Zaj Nyeem Ib
His Xais 49:3,5-6
Cov lus nyob hauv Ntawv His Xais
Huab Tais hais rau kuv tias :
"His Xas Lais,
koj yog kuv tus tub txib,
kuv lub koob meej yuav nto nyob hauv koj."
Nyem no,
Huab Tais hais lus lawm.
Nws yog tus puab kuv nyob hauv kuv niam nrog cev kom kuv tau ua nws tus tub txib.
Kom tau coj Yas Kos rov los cuag nws,
kom His Xas Lais rov qab los nrog nws nyob ua ke.
Vim kuv muaj nqis nyob ntawm Huab Tais xub ntiag,
thiab Tswv Ntuj yog kuv lub zog."
Tswv Ntuj hais tias :
"Koj yog kuv tus tub txib,
koj rov tsa cov xeem Yas Kos kom sawv,
thiab koj coj cov His Xas Lais uas kuv txuag kom lawv rov qab los.
Qhov ntawd yog qhov tsawg.
Kuv tseem xaiv koj kom koj ua lub teeb ci ntsa kaj cov kuj cuab.
Kom kuv txoj kev cawm mus txog npoo ntiaj teb.
Yog Tswv Ntuj lo Lus
Nkauj Paj Nruag Txais Ntuj Lus
NPN 40:2,4,7-8a,8b-9,10(8a,9a)
(Nqua Suab Cav Txog Tswv Ntuj, 41)
Txais: Tswv Ntuj,
kuv nyob ntawm no.
Kuv yuav ua raws li koj lub siab nyiam.
1. Kuv tos ntsoov Huab Tais !
Nws khoov los ze kuv
thiab nws hnov kuv lub suab.
Nws tso ib zag nkauj tshiab rau hauv kuv lub ncauj,
yog zaj nkauj cav txog peb tus Tswv Ntuj. Teb.
2. Koj qhib kuv pob ntseg kom kuv hnov koj cov lus.
Koj tsis xav yuav tsiaj
thiab txhiam xws txi rau koj.
Koj tsis kom kuv hlawv tsiaj los them txim txhaum.
Kuv thiaj hais tias, “Koj saib, kuv tuaj cuag koj.” Teb.
3. Kuv tus Tswv Ntuj,
kuv yuav ua raws li cov lus koj sau tseg rau kuv nyob hauv kauj ntawv.
Kuv zoo siab ua raws li koj qhia.
Koj txoj cai nyob rawv hauv kuv nruab siab. Teb.
4. Kuv tshaj koj txoj kev ncaj nyob hauv cov txoos.
Huab Tais,
koj paub tias kuv yeej tsis cheem kuv di ncauj. Teb.
Zaj Nyeem Ob
1 Kos Lis Nthos 1:1-3
Cov lus nyob hauv Kos Lis Nthos Tsab Ntawv Ib.
Kuv yog Paj Lug,
tus uas Tswv Ntuj pom zoo hu los ua Yes Xus Pleev tus Hauv Paus Xa Lus.
Tus kwv Xos Thes Nos wb sau ntawv tuaj rau Tswv Ntuj lub Koom Txoos nyob Kos Lis Nthos.
Wb sau ntawv tuaj rau cov ntshiab,
nyob hauv Yes Xus Pleev,
rau cov uas Ntuj hu lawv los ua neeg ntshiab,
nrog tas txhua leej uas nyob tas qhov txhia chaw tuav txog peb tus Huab Tais Yes Xus Pleev lub npe.
Thov kom peb Txiv Tswv Ntuj
thiab Huab Tais Yes Xus Pleev pub txiaj ntsim
thiab kev thaj yeeb rau nej.
Yog Tswv Ntuj lo Lus
Nkauj Cav Txog Lub Moo Zoo
Zam 1:14a,12a
(Nqua Suab Cav Txog Tswv Ntuj, 236, nqe 3)
As les lus yas. As les lus yas.
Leej Lo Lus xeeb ua ib lub cev neeg nrog peb nyob.
Cov txais nws thiab ntseeg txog nws lub npe,
nws pub hwj huam kom lawv los ua Ntuj cov me nyuam.
As les lus yas.
Ntawv Moo Zoo
Zam 1:29-34
Nej mloog ib zag nyob hauv Zam Ntawv Moo Zoo
Hnub tom qab,
Zam pom YesXus tuaj ze ntawm nws,
nws hais tias :
"Nej ntsia Tswv Ntuj tus Yaj,
tus daws qab ntuj neeg cov txhaum.
Tus ntawd yog tus uas kuv hais txog nws tias :
Muaj ib tug neeg lawv kuv qab,
nws yuav tuaj,
nws twb huas kuv ntej lawm,
vim nws xub nyob dua kuv.
Kuv tsis tau paub nws,
tab sis kuv tuaj ua kab ke ntxuav nyob hauv dej kom xwv nws tawm los rau His Xas Lais pom xyeem."
Ces Zam ua tim khawv hais tias :
"Kuv pom Leej Ntuj Plig nqes saum ntuj xws li ib tug nquab los rau saum nws.
Kuv tseem tsis tau paub nws,
tab sis Tus xa kuv tuaj ua kab ke ntxuav hauv dej,
nws hais rau kuv tias :
Tus uas koj yuav pom Leej Ntuj Plig nqes los nyob saum nws,
mas nws yog tus ua kab ke ntxuav nyob hauv Leej Ntuj Plig Ntshiab.
Kuv tau pom,
ces kuv ua tim khawv tias nws yog Tswv Ntuj tus Xaiv."
Yog Huab Tais Yes Xus Lub Moo Zoo
