Zaj Nyeem Ib
Xam Phaj 6:22-27
Tswv Ntuj foom hmoov zoo rau leej twg mas leej twg tau txoj hmoo zoo.
Cov lus nyob hauv Ntawv Xam Phaj.
22 Huab Tais hais cov lus no rau Mais Xes :
23 "Koj hais lus rau As Loos thiab nws cov tub, koj hais rau lawv tias : Nej yuav foom hmoov zoo rau cov His Xas Lais, nej yuav foom lus zoo li no rau lawv :
24 'Thov kom Huab Tais foom hmoov zoo rau koj thiab pov hwm koj !
25 Thov kom Huab Tais lub ntsej muag ci ntsa iab rau saum koj thiab pub nws lub txiaj lub ntsim rau koj !
26 Thov kom Huab Tais qhib nws lub ntsej muag rau koj pom thiab pub kev thaj yeeb rau koj !'
27 Koj qhia kom lawv siv kuv lub npe rau saum cov His Xas Lais li no, ces kuv yuav foom hmoov zoo rau lawv."
Yog Tswv Ntuj lo Lus
Nkauj Paj Nruag Txais Ntuj Lus
NPN 67:2-3; 5; 6.8 (2a)
(Nqua Suab Cav Txog Tswv Ntuj, 80)
Txais: Thov kom Tswv Ntuj foom hmoov zoo rau peb thiab khuv leej peb.
1. Thov kom Tswv Ntuj hlub peb thiab foom hmoov zoo rau peb.
Thov koj ua koj lub ntsej muag ci tuaj rau peb.
Lub ntiaj teb thiaj yuav paub koj txoj kev.
Tas txhua haiv neeg yuav paub koj txoj kev cawm. Teb.
2. Tas ib tsoom neeg yuav zoo siab dhia hom khaj
vim koj txiav txim rau cov neeg raws kev ncaj.
Koj tswj cov haiv neeg nyob hauv txoj kev haum pheej. Teb.
3. Tas ib tsoom neeg cav txog Tswv Ntuj,
tsoom laj mej pej xeem ua koj tsaug.
Thov kom Tswv Ntuj foom hmoov zoo rau peb,
Kom npoo ntuj npoo ntiaj teb hwm Tswv Ntuj. Teb.
Zaj Nyeem Ob
Nkas Las Tias 4:4-7
Vim Tswv Ntuj Leej Tub yug ntawm ib tug poj niam los peb thiaj tau kev ua Tswv Ntuj cov tub.
Cov lus leej ntshiab Paj Lug tsab ntawv sau tuaj rau cov ntseeg nyob Nkas Las Tias.
4 Kwv tij sawv daws, Tiam sis nyem no, txog lub caij Ntuj teem, Tswv Ntuj tso nws Leej Tub tuaj yug ntawm ib tug poj niam los. Nws zwm rau Mais Xes Txoj Cai.
5 Nws tuaj txhiv cov uas zwm rau Mais Xes Txoj Cai, kom nws rub tau peb los ua Ntuj cov Tub.
6 Vim nej yog Ntuj cov tub, mas Tswv Ntuj thiaj xa nws Leej Tub lub tswv yim tuaj nyob hauv peb lub siab, nws qw hauv peb nruab siab tias : ‘As Npas, Txiv !’
7 Ua li mas koj tsis yog ib tug tub qhev lawm. Koj yog ib leeg tub cag, mas koj kuj yog tus yuav txais Tswv Ntuj lub cuab tam, vim Tswv Ntuj pub li ntawd.
Yog Tswv Ntuj lo Lus
Nkauj Cav Txog Lub Moo Zoo
Hes Nplaws 1:1-2
(Nqua Suab Cav Txog Tswv Ntuj, 230, nqe 1)
As les lus yas. As les lus yas. Txheej thaud, Tswv Ntuj tau kom Nws cov yaj saub siv ntau txoj kev cev Nws cov lus rau peb cov yawg koob ntau zaus. Nyem no, Nws thiaj xa Nws Leej Tub tuaj cev lus rau peb. As les lus yas.
Ntawv Moo Zoo
Lus Kas 2:16-21
Tej xwm tshwm sim thaum Yes Xus yug los, Mab Liab khaws tib si tseg hauv nws nruab siab.
Nej mloog ib zag nyob hauv leej ntshiab Lus Kas Ntawv Moo Zoo
16 Cov zov yaj rov mus Npes Les Hes. Lawv pom Mab Liab thiab Yos Xes, thiab pom tus me nyuam mos pw hauv dab nyuj.
17 Thaum lawv pom li ntawd, lawv piav lo lus uas tus Tshiab tau qhia rau lawv txog tus me nyuam.
18 Tus twg hnov, tus twg kuj qhuas txog tej lus uas cov zov yaj hais rau lawv.
19 Hos Mab Liab, nws ua tib zoo khaws tej lus no huv si cia rau nruab siab.
20 Cov zov yaj rov mus tsev, lawv foom koob meej thiab cav lus zoo txog Tswv Ntuj vim tas txhua yam lawv tau pom thiab tau hnov raws li Ntuj qhia lawv.
21 Thaum dhau lub caij yim hnub lawm, txog hnub ua lub cim txiav, lawv tis npe rau tus me nyuam hu ua Yes Xus, yog lub npe uas tus Tshiab tau qhia Mab Liab thaum nws tsis tau xeeb tub.
Yog Huab Tais Yes Xus Lub Moo Zoo
){kind=link}