Zaj Nyeem Ib
Hauj Lwm 10:34a.37-43
Tswv Ntuj tsa Yes Xus sawv rov los. Tus twg xav txais Tswv Ntuj cov txiaj ntsim nws yuav vam txog Yes Xus.
Cov lus nyob hauv Ntawv Hauj Lwm
34a Thaum ntawd, nyob hauv Kos Nes Lias tsev, nyob Xes Ntxas Les, ces Pob Zeb pib hais tias :
37 Nej twb tau hnov txog tej xwm uas tshwm sim tuaj nyob hauv xeev Yus Das : yam li thaum Zam tshaj tias sawv daws yuav txais lub cim ntxuav, mas nej kuj hnov hais txog Yes Xus nyob Nas Xas Les. Nws pib qhia hauv xeev Nkas Lis Lais.
38 Tswv Ntuj tau pleev nws. Tswv Ntuj muab Leej Ntuj Plig Ntshiab thiab muab hwj huam rau nws. Nws mus ncig teb ncig chaw, nws ua zoo rau sawv daws. Nws kho cov neeg poob hauv dab phem tes kom lawv zoo. Vim Tswv Ntuj nrog nws nyob.
39 Peb ua tim khawv pom tas puas tsav yam Yes Xus tau ua nyob hauv cov Yus Das lub teb chaws thiab nyob Yes Lus Xas Les. Cov Yus Das tau ua phem rau nws : lawv muab nws dai saum ib tug ncej kom nws tuag.
40 Tab sis, hnub tim peb, Tswv Ntuj tsa nws sawv rov qab los lawm thiab pub kom nws tawm los xyuas cov tim khawv uas nws xub tau xaiv ua ntej.
41 Tsis yog tas tsoom pej xeem tau pom nws. Cov tau pom nws yog peb. Thaum nws sawv hauv cov tub tuag rov los, mas peb tau nrog nws noj thiab haus ua ke.
42 Nws qhia peb kom peb tshaj rau tsoom pej xeem thiab ua pov thawj zeem tias nws yog tus uas Tswv Ntuj tsa los txiav txim rau cov neeg ciaj thiab cov neeg tuag.
43 Tas cov yaj saub ua tim khawv txog Yes Xus tias leej twg ntseeg txog nws, mas leej twg cov txhaum yuav daws tas nyob hauv nws lub npe."
Yog Tswv Ntuj lo Lus
Nkauj Paj Nruag Txais Ntuj Lus
NPN 118:1-2, 16-17, 22-23 (24)
Txais: Hnub no yog hnub Huab Tais tsim los rau peb, peb zoo siab hom khaj.
los yog (hoặc)
Txais : As les lus yas.
1. Peb ua Huab Tais tsaug vim nws khuv leej neeg mus ib txhiab ib txhis.
Haiv His Xas Lais,
nej cav tias:
“Nws txoj kev hlub nyob mus ib txhiab ib txhis.” Teb.
2. Huab Tais txhais tes xis ua hauj lwm loj;
nws txhais tes xis muaj hwj huam.
Kuv yuav tsis tuag,
kuv yuav muaj txoj sia nyob.
Kuv yuav cav txog Huab Tais tej dej num. Teb.
3. Lub pob zeb uas cov txhim tsev muab pov tseg,
txia ua lub pob zeb txheem tsev.
Yam hwj huam loj no yog Huab Tais ua,
yog yam zoo tshaj rau peb qhov muag pom. Teb.
Zaj Nyeem Ob
Kos Los Xais 3:1-4
Peb ntseeg txog Yes Xus, peb thiaj txais lub Cim Ntxuav. Yog lub cim tias peb nrog Yes Xus tuag thiab nrog Yes Xus muaj txoj sia.
Cov lus Paj Lug sau tuaj rau cov ntseeg nyob Kos Los Xais
Kwv tij sawv daws,
1 Nej pom xeeb nrog Leej Pleev sawv rov los lawm,
mas nej nrhiav tej yam nyob txheej saud,
vim txheej saud yog Leej Pleev qhov chaw nyob,
nws zaum ntawm Tswv Ntuj phab xis.
