Npes Xis Las 15:15-20
Cov lus nyob hauv Ntawv Npes Xis Las
Yog koj xav mas koj yeej coj cov lus qhia tau.
Koj yuav ua xis Huab Tais siab.
Huab Tais tso dej
thiab hluav taws rau ntawm koj xub ntiag.
Koj xyab tes mus kov dej los kov hluav taws tau raws li koj nyiam.
Txoj sia
thiab txoj kev tuag nyob ntawm neeg xub ntiag.
Ntuj pub txoj sia
thiab txoj kev tuag rau neeg raws li neeg nyiam.
Txoj kev thoob tsib loj tas nrho,
nws muaj zog,
nws muaj hwj huam.
Nws pom tas ib puas tsav yam.
Huab Tais ntsia ntsoov cov neeg hwm nws.
Nws paub txhua yam neeg ua.
Huab Tais tsis tau kom leej twg mus taug txoj kev tsis hwm Ntuj,
nws tsis tau tso lus rau leej twg ua txhaum.
Yog Tswv Ntuj lo Lus
Nkauj Paj Nruag Txais Ntuj Lus
NPN 119:1-2,4-5,17-18,33-34(1b)
(Nqua Suab Cav Txog Tswv Ntuj, 45)
Txais: Cov tau txoj hmoov zoo yog cov ua raws Huab Tais txoj cai.
1. Cov tau txoj hmoov zoo yog cov neeg coj tus cwj pwm ncaj ncees,
yog cov ua raws nraim Huab Tais txoj cai.
Cov tau txoj hmoov zoo yog cov ua raws li Huab Tais lub siab xav,
yog cov nrhiav nws tas siab tas ntsws. Teb.
2. Koj tshaj cov lus qhuab qhia rau zeej tsoom kom muab khaws tseg.
Thov kom kuv coj tau tus yeeb yam ruaj,
Kuv thiaj yuav ua tau raws koj cov cai. Teb.
3. Thov koj ua zoo rau koj tus tub txib kom kuv muaj txoj sia nyob,
kuv yuav khaws koj lo lus.
Thov koj qhib kuv lub tswv yim kom kuv ras txog
qhov tseeb nyob hauv koj txoj cai. Teb.
4. Huab Tais,
thov koj qhia koj cov cai lij choj rau kuv.
Kuv yuav ua raws nraim koj txoj cai.
Thov koj qhib kuv lub tswv yim kom kuv coj tau koj txoj cai.
Kuv yuav muab koj txoj cai cog rau hauv kuv nruab siab. Teb.
Zaj Nyeem Ob
1 Kos Lis Nthos 2:6-10
Cov lus nyob hauv Kos Lis Nthos Tsab Ntawv Ib.
Kwv tij sawv daws,
peb hais txog kev Thoob Tsib rau cov neeg zoo txhij zoo txhua.
Txoj kev thoob tsib no tsis yog ntiaj teb kev thoob tsib,
thiab tsis yog ntiaj teb cov vaj tej kev thoob tsib uas yuav ploj.
Txoj kev thoob tsib uas peb hais txog,
mas yog Tswv Ntuj txoj kev Thoob Tsib ;
yog txoj kev Thoob Tsib uas neeg tsis to taub,
thiab tseem nyob zais ntshis txog tav no ;
yog kev Thoob Tsib uas Tswv Ntuj ib txwm tshwj zias rau peb txij lub hauv paus los,
kom peb muaj hwj chim.
Yog txoj kev Thoob Tsib uas tsis muaj ib tug vaj nyob ntiaj teb no paub li :
yog lawv paub,
mas lawv tsis muab tus Huab Tais muaj hwj chim tua saum ntoo cuam.
Peb ua raws li cov lus sau tseg tias :
“Peb tshaj tej yam qhov muag tsis tau pom dua,
tej yam pob ntseg tsis tau hnov dua,
tej yam tsis tau nce los txog neeg lub siab.
Peb tshaj txhua yam uas Tswv Ntuj npaj tseg rau cov neeg nyiam nws.”
Tswv Ntuj qhia tej yam ntawd rau peb paub nyob hauv Leej Ntuj Plig :
vim Leej Ntuj Plig tsom tau tas puas tsav yam,
nws tsom tau tej yam tob nyob hauv Tswv Ntuj.
