Zaj Nyeem Ib
His Xais 58:7-10
Cov lus nyob hauv Ntawv His Xais.
Huab Tais hais lo lus li no :
Yog koj muab koj cov mov los faib rau tus neeg tshaib noj,
yog koj cheem cov txom nyem tsis muaj chaw nkaum kom lawv nyob hauv koj tsev,
yog koj muab ris tsho rau tus koj pom liab qab hnav,
yog koj tsis tig nraub qaum rau tus muaj lub cev nqaij zoo li koj.
Yog koj ua li ntawd,
mas qhov pom kev yuav txhawv xws li hnub tuaj.
Koj lub qhov txhab yuav nqawm sai,
koj txoj kev ncaj yuav mus ua koj ntej.
Huab Tais lub hwj chim yuav hwj koj.
Yog koj hu mas Huab Tais yuav teb,
yog koj qw tias :
"Tsuag tsuag tuaj tsom kwm kuv."
Nws yuav hais tias :
"Kuv nyob ntawm no."
Yog koj tshem rab quab ntawm koj tsev mus,
yog koj tsis tsa tes hem luag,
yog koj tsis hais cov lus phem.
Yog koj faib koj cov mov rau tus neeg tshaib noj,
yog koj pub dej rau tus neeg nqhis haus,
mas koj qhov pom kev yuav sawv nyob hauv qhov tsaus ntuj.
Koj qhov tsaus ntuj yuav pom kev nrig li lub hnub thaum tav su.
Yog Tswv Ntuj lo Lus
Nkauj Paj Nruag Txais Ntuj Lus
NPN 112:4-5,6-7,8-9(4a)
(Nqua Suab Cav Txog Tswv Ntuj, 44)
Txais: Tus neeg siab ncaj yog lub teeb ci hauv qhov tsaus ntuj rau tsoom neeg siab ncaj.
1. Tus neeg ncaj ci hauv qhov tsaus ntuj rau cov neeg siab ncaj.
Nws khuv leej luag,
nws zam rau luag,
nws ua txhaum yam ncaj ncees.
Tus neeg txawj hlub luag
thiab qiv rau luag mas nws txoj hmoov zoo.
Nws tswj nws tej nyiaj txiag raws kev ncaj. Teb.
2. Tus neeg ncaj yuav tsis ntog;
sawv daws yuav nco ntsoov txog nws mus li.
Nws yuav tsis ntshai cov lus luag liam rau nws.
Nws lub siab ruaj khov,
nws tso siab rau Huab Tais. Teb.
3. Tus siab ncaj lub siab tawv,
nws tsis txhawj.
Nws siab dav,
nws pub ntau rau cov pluag.
Nws txoj kev ncaj yuav nyob mus li.
Nws yuav tsa taub hau txais koob meej. Teb.
Zaj Nyeem Ob
1 Kos Lis Nthos 2:1-5
Cov lus nyob hauv Kos Lis Nthos Tsab Ntawv Ib.
Kwv tij sawv daws,
ntawm kuv mas,
thaum kuv tuaj tim nej,
kuv tsis tau siv ib co lus muaj hwj chim
thiab ib co lus thoob tsib los tshaj Tswv Ntuj lub txiaj ntsim rau nej.
Thaum kuv nrog nej nyob,
kuv tsuas xav paub Yes Xus Pleev,
paub tus Yes Xus Pleev tuag nyob saum ntoo cuam xwb.
Thaum kuv tuaj cuag nej,
kuv yog tus tsis muaj zog,
yog tus neeg txhawj tshee na.
Kuv tej lus,
thiab lub Moo Zoo kuv xa tuaj,
tsis zoo li kev Thoob Tsib cov lus txawj ntxias neeg.
Kuv tej lus yog ib zag txuj tawm hauv Leej Tswv Yim
thiab hauv lub Hwj Huam los,
kom nej txoj kev ntseeg txawb rau saum Tswv Ntuj lub hwj huam,
tsis txhob txawb rau saum neeg kev thoob tsib.
Nkauj Cav Txog Lub Moo Zoo
Zam 8:12
(Nqua Suab Cav Txog Tswv Ntuj, 235, nqe 1)
As les lus yas. As les lus yas.
Yes Xus hais tias,
“Kuv yog txoj kev kaj lub qab ntuj.
Leej twg lawv kuv qab yuav muaj kev kaj nws lub neej.
As les lus yas.
Ntawv Moo Zoo
Mas Tais 5:13-16
Nej mloog ib zag nyob hauv Mas Tais Ntawv Moo Zoo
Muaj ib zaug,
Yes Xus hais rau nws cov thwj tim tias :
"Nej yog cov ntsev las lub ntiaj teb.
Tab sis yog ntsev tsuag lawm,
yuav muab dab tsi ua kom ntsev rov qab daw tuaj ?
Ntsev tsuag tsis zoo ua dab tsi,
tsuas kawg muab pov tseg nraum zoov rau neeg tsuj xwb.
"Nej yog lub teeb ci rau lub ntiaj teb.
Ib lub nroog txhim rau saum ib lub ncov roob,
yuav muab zais tsis tau.
Hos,
luag kuj tsis taws teeb coj mus zais rau hauv qab txee,
luag muab txawb saum tus ncej teeb,
lub teeb ci rau tas cov neeg nyob hauv tsev pom kev.
Li ntawd,
nej lub teeb yuav tsum ci nyob ntawm zeej tsoom xub ntiag,
kom lawv pom nej cov dej num zoo,
ces lawv yuav cav txog nej Txiv nyob saum ntuj.
Yog Huab Tais Yes Xus Lub Moo Zoo
