Zaj Nyeem Ib
His Xais 52:7-10
Npoo ntuj npoo ntiaj teb pom peb tus Tswv Ntuj txoj kev cawm neeg.
Cov lus nyob hauv ntawv yaj saub His Xais
7 Tus xa lub Moo Zoo pem hauv sab tuaj, nws ob txhais taw zoo nkauj. Nws tshaj tias kev thaj yeeb tuaj lawm ! Nws qhia sawv daws paub tias kev noj qab nyob zoo tuaj txog lawm, nws tuaj tshaj kev cawm neeg. Nws hais rau Xis Yoos tias : "Koj tus Tswv Ntuj ua vaj !"
8 Koj mloog mas ! Koj cov neeg zov keeb tsa suab, lawv ua ke qw zoo siab vim lawv pom xyeem ntawm qhov muag, Huab Tais rov qab los nyob Xis Yoos.
9 Yes Lus Xas Les cov tsev uas tau pob tas, nej sawv daws luag ua suab ntas ntua, vim Huab Tais nplij nws haiv neeg, nws txhiv Yes Lus Xas Les.
10 Tus Huab Tais Ntshiab loj npab ntshuas nyob ntawm txhua haiv neeg xub ntiag. Npoo ntuj npoo ntiaj teb pom peb tus Tswv Ntuj txoj kev cawm neeg.
Yog Tswv Ntuj lo Lus
Txais Ntuj Lus
NPN 98:1, 2-3a, 3b-4, 5-6 (3c)
(Nqua Suab Cav Txog Tswv Ntuj, 143)
Txais: Npoo ntuj npoo ntiaj teb pom txoj kev cawm neeg tuaj ntawm Tswv Ntuj tuaj.
1. Nej hu ib zag nkauj tshiab rau Huab Tais
Vim nws ua dej num muaj tsim nto moo.
Nws sab xis muaj zog, nws sab npab ntshiab ua kom nws yeej. Teb.
2. Huab Tais ua kom sawv daws paub nws txoj kev cawm neeg.
Nws muab nws txoj kev ncaj rau ib tsoom haiv neeg pom.
Nws nco ntsoov txog nws lub siab hlub neeg.
Nws pheej xeeb rau His Las Lais lub cuab lub yig. Teb.
3. Npoo ntuj npoo ntiaj teb pom peb tus Tswv Ntuj txoj kev cawm neeg.
Ntiaj teb nrag cais, nej hu nkauj cav txog Huab Tais.
Nej nqua suab nkauj ntxuag suab paj nruag. Teb.
4. Nej ntaus nkauj nog ncas rau Huab Tais !
Nej ntaus nkauj nog ncas ntxuag suab thaj cheej !
Nej tshuab xyu tshuab hom ntxuag suab kub nyuj !
Nej dhia hom khaj cav txog tus vaj vim nws yog peb tus Huab Tais. Teb.
Zaj Nyeem Ob
Hes Nplaws 1:1-6
Tswv Ntuj tso nws Leej Tub tuaj cev Tswv Ntuj cov lus rau peb hnov.
Cov lus nyob hauv tsab ntawv sau tuaj rau cov ntseeg nyob Hes Nplaws
1 Puag thaum ub, Tswv Ntuj kom cov Yaj Saub siv ntau txoj kev los cev nws cov lus rau peb cov yawg koob ntau zaus kawg.
2 Lub zim txwv no, txog lub zwj ceeb kawg lawm, Tswv Ntuj thiaj tso nws Leej Tub tuaj cev nws cov lus rau peb. Tswv Ntuj tsa Leej Tub ua tus txais lub cuab tam tas huv tib si, thiab nws nrog Leej Tub tsim lub sim ceeb.
3 Leej Tub yog Tswv Ntuj lub hwj chim ci ntsa iab, yog Tswv Ntuj tus duab. Leej Tub lo lus muaj zog, Leej Tub nres tas lub sim ceeb huv tib si. Nws ntxuav txhua txoj kev txhaum pov tseg huv tib si, ces nws zaum ntawm tus Tswv Ntuj muaj hwj huam sab xis nyob txheej ntuj saud.
4 Nws loj dua ib tsoom Tshiab, vim nws tau txais ib lub npe zoo, lub npe muaj hwj chim loj dua cov Tshiab tej npe huv tib si.
5 Nej xav saib puas muaj ib tug Tshiab uas Tswv Ntuj tau hais rau nws tias : “Koj yog kuv Leej Tub, hnub no kuv xeeb koj.” Thiab Tswv Ntuj tseem hais rau nws tias : “Kuv yog nws Txiv, nws yog kuv Leej Tub.”
6 Thaum Tswv Ntuj xa nws Leej Tub tuaj ua tus Xub Yug los nyob hauv lub sim ceeb no, mas nws tseem rov qab hais dua tias : “Kuv xav kom tas Tswv Ntuj tsoom Tshiab hawm nws.”
Yog Tswv Ntuj lo Lus
Nkauj Cav Txog Lub Moo Zoo
His Xais 9:1
(Nqua Suab Cav Txog Tswv Ntuj, 228, nqe 1)
As les lus yas. As les lus yas. Hnub no yog hnub ntshiab, tuaj peb mus hawm Huab Tais. Ib qho pom kev loj ci tuaj rau ntiaj teb lawm. As les lus yas.
Ntawv Moo Zoo ( bài dài )
Zam 1:1-18
Yes Xus yog Tswv Ntuj Leej Lo Lus tsim ntuj tsim teb thiab yuav ib lub cev neeg. Nws nrog peb nyob.