Yog Tswv Ntuj lo Lus
Nkauj Cav Txog Lub Moo Zoo
Mas Tais 11:25
(Nqua Suab Cav Txog Tswv Ntuj, 238, nqe 6)
As les lus yas. As les lus yas.
Kuv cav lus zoo txog koj,
Huab Tais kav lub ntuj lub ntiaj teb.
Koj qhib koj lub Ceeb Tsheej rau peb cov neeg me paub.
As les lus yas.
Ntawv Moo Zoo (Zaj ntev - bài dài)
Mas Tais 5:17-37
Nej mloog ib zag nyob hauv Mas Tais Ntawv Moo Zoo
Muaj ib zaug,
Yes Xus hais rau nws cov thwj tim tias :
Nej txhob xav tias kuv tuaj rhuav Txoj Cai
thiab cov Yaj Saub :
kuv tsis tuaj rhuav,
kuv tuaj qhia ntxiv kom thoob.
Vim tias qhov kuv hais rau nej muaj tseeb :
lub ntuj lub teb yuav dua,
tab sis tsis muaj ib tug txwm ntawv,
los ib lub cim ntawv me me hauv Txoj Cai yuav ploj.
Tas ib puas tsav yam nyob hauv Txoj Cai yuav tsum tshwm sim tuaj tso.
Tus twg hla ib txog cai me,
thiab nws qhia kom luag ua xws li nws,
mas Ntuj yuav saib tus ntawd qis tshaj cov nyob hauv Ntuj lub Ceeb Tsheej.
Hos tus ua raws Txoj Cai tas huv si,
thiab nws qhia kom luag ua xws li nws,
Ntuj yuav saib nws yog tus loj nyob hauv Ntuj lub Ceeb Tsheej.
"Kuv hais rau nej :
yog nej tsis ua siab ncaj dua cov Kws Ntawv Ntshiab
thiab cov Fas Lis Xais,
mas nej yuav mus tsis tau hauv Ntuj lub Ceeb Tsheej.
"Nej hnov cov lus qhia rau tej laus thaud tias :
"Koj tsis txhob tua neeg.
Tus twg tua neeg,
nws yuav raug luag txiav txim rau nws.
Hos kuv, mas kuv hais rau nej :
Leej twg npau taws rau nws tus kwv,
nws yuav raug txim ntawm tsev hais plaub.
Yog nws hais rau nws tus kwv tias "Niag ruam !"
mas nws yuav raug txim ntawm lub rooj txwj laus Xas Nes Nrees.
Yog nws hais rau nws tus kwv tias "Niag vwm",
mas nws yuav raug txim nyob hauv dab phem cov hluav taws.
Thaum koj cev ib co txim rau saum lub thaj txi Ntuj,
yog koj nco dheev tias koj tus kwv tau muaj lus rau koj lawm.
Mas koj cia li tso koj cov txim rau ntawm lub thaj txi Ntuj,
koj mus nrog koj tus kwv hais kom haum tso,
koj mam rov los cev koj cov txim.
Thaum koj nrog tus neeg ntxub koj tseem ua ke mus kev,
koj kav tsij nrog nws hais kom haum,
tsam nws coj koj mus kom rau tus txiav txim,
ces tus txiav txim muab koj cob rau tub ceev xwm kom muab koj kaw hauv tsev loj faj.
Kuv hais tseeb rau koj, koj yuav tawm tsis tau hauv tsev loj faj,
mus txog thaum koj rho nyiaj qab nas txog npib kawg nkaus los them.
Nej hnov tej lus qhia tias :
Koj yuav tsis txhob deev luag txij luag nkawm.
Hos kuv,
mas kuv hais rau nej :
Leej twg ntsia ib tug poj niam vim ntshaw zes nws,
tus ntawd twb deev tus poj niam ntawd hauv nruab siab lawm.
Yog koj sab qhov muag xis coj koj mus ua txhaum,
mas kav tsij muab sab qhov muag ntawd kaus pov tseg deb koj :
txhiaj khoov cia ib sab qhov muag puas zoo dua tas koj lub cev poob hauv dab phem teb.
Yog koj sab tes xis coj koj mus ua txhaum,
kav tsij muab txiav pov tseg deb koj :
txhiaj khoov cia tu ib sab tes zoo dua tas koj lub cev poob hauv dab phem teb.
Tseem muaj tej lus qhia tias :
Leej twg nrauj nws poj niam,
yuav tsum muab ib daim ntawv nrauj rau tus poj niam.
