Zaj Nyeem Ib
His Xais 8:23-9:3
Cov lus nyob hauv Ntawv His Xais
Yav thaud,
Tswv Ntuj tsu tso Ntxas Npws Loos teb raug kev txaj muag ntau.
Tab sis yav tom ntej Tswv Ntuj yuavv ua kom lub teb chaws nto moo :
yog lub teb chaws nyob ntawm kev mus rau lub hiav txwv,
yog Nkas Lis Lais teb.
Haiv neeg uas yav tas no lawv maub kev tsaus ntuj,
nyem no lawv pom ib qho pom kev loj.
Ib teg tsau loj ci tuaj kaj cov neeg nyob hauv lub teb chaws tsaus ntuj.
Huab Tais,
koj tau ua kom lawv zoo siab tuaj,
kom lawv qw suab lom zem.
Lawv ua si nyob ntawm koj xub ntiag,
ib yam li luag ua si thaum lub caij sau qoob loo.
Tus quab hnyav lawv xwb pwg,
thiab tus ntas uas lawv laj kwv,
thiab rab qws uas cov yeeb ncuab tuav,
mas koj muab lov tib si.
Yog Tswv Ntuj lo Lus
Nkauj Paj Nruag Txais Ntuj Lus
NPN 27:1,4,13-14(1a)
(Nqua Suab Cav Txog Tswv Ntuj, 42)
Txais: Huab Tais yog kuv qhov pom kev,
nws yog tus cawm kuv.
1. Huab Tais yog kuv qhov pom kev.
Nws yog tus cawm kuv, kuv yuav ntshai leej twg ?
Huab Tais yog lub yeej ntsa zeb thaiv kuv lub neej,
kuv yuav ntshai leej twg ? Teb.
2. Muaj ib yam kuv thov ntawm Huab Tais,
yog thov kom kuv tau nyob hauv Huab Tais tsev tas kuv sim neej,
kom kuv tau ntsia ntsoov Huab Tais txoj kev hlub
thiab tsob hwb nws lub tuam tsev. Teb.
3. Kuv paub tseeb tias kuv yuav tau pom Huab Tais lub siab zoo
nyob hauv cov neeg ciaj lub teb chaws.
Koj tos ntsoov Huab Tais,
koj tua siab loj,
koj tos ntsoov nws mog. Teb.
Zaj Nyeem Ob
1 Kos Lis Nthos 1:10-13,17
Cov lus nyob hauv Kos Lis Nthos Tsab Ntawv Ib.
Kwv tij sawv daws,
kuv tuav txog peb tus Huab Tais Yes Xus Pleev lub npe thov nej,
kom nej sawv daws koom siab koom ntsws.
Txhob muaj kev sib ncaim nyob hauv nej pab neeg.
Nej yuav hais kom sib haum.
Kuv cov kwv tij,
kuv hnov cov nyob Kos Los Es hais tias,
muaj lus tsis sib haum nyob hauv nej.
Kuv hnov tias nej nyias hais nyias tias :
‘Kuv yog Paj Lug tog !’
‘Kuv yog As Pos Los tog !’
‘Kuv yog Kes Fas tog !’
‘Kuv yog Leej Pleev tog !’
Leej Pleev puas ua ob peb tog ?
Puas yog Paj Lug tuag nyob saum ntoo cuam kom tau pab nej ?
Nej puas tau txais lub Cim Ntxuav nyob hauv Paj Lug lub npe ?
Leej Pleev tsis xa kuv mus ua lub Cim Ntxuav,
nws xa kuv mus tshaj Ntuj lus ;
kom kuv txhob muab tej lo lus thoob tsib zoo mloog los tshaj nws lus,
kom kuv txhob saib Leej Pleev tus ntoo cuam tsis muaj nuj nqis hnyav.
Yog Tswv Ntuj lo Lus
Nkauj Cav Txog Lub Moo Zoo
Mas Tais 4:23
(Nqua Suab Cav Txog Tswv Ntuj, 238, nqe 10)
As les lus yas. As les lus yas.
Yes Xus tshaj Lub Moo Zoo hais txog Huab Tais Ntuj lub Ceeb Tsheej.
Nws kho cov neeg tuaj cuag nws,
lawv tej mob zoo hlo.
As les lus yas.
Ntawv Moo Zoo
Mas Tais 4:12-23
Nej mloog ib zag nyob hauv Mas Tais Ntawv Moo Zoo
Yes Xus hnov tias luag ntes Zam lawm,
ces nws rov mus Nkas Lis Lais.
Nws tso Nas Xas Las tseg,
nws mus nyob ruaj rau Kas Fas Naus,
ntawm ntug dej ntuj,
nyob ntawm Ntxas Npus Loos
thiab Nes Tas Lis ciam teb.
Li ntawd muaj raws li yaj saub His Xais xub hais tias :
Ntxas Npus Loos daim av,
Nes Tas Lis daim av,
kev mus rau dej ntuj,
cov teb chaws nyob sab dej Yos Las Das tim ub,
cov neeg teev pej kum dab uas nyob Nkas Lis Lais !
Haiv neeg nyob hauv kev tsaus ntuj pom ib qho pom kev cig loj loj kaj cov neeg maub hauv tub tuag lub teb chaws tsaus ntuj,
ib qho pom kev ci tawm tuaj lawm.
Txij ntawd los,
Yes Xus pib ceeb toom hais tias :
"Nej hloov siab mog,
vim Ntuj lub Ceeb Tsheej los txog ze lawm."
Yes Xus mus ko taw taug ntug dej ntuj Nkas Lis Lais,
nws pom ob kwv tij :
Xis Moos uas hu ua Pob Zeb,
thiab nws tus kwv As Nres.
Nkawd tseem tab tom pov vas ntses rau hauv dej ntuj,
vim nkawd yog tub puav ntses.
Yes Xus hais rau nkawd tias :
"Neb raws kuv mus,
kuv yuav tsa neb ua tub puav neeg."
Nkawd tso plhuav cov vas ntses tam sis ntawd,
nkawd raws Yes Xus mus.
Yes Xus mus ntxiv,
nws ho pom ob kwv tij ntxiv :
Yas Kos,
uas yog Ntxes Npes Dais tus tub,
thiab Zam uas yog Yas Kos tus kwv,
nkawd nrog nkawd txiv Ntxes Npes Dais nyob hauv nkoj,
lawv tseem tab tom ntxiv lawv cov vas ntses.
Yes Xus hu nkawd.
Tam sis ntawd,
nkawd tso plhuav lub nkoj
thiab nkawd txiv tseg,
nkawd raws Yes Xus mus.
Yes Xus ncig thoob lub xeev Nkas Lis Lais,
nws qhia zeej tsoom nyob hauv cov tsev txoos,
nws tshaj lub Moo Zoo txog Ntuj lub Ceeb Tsheej.
Nws kho tas puas tsav yam mob,
tas puas tsav yam txiab nkeeg hauv tsoom pej xeem zoo tas.
Yog Huab Tais Yes Xus Lub Moo Zoo