2 Nej lub siab yuav dai dhuam rau tej yam nyob txheej saud,
txhob dai rau tej yam nyob ntiaj teb no.
3 Vim tias,
nej tuag lawm,
hos nej txoj sia nrog Leej Pleev tsiv nraim hauv Tswv Ntuj.
4 Leej Pleev yog nej txoj sia :
thaum nws yuav tawm los rau pom xyeem,
mas nej kuj yuav nrog nws tawm los muaj hwj chim.
Yog Tswv Ntuj lo Lus
los yog (hoặc)
1 Kos Lis Nthos 5:6b-8
Nej ntxuav cov poov xab qub uas lo nej pov tseg, kom nej txia ua ib co hmoov nplej nkos tshiab.
Cov lus Paj Lug sau tuaj rau cov ntseeg nyob Kos Lis Nthos, tsab ntawv Ib
6b Nej puas paub tias, ib qho poov
xab me me ua kom tas cov hmoov nplej su tuaj ?
7 Nej ntxuav cov poov xab qub
uas lo nej pov tseg, kom nej txia ua ib co
hmoov nplej nkos tshiab, ua cov mov tsis
xyaw poov xab. Vim peb txoj kev Hla,
yog Leej Pleev, uas nws tuag txi Ntuj.
8 Li ntawd peb ua lub Ntees Hla,
peb tsis txhob yuav cov qub poov xab,
peb tsis txhob yuav ib co poov xab tsim kev phem.
Peb yuav ua cov mov tsis xyaw poov xab,
uas tsim kev huv thiab kev tseeb.
Yog Tswv Ntuj lo Lus
ZOO SIAB ROV CIAJ
(Ca tiếp liên)
Poj Mab Liab aw !
Taug kev koj pom dab tsi,
thov koj hais rau peb mloog.
Kuv pom ntsoov,
Huab Tais Pleev Nws lub ntxa,
Nws ciaj rov los,
tawm dhau qhov ntxa lawm.
Nws tseem ciaj,
tseem nyob muaj koob nto moo lug.
Kuv pom ntsoov,
Leej Tub txhiv Nws pab yaj,
Huab Tais PLeev tsis txhaum,
zam txhaum rau tib neeg,
zam txhaum neeg nrog Leej Txiv Tswv Ntuj.
Kuv pom ntsoov,
kev ciaj kev tuag sib txeeb.
Nyob hauv txoj kev sib tw.
Tus Thawj txoj sia,
txawm yog uas tuag lawm los,
tab Nws ciaj rov los,
ciaj los Nws kav ntuj.
Kuv pom ntsoov,
Tus Tshiab ua tim khawv tuaj,
txoj phuam uas kauv qhwv Nws,
tseem nyob hauv ntxa zeb,
tab Nws ciaj sawv lawm,
Nws ua lawv ntej mus,
txog Nkas Lis Les As.
Qhuas Tus Huab Tais Pleev,
ciaj los tawm hauv ntxa los.
Lub Moo hla dhau yog Nws,
kev ciaj sia txog peb lawm.
Nkauj Cav Txog Lub Moo Zoo
1 Kos Lis Nthos) 5:7b-8a
(Nqua Suab Cav Txog Tswv Ntuj, 238, nqe 11)
As les lus yas. As les lus yas.
Leej Pleev yog peb tus Yaj Ntshiab,
nws muab nws txi rau Tswv Ntuj kom tau cawm peb,
peb thiaj ua Hmoov Hla cav txog nws.
As les lus yas.
Ntawv Moo Zoo
Zam 20:1-9
Yog vim Yes Xus sawv rov los peb thiaj tso siab tias nws pub txoj sia rau peb tau.
Nej mloog ib zag nyob hauv Zam Ntawv Moo Zoo
1 Thawj hnub pib lub lis piam,
thaum sawv ntxov,
ntuj tsis tau kaj,
Mab Lias Mas Ntas Las mus tom ntxa.
Nws pom daim txiag zeb tshem ntawm lub ntxa lawm.
2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim,
uas yog tus Yes Xus nyiam.
Nws hais rau nkawd tias :
"Lawv nqa Huab Tais tawm hauv ntxa lawm,
peb tsis paub xyov lawv coj nws mus tso qhov twg lawm."