Nej mloog ib zag nyob hauv leej ntshiab Zam Ntawv Moo Zoo
1 Thaum lub hauv paus, Leej Lo Lus yeej nyob txawm lawm. Leej Lo Lus nyob ze Tswv Ntuj. Leej Lo Lus yog Tswv Ntuj.
2 Thaum lub hauv paus, Leej Lo Lus nyob ze Tswv Ntuj.
3 Tas ib puas tsav yam tshwm los vim nws. Yog tsis muaj nws, mas tsis muaj ib yam dab tsi tshwm tau los nyob.
4 Txoj sia xeeb txawm nyob hauv nws. Txoj sia yog neeg qhov pom kev.
5 Ces qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev.
6 Muaj ib tug neeg tuaj, yog Tswv Ntuj xa nws tuaj. Nws lub npe hu ua Zam.
7 Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws.
8 Tus ntawd tsis yog qhov pom kev, tab sis nws yuav ua tim khawv txog qhov pom kev.
9 Qhov pom kev uas yog qhov tseeb, ci tuaj ziab txhua leej tib neeg, nws tuaj nyob hauv lub sim ceeb.
10 Nws yeej nyob txawm hauv lub sim ceeb no. Yog nws ua kom muaj lub sim ceeb no tshwm los, tsis kav lub sim ceeb tsis paub nws.
11 Nws los nyob hauv nws tsev, tsis kav nws cov neeg tsis txais nws.
12 Tab sis, cov neeg uas txais nws thiab ntseeg txog nws lub npe, mas nws pub hwj huam rau lawv kom los ua Tswv Ntuj cov me nyuam tas huv tib si.
13 Cov ntawd, yog cov uas tsis yug ntawm ntshav los, tsis yog lub cev nqaij xav kom lawv yug los, thiab kuj tsis yog neeg lub siab xav kom lawv yug los. Lawv yog cov yug ntawm Tswv Ntuj los.
14 Ces Leej Lo Lus xeeb los ua ib lub cev neeg, nws nrog peb nyob. Peb tau ntsia ntsoov nws lub hwj chim. Yog lub hwj chim uas Leej Tub twm zeej tau ntawm Leej Txiv los. Leej Tub muaj txiaj ntsim thiab qhov tseeb nyob puv hauv nws.
15 Zam ua tim khawv txog Leej Lo Lus : Zam tshaj hais tias : "Tus no yog tus kuv hais txog tias, tus uas lawv kuv qab tuaj, mus ua kuv ntej lawm, vim nws xub nyob dua kuv."
16 Peb puav leej tau txais qhov txhawv nphau nphwv hauv nws los : peb txais txiaj ntsim sis laub sis lug.
17 Txoj Cai yog Mais Xes muab, hos lub txiaj ntsim thiab txoj kev tseeb yog Yes Xus Pleev coj tuaj.
18 Tsis muaj leej twg tau pom Tswv Ntuj ib zaug. Tab sis Leej Tub Twm Zeej uas yug ntawm Tswv Ntuj los, thiab nws nyob nraim hauv Leej Txiv lub xub ntiag, nws ua kom peb paub Tswv Ntuj.
Yog Huab Tais Yes Xus Lub Moo Zoo
Ntawv Moo Zoo ( bài ngắn )
Zam 1:1-5.9-14
Nej mloog ib zag nyob hauv leej ntshiab Zam Ntawv Moo Zoo
1 Thaum lub hauv paus, Leej Lo Lus yeej nyob txawm lawm. Leej Lo Lus nyob ze Tswv Ntuj. Leej Lo Lus yog Tswv Ntuj.
2 Thaum lub hauv paus, Leej Lo Lus nyob ze Tswv Ntuj.
3 Tas ib puas tsav yam tshwm los vim nws. Yog tsis muaj nws, mas tsis muaj ib yam dab tsi tshwm tau los nyob.
4 Txoj sia xeeb txawm nyob hauv nws. Txoj sia yog neeg qhov pom kev.
5 Ces qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev.
9 Qhov pom kev uas yog qhov tseeb, ci tuaj ziab txhua leej tib neeg, nws tuaj nyob hauv lub sim ceeb.
10 Nws yeej nyob txawm hauv lub sim ceeb no. Yog nws ua kom muaj lub sim ceeb no tshwm los, tsis kav lub sim ceeb tsis paub nws.
11 Nws los nyob hauv nws tsev, tsis kav nws cov neeg tsis txais nws.
12 Tab sis, cov neeg uas txais nws thiab ntseeg txog nws lub npe, mas nws pub hwj huam rau lawv kom los ua Tswv Ntuj cov me nyuam tas huv tib si.
13 Cov ntawd, yog cov uas tsis yug ntawm ntshav los, tsis yog lub cev nqaij xav kom lawv yug los, thiab kuj tsis yog neeg lub siab xav kom lawv yug los. Lawv yog cov yug ntawm Tswv Ntuj los.
14 Ces Leej Lo Lus xeeb los ua ib lub cev neeg, nws nrog peb nyob. Peb tau ntsia ntsoov nws lub hwj chim. Yog lub hwj chim uas Leej Tub twm zeej tau ntawm Leej Txiv los. Leej Tub muaj txiaj ntsim thiab qhov tseeb nyob puv hauv nws.
Yog Huab Tais Yes Xus Lub Moo Zoo
){kind=link}