Tab sis,
kuv hais rau nej :
Tus txiv neej twg nrauj nws poj niam,
tus ntawd tso nws poj niam rau luag deev.
Qhov no tsis yog hais txog tus poj niam uas mus 'nrog lwm tus txiv neej ua dev ua npua.'
Hos leej twg yuav ib tug poj nrauj,
mas tus ntawd yog ib tug deev luag txij luag nkawm.
Nej tseem hnov cov lus qhia rau tej laus thaud tias :
Koj tsis txhob twv ntuj,
koj yuav ua raws li cov lus koj tau cog rau Huab Tais.
Tab sis kuv hais rau nej,
nej tsis txhob twv ntuj ib zaug li.
Txhob muab lub ntuj los ua tim khawv,
vim ntuj yog Tswv Ntuj lub theej kiab ;
txhob muab lub ntiaj teb los ua tim khawv,
vim lub ntiaj teb yog Tswv Ntuj lub rooj tiag taw ;
txhob muab Yes Lus Xas Les los ua tim khawv,
vim yog tus Tuam Vaj lub Nroog.
Txhob muab koj lub taub hau los ua tim khawv,
vim koj ua tsis tau kom ib txog plaub hau dawb tuaj los dub tuaj.
Nej yuav hais li no :
Muaj,
ces hais tias muaj ;
tsis muaj,
ces hais tias tsis muaj.
Cov lus hais tshaj,
yog tuaj ntawm tus Phem tuaj.
Yog Huab Tais Yes Xus Lub Moo Zoo
Ntawv Moo Zoo (Zaj luv - bài ngắn)
Mas Tais 5:20-22a.27-28.33-34a.37
Nej mloog ib zag nyob hauv Mas Tais Ntawv Moo Zoo
Muaj ib zaug,
Yes Xus hais rau nws cov thwj tim tias :
Nej txhob xav tias kuv tuaj rhuav Txoj Cai
thiab cov Yaj Saub :
kuv tsis tuaj rhuav,
kuv tuaj qhia ntxiv kom thoob.
Vim tias qhov kuv hais rau nej muaj tseeb :
lub ntuj lub teb yuav dua,
tab sis tsis muaj ib tug txwm ntawv,
los ib lub cim ntawv me me hauv Txoj Cai yuav ploj.
Tas ib puas tsav yam nyob hauv Txoj Cai yuav tsum tshwm sim tuaj tso.
Tus twg hla ib txog cai me,
thiab nws qhia kom luag ua xws li nws,
mas Ntuj yuav saib tus ntawd qis tshaj cov nyob hauv Ntuj lub Ceeb Tsheej.
Hos tus ua raws Txoj Cai tas huv si,
thiab nws qhia kom luag ua xws li nws,
Ntuj yuav saib nws yog tus loj nyob hauv Ntuj lub Ceeb Tsheej.
"Kuv hais rau nej :
yog nej tsis ua siab ncaj dua cov Kws Ntawv Ntshiab
thiab cov Fas Lis Xais,
mas nej yuav mus tsis tau hauv Ntuj lub Ceeb Tsheej.
"Nej hnov cov lus qhia rau tej laus thaud tias :
"Koj tsis txhob tua neeg.
Tus twg tua neeg,
nws yuav raug luag txiav txim rau nws.
Hos kuv,
mas kuv hais rau nej :
Leej twg npau taws rau nws tus kwv,
nws yuav raug txim ntawm tsev hais plaub.
Nej hnov tej lus qhia tias :
Koj yuav tsis txhob deev luag txij luag nkawm.
Hos kuv,
mas kuv hais rau nej :
Leej twg ntsia ib tug poj niam vim ntshaw zes nws,
tus ntawd twb deev tus poj niam ntawd hauv nruab siab lawm.
Nej tseem hnov cov lus qhia rau tej laus thaud tias :
Koj tsis txhob twv ntuj,
koj yuav ua raws li cov lus koj tau cog rau Huab Tais.
Tab sis kuv hais rau nej,
nej tsis txhob twv ntuj ib zaug li.
Nej yuav hais li no :
Muaj,
ces hais tias muaj ;
tsis muaj,
ces hais tias tsis muaj.
Cov lus hais tshaj,
yog tuaj ntawm tus Phem tuaj.
Yog Huab Tais Yes Xus Lub Moo Zoo