3 Pob Zeb tawm plaws mus,
lwm tus thwj tim kuj tawm plaws thiab,
nkawd mus tom ntxa.
4 Nkawd ob leeg ua ke khiav mus,
tab sis lwm tus thwj tim khiav nrawm dua Pob Zeb,
nws khiav ua ntej,
nws xub mus txog tom ntxa.
5 Nws khoov mus xauj,
nws pom tej hlab ntaub nyob ntawd ;
tab sis nws tsis chaws mus hauv.
6 Ces Xis Moos Pob Zeb lawv tus thwj tim qab mus txog,
nws chaws mus hauv lub ntxa.
Nws pom cov hlab ntaub nyob ntawd,
7 hos daim ntaub qhwv taub hau kauv cia nyob lwm qhov,
tsis xyaw cov hlab ntaub.
8 Ces lwm tus thwj tim uas xub mus txog ntawm lub ntxa mam li chaws mus hauv.
Nws pom ces nws ntseeg.
9 Vim lawv tseem tsis au to taub tias Yes Xus yuav sawv hauv cov tuag rov los raws li Ntawv qhia.
Yog Huab Tais Yes Xus Lub Moo Zoo
los yog (hoặc)
Mas Tais 28:1-10
Nej mloog ib zaj nyob hauv Mas Tais Ntawv Moo Zoo
1 Dhau hnub Xas Npas Tos lawm,
yog thawj hnub hauv lub lis piam,
thaum sawv ntxov,
Mab Liab Mas Ntas Las
thiab lwm tus Mab Liab nkawd mus xyuas lub ntxa.
2 Ib sij huam,
av qeeg loj kawg :
Huab Tais tus Tshiab nqes saum ntuj los dov daim txiag zeb,
nws zaum saud.
3 Nws ib ce ci li xob laim,
nws cev tsoos tsho dawb li daus.
4 Cov zov keeb pom,
lawv ceeb,
lawv ntshai tshee na,
zoo li lawv tuag lawm.
5 Tus Tshiab hais rau ob tug poj niam tias :
"Neb txhob ntshai mog :
kuv paub tias neb nrhiav Yes Xus,
tus tuag saum ntoo cuam.
6 Nws tsis nyob ntawm no lawm,
nws sawv rov los raws li nws tau hais.
Neb los xyuas qhov chaw lawv tso nws lub cev saib mas !
7 Neb maj zeeg mus hais rau nws cov thwj tim tias :
'Nws sawv hauv cov tuag los lawm,
nws ua nej ntej mus Nkas Lis Lais ;
nej yuav pom nws nyob ped.'
Kuv hais li no rau neb xwb."
8 Ob tug poj niam tso plhuav lub ntxa tseg.
Nkawd ntshai
thiab zoo siab tas nrho.
Nkawd khiav mus xa lub moo ntawd rau cov thwj tim.
9 Yes Xus tuaj tos ob tug poj niam kev,
nws hais tias :
"Neb nyob kaj lug".
Ces nkawd txav los ze Yes Xus,
nkawd puag Yes Xus ko taw, nkawd pe nws.
10 Yes Xus hais rau nkawd tias :
"Neb txhob ntshai mog,
neb mus qhia kuv cov kwv tij kom lawv mus lawm Nkas Lis Lais teb,
lawv yuav pom kuv nyob ntawd."
Yog Huab Tais Yes Xus Lub Moo Zoo
los yog (hoặc)
Mas Kos 16:1-8
1 Dhau hnub Xas Npas Tos lawm,
Mab Liab Mas Ntas Las,
Mab Liab uas yog Yas Kos niam,
thiab Xas Los Mes lawv muas ib co tshuaj pleev neeg tuag coj mus pleev Yes Xus lub cev.
2 Hnub chiv lub lis piam sawv ntxov,
thaum lub hnub nyuam qhuav tawm tuaj,
lawv mus tom ntxa.
3 Lawv sib tham tias :
“Leej twg yuav dov daim txiag zeb kaw rooj ntxas rau peb ?”
4 Lawv tsa muag ntsia,
lawv pom tias daim txiag zeb twb dov rau ib sab lawm :
daim txiag zeb ntawd loj kawg.
