Zaj Nyeem Ib
His Xais 2:1-5
Cov lus nyob hauv Ntawv His Xais
Lo lus ua tus Yaj Saub His Xais,
As Mos tus tub paub txog Yus Das teb
thiab Yes Lus Xas Les.
Yav tom ntej,
yuav muaj ib hnub lub roob uas Huab Tais tsa tsev nyob yuav txawb saum cov roob lub ncov,
nws yuav sawv siab dua cov pov roob.
Tas ib tsoom kuj cuab yuav khiav ua npoj ntws tuaj saum Huab Tais lub roob;
ntau haiv neeg yuav tuaj. Lawv yuav hais tias :
"Nej tuaj !
Peb nce mus pem Yas Kos tus Tswv Ntuj lub tsev !
Kom nws qhia nws tej kev rau peb,
thiab kom peb mus taug nws tej kev."
Tswv Ntuj yuav txiav txim hauv nruab nrab cov kuj cuab.
Nws yuav xaiv nyob hauv ntau haiv neeg.
Lawv yuav muab lawv rab ntaj ob sab ntse los ntaus ua voom,
muab lawv rab hmuv ntaus ua liag.
Thaum ib lub kuj cuab sawv los ntaus lwm lub kuj cuab,
lawv yuav tsis tsa rab ntaj ob sab ntse.
Lawv yuav tsis kawm kev ntaus rog ntxiv.
Cov His Xas Lais sawv daws, nej tuaj !
Peb mus taug Tswv Ntuj txoj kev kaj lug.
Yog Tswv Ntuj lo Lus
Nkauj Paj Nruag Txais Ntuj Lus
NPN 122:1-2,3-4a,6-7,8-9 (1)
(Nqua Suab Cav Txog Tswv Ntuj, 1)
Txais: Nej tuaj,
peb sawv daws zoo siab hom khaj nyob hauv Huab Tais tsev.
1. Thaum kuv hnov lawv hais tias,
“Peb mus pem Huab Tais tsev,”
kuv zoo siab hlo.
Yes Lus Xas Les,
peb nres ntawm koj cov qhov rooj lawm. Teb.
2. Yes Lus Xas Les,
koj yog lub tsheej nyob ruaj nreb muaj hwj chim.
Txhua xeem hauv Huab Tais haiv neeg nce tuaj hauv lub tsheej. Teb.
3. Tas txhua xeem nce tuaj raws li His Xas Lais txoj cai.
Lawv tuaj cav txog Huab Tais lub npe
Vim cov theej kiab txiav txim ncaj nyob hauv koj,
Yog cov theej kiab hauv Das Vis tsev neeg. Teb.
4. Thov kom Yes Lus Xas Les tau nyob thaj yeeb,
kom cov phooj ywg tau nyob tiaj tus,
kom muaj kev thaj yeeb nyob hauv koj cov ntsa loog
thiab muaj kev tiaj tus nyob hauv koj cov tuam tsev.” Teb.
5. Kuv hais rau kuv cov kwv tij phooj ywg hais tias,
“Thov kom kev thaj yeeb roos nej.
Vim kuv nyiam peb tus Huab Tais Tswv Ntuj lub tsev,
Kuv thov kom nej tau nyob kaj lug.” Teb.
Zaj Nyeem Ob
Los Mas 13:11-14
Cov lus Paj Lug sau tuaj rau cov ntseeg nyob Los Mas.
Kwv tij sawv daws,
Nej paub tias nyem no txog lub caij peb yuav tsim hauv nruab dab ntub los.
Nyem no tus cawm peb tuaj txog ze peb dua hnub peb pib ntseeg.
Nyem no,
hmo yuav dhau,
twb yuav kaj ntug.
Peb tso txoj hauj lwm tsaus ntuj pov tseg.
Peb tuav ntaj tuav hmuv mus ua rog nyob hauv qhov pom kev.
Peb yuav coj ib tug cwj pwm muaj tsim,
thiaj li phim cov neeg ua neej nruab hnub.
Peb tsis txhob ua neeg hu dab,
txhob quav dej quav cawv,
txhob ua plees ua yi,
txhob ua yam qias,
txhob sib ceg sib khib.
Nej hnav peb tus Huab Tais Yes Xus Pleev.
Nej tsis txhob ntxhov siab txog nej lub cev,
thiab txhob ua raws lub cev ntshaw.
Yog Tswv Ntuj lo Lus
Nkauj Cav Txog Lub Moo Zoo
NPN 85:8
(Nqua Suab Cav Txog Tswv Ntuj, 223, nqe 1)
As les lus yas. As les lus yas.
Huab Tais,
qhia kom peb paub koj txoj kev hlub
thiab pub koj txoj kev cawm rau peb.
As les lus yas.
Ntawv Moo Zoo
Mas Tais 24:37-44
Nej mloog ib zag nyob hauv Mas Tais Ntawv Moo Zoo
Muaj ib zaug,
Yes Xus hais rau nws cov thwj tim tias :
“Lub caij Neeg Leej Tub yuav rov los nyob,
yuav zoo li thaum Nos Hes ua neej nyob.
Thaum dej tsis tau nyab ntiaj teb,
sawv daws noj,
sawv daws haus,
sawv daws yuav poj niam
thiab muab tej ntxhais pub tshoob mus txog hnub Nos Hes nkag mus hauv lub nkoj.
Zeej tsoom tsis nco faj txog dab tsi mus txog thaum dej tuaj nyab kiag,
thiab tshoob sawv daws tas huv tib si.
Thaum Neeg Leej Tub yuav rov los nyob,
kuj yuav zoo li ntawd thiab.
Ces ob tug neeg uas nyob tom liaj,
luag yuav coj ib tug mus,
tseg lwm tus.
Ob tug poj niam uas tab tom zom zeb,
luag yuav coj ib tug mus,
tseg lwm tus.
“Nej zov hmo mog,
vim nej tsis paub hnub twg nej tus Huab Tais yuav los.
Nej yuav to taub tias :
yog tus tswv tsev paub tias hmo ntuj,
lub sij hawm twg tub sab yuav tuaj,
mas nws yuav zov hmo,
tsis cia tub sab tho qhov tsev.
Nej kuj yuav ua li ntawd,
nej yuav sawb sim kom txhij,
vim Neeg Leej Tub yuav los lub sij hawm uas nej tsis nco faj.
Yog Huab Tais Yes Xus Lub Moo Zoo
