Zaj Nyeem Ib
His Xais 7:10-14
Cov lus nyob hauv Ntawv His Xais
Huab Tais kom His Xais rov mus hais rau As Kas :
"Koj thov koj tus Huab Tais Ntuj kom nws
ua ib lub cim rau koj nyob puag hauv qab ntuj txias teb tsaus,
los nyob saum cov chaw siab,
puag saum ub."
As Kas hais tias :
"Kuv yuav tsis thov. Kuv yuav tsis sim Huab Tais."
His Xais hais tias :
"Das Vis tsev neeg,
nej mloog mas !
Nej ua kom tej tib neeg sab tas nrho,
los tsis txaus nej siab !
Nej tseem yuav ua kom Tswv Ntuj sab thiab.
Vim li ntawd,
Huab Tais yuav pub ib lub cim rau nej.
Nej ntsia saib !
Tus poj niam hluas xeeb tub lawm.
Nws yuav yug ib tug tub.
Nws yuav tis npe rau nws tus tub hu ua Es Mas Nus Es.
Yog Tswv Ntuj lo Lus
Nkauj Paj Nruag Txais Ntuj Lus
NPN 24:1-2,3-4ab,5-6 (7c,10b)
(Nqua Suab Cav Txog Tswv Ntuj, 4)
Txais: Nej qhib lub rooj vag rau Huab Tais chaws los
vim nws yog tus vaj nto koob meej.
1. Lub ntiaj teb
thiab txhua yam uas nyob hauv lub sim ceeb yog Huab Tais li.
Lub qab ntuj khwb
thiab tas tsoom neeg nyob hauv yog Huab Tais tug.
Huab Tais yog tus txawb lub ntiaj teb rau saum dej hiav txwv.
Nws tsa lub ntiaj teb ruaj rau saum npoo dej. Teb.
2. Leej twg thiaj yuav tau nce mus saum Huab Tais lub roob?
Leej twg thiaj yuav sawv taus nyob hauv nws lub chaw ntshiab?
Yog tus neeg siab huv tes tsis lo txhaum,
Tus uas lub siab tsis xib rau qhov phem,
Tus tsis twv ntuj twv teb cog lus cuav. Teb.
3. Nws yuav tau txais Huab Tais lo lus foom hmoov zoo
uas yog txiaj ntsim paj tshab tuaj ntawm nws tus Huab Tais Cawm Seej tuaj.
Haiv neeg nrhiav Tswv Ntuj yuav tau txais nws tej paj tshab
Vim lawv nrhiav Yas Kos tus Tswv Ntuj lub ntsej muag. Teb.
Zaj Nyeem Ob
Los Mas 1:1-7
Pib chiv Paj Lug tsab ntawv sau tuaj rau cov ntseeg Los Mas.
Kuv yog Paj Lug,
Yes Xus Pleev tus tub txib.
Ntuj hu kuv los ua Hauv Paus Xa Lus,
Ntuj qee kuv los tshaj Tswv Ntuj lub Moo Zoo.
Tau ntev los lawm Tswv Ntuj tau cog lus tias nws yuav xa nws lub Moo Zoo,
nws tso cov Yaj Saub
thiab cov Ntawv Ntshiab tuaj hais txog nws Leej Tub,
uas yug hauv Das Vis caj ces los.
Leej Ntuj Plig Ntshiab tsa peb tus Huab Tais Yes Xus Pleev
uas tuag lawd kom sawv rov los
ua Tswv Ntuj Leej Tub muaj hwj huam.
Peb txais txiaj ntsim ntawm Yes Xus los,
nws tsa peb ua Hauv Paus Xa Lus kom peb mus tshaj txoj kev mloog lus,
thiab txoj kev ntseeg rau cov pej kum neeg paub.
Nej kuj yog pab neeg ntawd :
Yes Xus Pleev hu nej los ua nws tug.
Kuv,
Paj Lug,
sau ntawv tuaj rau nej,
uas nej yog cov neeg Tswv Ntuj nyiam nyob Los Mas,
nws hu nej los ua neeg ntshiab :
thov kom peb Txiv Tswv Ntuj,
thiab Huab Tais Yes Xus Pleev pub txiaj ntsim
thiab kev thaj yeeb rau nej.
Yog Tswv Ntuj lo Lus
Nkauj Cav Txog Lub Moo Zoo
Mas Tais 1:23
(Nqua Suab Cav Txog Tswv Ntuj, 227, nqe 2)
As les lus yas. As les lus yas.
Ib tug Nkauj Ntshiab yuav yug ib tug tub,
nws lub npe yuav hu ua “Es Mas Nus Es,
Huab Tais Ntuj nrog peb nyob.”
As les lus yas.
Ntawv Moo Zoo
Mas Tais 1:18-24
Nej mloog ib zag nyob hauv Mas Tais Ntawv Moo Zoo
Yes Xus Pleev lub keeb chiv zoo li no :
Mab Liab uas yog Yes Xus niam,
lawv muab qhaib rau Yos Xes lawm.
Thaum nkawd tseem tsis tau los nyob ua ke,
Leej Ntuj Plig Ntshiab ua kom Mab Liab xeeb tub.
Yos Xes uas yog Mab Liab tus txiv,
yog ib tug neeg ncaj,
nws tsis xav kom zeej tsoom hais lus xaiv txog Mab Liab,
ces nws txiav siab nrauj Mab Liab twj ywm.
Thaum nws txiav siab nrauj li ntawd,
Huab Tais tus Tub Xo tawm los ua npau suav rau nws,
thiab hais rau nws tias :
Yos Xes,
Das Vis leej tub,
koj txhob ntshai coj Mab Liab,
koj tus poj niam,
los nyob hauv koj tsev.
Yog Leej Ntuj Plig Ntshiab ua kom nws xeeb tub.
Nws yuav yug ib tug tub,
koj yuav tis nws npe hu ua Yes Xus :
vim nws yuav cawm nws haiv neeg ntawm lawv cov txhaum."
Tas ib puas tsav yam ntawd tshwm sim raws li lo lus
uas Huab Tais kom tus yaj saub xub hais tseg tias :
Tus ntxhais nkauj xwb yuav xeeb tub,
nws yuav yug ib tug tub.
Luag yuav tis nws npe hu ua Es Mas Nus Es,
txhais tias :
"Tswv Ntuj nrog peb nyob".
Thaum Yos Xes tsim los,
nws ua raws li Huab Tais tus Tshiab qhia rau nws :
nws coj nws poj niam los nyob hauv nws tsev.
Yog Huab Tais Yes Xus Lub Moo Zoo
