Zaj Nyeem Ib
Kev Tsiv 17:8-13
Cov lus nyob hauv Ntawv Kev Tsiv
Cov As Mas Les tuaj ntaus cov His Xas Lais,
ces lawv sib tawm tsam nyob Les Fis Dis.
Mais Xes hais rau Yos Xuas tias :
"Koj xaiv ib pab txiv neej nrog koj,
tag kis koj tawm mus ntaus cov As Mas Les;
hos kuv,
mas kuv yuav mus nyob saum lub ncov roob,
tuav rawv Tswv Ntuj rab pas ntawm tes."
Yos Xuas ua raws li Mais Xes hais rau nws,
nws tawm mus ntaus cov As Mas Les,
hos Mais Xes,
As Loos thiab Hwm lawv nce mus saum lub ncov roob.
Yog tias Mais Xes tsa nws ob txhais tes twj ywm,
ces tog His Xas Lais yeej,
yog nws tso nws ob txhais tes dauv,
ces tog As Mas Les yeej.
Thaum Mais Xes tsaug leeg npab lawm,
lawv muab ib lub pob zeb los rau Mais Xes zaum.
Mais Xes zaum saum lub pob zeb,
hos As Loos thiab Hwm nkawd txheem nws ob txhais tes,
ib leeg nyob ib sab.
Lawv ua li ntawd ces nws ob txhais tes thiaj tsa tas mus li txog thaum hnub poob qho.
Ces Yos Xuas xuas ntaj los ntaus yeej As Mas Les thiab nws haiv neeg.
Yog Tswv Ntuj lo Lus
Nkauj Paj Nruag Txais Ntuj Lus
NPN 121:1-2,3-4,5-6,7-8(2)
Txais: Huab Tais yog tus pab peb,
nws yog tus tsim lub ntuj,
tsim lub ntiaj teb.
(Nqua Suab Cav Txog Tswv Ntuj, 198)
1. Kuv tsa muag ntsia toj roob hauv pes saib leej twg yuav tuaj pab kuv ?
Tus yuav tuaj pab kuv yog tus Huab Tais tsim lub ntuj lub ntiaj teb. Teb.
2. Thov kom nws txhob cia koj txhais taw npleem.
Tus zov koj,
nws tsis qaug dab ntub.
Tus zov His Xas Lais,
nws tsis qaug dab ntub,
nws tsis tsaug zog. Teb.
3. Huab Tais yog tus zov koj,
nws yog tus duab ntxoov koj.
Nws nyob ntawm koj sab xis.
Nruab hnub,
lub hnub yuav tsis ntaiv koj.
Hmo ntuj, lub hli yuav tsis tsaus koj. Teb.
4. Huab Tais yuav txuag koj ntawm txhua yam phem.
Nws yuav txuag koj txoj sia.
Huab Tais zov koj thaum koj mus thiab thaum koj rov los.
Nws zov koj nyem no mus tas ib txhiab ib txhis. Teb.
Zaj Nyeem Ob
2 Tis Mos Tes 3:14-4:2
Cov lus nyob hauv Yas Kos Tsab Ntawv
Ntawm koj,
mas koj nyob twj ywm hauv txoj kev koj tau kawm,
vim koj paub tias yog qhov tseeb.
Koj paub tias koj tau txais tej yam ntawd ntawm cov xib hwb twg.
Koj yeej paub Ntawv Ntshiab txij thaum yau los.
Cov Ntawv Ntshiab muaj peev xwm pub kev thoob tsib rau koj.
Kev thoob tsib coj yus mus rau kev cawm neeg nyob hauv txoj kev ntseeg txog Yes Xus Pleev.
Tas cov Ntawv Ntshiab huv tib si,
yog Tswv Ntuj tshoj neeg kom muab sau tseg.
Cov Ntawv Ntshiab zoo pab yus qhia txuj,
zoo pab yus tiv cov neeg dag,
pab kho tej zaj yuam kev,
pab mus taug kev ncaj.
Ua li mas,
Tswv Ntuj tus neeg hlob tiav lawm.
Nws muaj txhij muaj txhua pab nws ua cov hauj lwm zoo.
Kuv thov ntuas koj nyob ntawm Tswv Ntuj thiab Yes Xus Pleev xub ntiag.
Yes Xus Pleev yog tus yuav txiav txim rau cov neeg ciaj
thiab cov neeg tuag thaum nws yuav tawm los rau pom xyeem
thiab yuav ua Vaj.
Koj tshaj Lo Lus mog !
Koj qhia Lo Lus tsis tseg,
tsis muaj caij muaj thaum.
Koj tiv cov neeg dag,
koj hem lawv.
Koj ua siab ntev qhuab qhia,
txhob nkees txhob sab.
Koj kub siab qhia sawv daws.
Yog Tswv Ntuj lo Lus
Nkauj Cav Txog Lub Moo Zoo
Hes Nplaws 4:12
As les lus yas. As les lus yas.
Tswv Ntuj lo lus muaj txoj sia.
Nws txawj txiav txim rau lub siab ntshaw
thiab rau tej zaj tswv yim uas nyob hauv neeg nruab siab nruab plawv.
As les lus yas.
(Nqua Suab Cav Txog Tswv Ntuj, 220, nqe 2)
Ntawv Moo Zoo
Lus Kas 18:1-8
Nej mloog ib zag nyob hauv Lus Kas Ntawv Moo Zoo
Yes Xus hais ib zag paj lug rau lawv,
nws qhia lawv tias yuav tsum teev Ntuj tsis tseg,
txhob ntaus siab yau.
Yes Xus hais tias :
Nyob hauv ib lub nroog,
muaj ib tug txwj laus txiav txim,
nws tsis ntshai Tswv Ntuj
thiab tsis hwm leej twg li.
Muaj ib tug poj ntsuam nyob hauv lub nroog ntawd tuaj cuag tus txwj laus txiav txim,
nws hais tias :
"Thov koj pab tsa kuv cai tiv tus neeg ntxub kuv."
Tus txwj laus tsis quav ntsej,
nws ncua ntev ntev.
Tab sis ntev mus nws xav tias :
"Tab yog kuv tsis hwm Tswv Ntuj
thiab tsis ntshai ib tug neeg li,
tsis kav tus poj ntsuam ntawd txob kuv dhau,
kuv yuav tsa nws cai tiv tus ntxub nws,
kom xwv nws txhob tuaj txob kuv
thiab txhob ua kuv dias taub hau ntxiv."
Ces Huab Tais hais tias :
"Nej mloog tus txwj laus txiav txim siab tsis ncaj cov lus saib.
Thaum Tswv Ntuj cov xaiv ua hnub ua hmo hu txog nws tsis tseg,
Tswv Ntuj yuav tsis tsa lawv cai lod ?
Nws yeej ua siab ntev rau lawv.
Kuv hais rau nej,
Tswv Ntuj yuav tsa lawv cai sai sai.
Tab sis thaum Neeg Leej Tub rov los,
nws puas yuav pom neeg ntseeg nyob ntiaj teb ?"
Yog Huab Tais Yes Xus Lub Moo Zoo
){kind=link}