5 Lawv nkag mus hauv ntxa,
lawv pom ib tug hluas zaum sab xis,
nws hnav ib lub tsho dawb ntev,
lawv ntshai tas nrho.
6 Tab sis tus hluas hais rau lawv tias :
"Nej txhob ntshai !
Nej nrhiav Yes Xus Nas Xas Les,
tus uas luag muab tua saum ntoo cuam :
nws sawv rov los lawm,
nws tsis nyob ntawm no.
Saib qhov chaw no,
yog lub chaw lawv tso nws lub cev.
7 Nej mus hais rau nws cov thwj tim
thiab hais rau Pob Zeb tias,
nws ua nej ntej mus Nkas Lis Lais :
nej yuav pom nws nyob ntawd,
raws li nws tau hais rau nej."
8 Cov poj niam tawm los nraum no,
lawv khiav ntawm ntxa mus,
lawv ib ce xob tas,
lawv tshee tshee.
Lawv tsis hais lus rau leej twg li,
vim lawv ntshai kawg.
Yog Huab Tais Yes Xus Lub Moo Zoo
los yog (hoặc)
Lus Kas 24:1-12
1 Thawj hnub pib lub lis piam,
thaum kaj ntug txoog,
cov poj niam mus tom ntxa.
Lawv nqa cov tshuaj tsw qab uas lawv tau npaj.
2 Lawv pom daim txiag zeb dov tawm ntawm lub rooj ntxas lawm.
3 Lawv chaws mus hauv,
lawv nrhiav tsis tau Huab Tais Yes Xus lub cev.
4 Lawv xav tsis thoob vim li cas.
Ces thaum ntawd,
ob tug neeg tshwm plaws los ntawm lawv,
nkawd hnav tsoos ci dawb vog.
5 Cov poj niam ntshai,
lawv dauv ntsej muag rau hauv av.
Ob tug neeg ntawd hais rau lawv tias :
"Ua cas nej nrhiav Tus Neeg Ciaj hauv cov neeg tuag ?
6 Nws tsis nyob ntawm no.
Nws sawv rov los lawm.
Nej nco ntsoov txog qhov nws tau hais rau nej,
thaum nws tseem nyob Nkas Lis Lais.
7 Nws hais tias :
Neeg Leej Tub yuav tsum raug luag muab rau hauv cov neeg txhaum txhais tes,
raug dai saum ntoo cuam.
Hnub peb,
nws yuav sawv rov los."
8 Ces lawv rov nco txog Yes Xus cov lus.
9 Cov poj niam rov ntawm ntxa mus tsev.
Lawv qhia tej yam ntawd tib si rau Pab Kaum Ib
thiab rau lwm cov.
10 Yog Mab Liab Mas Ntas Las,
Zag,
thiab Mab Liab uas yog Yas Kos niam.
Lwm cov poj niam uas nrog lawv ua ke,
kuj hais ib yam li ntawd rau cov Hauv Paus Xa Lus.
11 Tab sis cov Hauv Paus Xa Lus saib tej lus no zoo li neeg tsis meej pem hais,
ces lawv tsis ntseeg cov poj niam.
12 Pob Zeb sawv tsees,
nws khiav mus tom ntxa.
Nws khoov xauj hauv, nws tsuas pom cov hlua pav xwb.
Nws rov mus tsev,
nws xav tsis thoob txog tej xwm uas tshwm tuaj zoo li ntawd.
Yog Huab Tais Yes Xus Lub Moo Zoo
los yog (hoặc)
Lus Kas 24:13-35
rau tav su no - lễ chiều có thể đọc
13 Tib hnub ntawd,
ob leeg hauv cov thwj tim taug kev mus rau ib lub zos hu ua Es Mas Ws,
deb li rau caum ncuas kev ntawm Yes Lus Xas Les.
14 Nkawd sib tham txog txhua tsav yam xwm uas tau tshwm sim tuaj.
15 Thaum nkawd piav
thiab sib tham txog tej ntawd,
Yes Xus caum tau nkawd,
nws nrog nkawd mus kev.
