lus yas. As les lus yas.
Txiv, kuv cav lus zoo txog koj,
Huab Tais kav lub ntuj lub teb,
vim koj ho qhib rau cov me nyuam yaus.
As les lus yas.
Ntawv Moo Zoo
Zam 11:17-27
Nej mloog ib zag nyob hauv Zam Ntawv Moo Zoo
Thaum Yes Xus tuaj txog,
nws pom Las Ntxas Los twb zwm ntxa tau plaub hnub lawm.
Npes Tas Nias nyob ze ntawm Yes Lus Xas Les,
kwv yees li kaum tsib ncuas kev.
Cov Yus Das coob leej tuaj xyuas Mas Tas
thiab Mab Liab nkawd,
lawv tuaj nplij nkawd vim nkawd tus nus tuag lawm.
Thaum Mas Tas hnov tias Yes Xus tuaj,
ces Mas Tas mus tos Yes Xus,
hos Mab Liab zaum nyob hauv tsev.
Mas Tas hais rau Yes Xus tias :
"Huab Tais,
yog koj ntxov tuaj txog ntawm no,
mas kuv tus nus yuav tsis tuag.
Tsis kav,
kuv paub tias nyem no,
koj thov yam twg ntawm Tswv Ntuj,
mas Tswv Ntuj yuav muab rau koj."
Yes Xus hais rau Mas Tas tias :
"Koj tus nus yuav sawv rov los."
Mas Tas hais rau Yes Xus tias :
"Kuv paub tias thaum txog Hnub Kawg,
lub caij leej tib neeg lub cev ciaj rov los,
mas nws yuav sawv rov los."
Yes Xus hais rau Mas Tas tias :
"Kuv yog Txoj Kev Sawv Rov Los
thiab yog Txoj Sia :
tus ntseeg txog kuv,
tab yog nws tuag lawm,
nws yuav muaj txoj sia nyob.
Leej twg ua neej nyob ntseeg txog kuv,
nws yuav tsis tuag ib zaug.
Koj puas ntseeg qhov ntawd ?"
Mas Tas hais rau Yes Xus tias :
"Huab Tais,
kuv ntseeg.
Kuv ib txwm
ntseeg hais tias koj yog Leej Pleev,
yog Tswv Ntuj Leej Tub tuaj nyob hauv lub qab ntuj no."
Yog Huab Tais Yes Xus Lub Moo Zoo
 Piv Txwv PEB (Lễ 2/11 - Lễ Ba)){kind=link}