16 Tab sis nkawd qhov muag zeem tsis tau Yes Xus.
17 Ces Yes Xus hais rau nkawd tias :
"Neb sib tham txog tej lus dab tsi taug kev ?"
Ces nkawd nres,
nkawd ntsej muag ntshaus tas.
18 Tus hu ua Khes Os Fas qhib ncauj hlo hais tias :
"Tas cov neeg tuaj pem Yes Lus Xas Les,
ntshai koj tib leeg xwb thiaj tsis paub txog qhov uas tau tshwm sim ob peb hnub no !"
19 Yes Xus hais rau nkawd tias :
"Muaj dab tsi ?"
Nkawd hais rau Yes Xus tias :
"Tej xwm uas hais txog Yes Xus Nas Xas Les.
Nws yog ib tug yaj saub ua tau tej hauj lwm
thiab hais tau tej lus muaj hwj huam,
nyob ntawm Tswv Ntuj
thiab tsoom pej xeem xub ntiag.
20 Tab sis peb cov Thawj Leej Choj thiab peb cov nom tswv ntes nws rau luag,
kom luag txiav lub txim tuag rau nws
thiab muab nws dai saum ntoo cuam.
21 Peb mas peb vam tias nws yog tus yuav txhiv His Xas Lais.
Tsis tag li ntawd,
tej xwm no tshwm sim tau peb hnub,
22 ces ob peb tug poj niam uas yog peb cov neeg,
tseem ua rau peb poob siab tas.
Tag kis no,
lawv sawv ntxov mus tom ntxa,
23 lawv nrhiav tsis tau nws lub cev.
Lawv rov los hais rau peb tias ib cov Tshiab tawm los rau lawv pom.
Cov Tshiab hais tias Yes Xus muaj txoj sia nyob.
24 Cov nrog peb,
ob peb leeg kuj tau mus txog tom lub ntxa,
lawv pom txhua yam raws li cov poj niam hais,
tab sis lawv kuj tsis pom nws lub cev thiab."
25 Ces Yes Xus hais rau nkawd tias :
"Ua cas nej lub siab yuav ruam ua luaj,
thiab yuav ntseeg qeeb ua luaj txog tas txhua yam uas cov Yaj Saub tau tshaj los !
26 Tej ntawd tsis yog txoj kev tsim txom uas Leej Pleev yuav tsum raug tso,
nws mam li mus hauv nws lub koob meej lod ?"
27 Yes Xus txhais cov Ntawv uas sau txog nws,
txij Mais Xes los txog cov Yaj Saub tas huv tib si rau nkawd.
28 Thaum lawv tuaj yuav txog lub zos uas ob tug thwj tim mus,
Yes Xus ua txuj yuav mus ntxiv.
29 Tab sis nkawd cheem Yes Xus tias :
"Nrog wb nyob mas !
Yuav tsaus ntuj,
lub hnub twb yuav poob qho."
Yes Xus thiaj chaws mus hauv tsev,
nws nrog nkawd nyob.
30 Thaum nws nrog nkawd zaum ntawm rooj mov,
nws tuav lub ncuav mov,
nws hais zaj foom hmoov zoo,
nws muab lub ncuav mov ntais,
nws cev rau nkawd.
31 Ces nkawd qhov muag qhib plho,
nkawd zeem tau Yes Xus ...
Tab sis Yes Xus ploj ntais ntawm nkawd xub ntiag lawm.
32 Ces nkawd rov sib tham tias :
"Thaum nws hais lus rau wb tom kev,
thiab nws txhais Ntawv rau wb,
mas wb lub siab kub lug hauv nrog cev,
puas yog ?"
33 Ces nkawd sawv tsees tam sis ntawd,
rov mus Yes Lus Xas Les.
Nkawd los pom Pab Kaum Ib nrog lawv cov npawg sib txoos ua ke.
34 Lawv hais tias :
"Huab Tais sawv rov los lawm tiag,
nws tawm los rau Xis Moos pom !"
35 Ces nkawd piav qhov uas tshwm tuaj nyob tom kev,
thiab piav tias Huab Tais ua dab tsi,
nkawd thiaj zeem tau nws thaum nws ntais lub ncuav mov.
Yog Huab Tais Yes Xus Lub Moo Zoo
