HNUB CHIV NQAUM NPLOOJ XYOO A (CN Lễ Lá năm A)

UA COV KAB KE NQAUM NPLOOJ
Rước Kiệu
Ntawv Moo Zoo
Mas Tais 21,1-11
Tus uas Huab Tais xa tuaj, nto koob meej !

Nej mloog ib zag nyob hauv Mas Tais Ntawv Moo Zoo
¹ Thaum Yes Xus lawv tuaj yuav txog Yes Lus Xas Les,
thiab twb tuaj txog Npes Fas Zes ntawm lub roob txiv ntoo roj lawm,
Yes Xus xa ob tug thwj tim mus ua ntej.
² Nws hais rau nkawd tias :
“Neb mus hauv lub zos nyob tom neb hauv ntej,
neb yuav pom ib tug maum luj khi nrog nws tus me nyuam.
Neb daws tus maum luj,
neb cab ob niam tub luj los rau kuv.
³ Yog muaj neeg hais dab tsi rau neb,
ces neb hais rau lawv tias :
“Huab Tais yuav siv.
Ib me ntsis, nws yuav xa rov los.”
⁴ Qhov ntawd tshwm sim tuaj raws li tus yaj saub xub hais tseg tias :
⁵ Nej hais rau tus ntxhais Xis Yoos tias :
Saib,
koj tus vaj tuaj cuag koj.
Nws siab zoo.
Nws zaum saum ib tug luj,
nws caij ib tug me nyuam luj,
yog tus luj thauj nra tus me nyuam.
⁶ Ob tug thwj tim mus ua raws li Yes Xus tau hais.
⁷ Nkawd cab ob niam tub luj los.
Nkawd muab nkawd ob lub tsho tshaj sab pua luj nrob qaum,
ces Yes Xus zaum saud.
⁸ Muaj neeg coob coob hle lawv tej tsho tshaj sab los pua kev.
Tseem muaj lwm cov txiav ceg ntoo los pua kev thiab.
⁹ Tas tsoom neeg uas mus ua Yes Xus ntej
thiab lawv Yes Xus qab qw tias :
"Das Vis Leej Tub,
thov koj cawm peb.
Tus uas Huab Tais xa tuaj,
nto koob meej !
Tus nyob saum cov txheej ntuj siab,
thov koj cawm peb !”
¹⁰ Thaum Yes Xus los hauv Yes Lus Xas Les,
mas tas lub nroog ua nphoo ntxoj nphoo ntxuas.
Lawv hais tias :
“Yog leej twg ?”
¹¹ Tas tsoom sid hais tias :
“Yog tus Yaj Saub Yes Xus,
uas tuaj ntawm Nas Xas Les,
xeev Nkas Lis Lais tuaj.”
Yog Huab Tais Yes Xus Lub Moo Zoo

UA THAJ TXI NTUJ
Thánh Lễ
Zaj Nyeem Ib
His Xais 50,4-7
Yes Xus tuaj yeem ua Tswv Ntuj tus tub txib,
Tswv Ntuj thiaj tsa Yes Xus ua Huab Tais.

Cov lus nyob hauv Ntawv His Xais
⁴ Huab Tais Tswv Ntuj tau muab cov thwj tim tus nplaig rau kuv.
Nws qhia kuv kom kuv txawj hais ib lo lus nplij tus qaug zog.
Niaj tag kis nws tsa kuv pob ntseg kom kuv tsim dheev,
kom kuv mloog xws li cov thwj tim mloog.
⁵ Huab Tais Tswv Ntuj qhib kuv pob ntseg,
mas kuv tsis npau taws,
kuv tsis yig,
kuv tsis thaub qab.
⁶ Lawv ntaus kuv,
mas kuv tig kuv nraub qaum rau lawv ntaus.
Lawv xav rho kuv cov hwj txwv,
mas kuv tig kuv sab plhu rau lawv.
Lawv xav ib tawg ncuav rau kuv
thiab xav nto qaub ncaug rau kuv ntsej muag,
los kuv tsis fee plhu rau lawv.
⁷ Tab sis Huab Tais Tswv Ntuj tsom kwm kuv,
vim qhov ntawd mas kuv tsis poob ntsej muag.
Ces kuv ua kuv ntsej muag tawv li pob zeb.
Kuv paub tias kuv yuav tsis raug kev txaj muag.
Yog Tswv Ntuj lo Lus

Nkauj Paj Nruag Txais Ntuj Lus
NPN 22:8-9, 17-18, 19-20, 23-24 (2a)

Txais: Kuv tus Huab Tais,
kuv tus Tswv Ntuj !
Ua cas Koj tso kuv pov tseg ?

1. Leej twg pom kuv,
lawv thuam kuv,
lawv luag kuv.
Lawv co taub hau hnyos kuv tias:
“Nws tso siab rau Huab Tais,
cia Huab Tais npo nws.
Nws nyiam Huab Tais,
cia Huab Tais cawm nws mas!” Teb.

2. Lawv zoo li pab dev sawv ncig kuv.
Cov neeg phem ntawd puav kuv kev,
lawv nkaug kuv tej tes taw.
Kuv suav tau kuv cov pob txha tas tib si. Teb.

3. Lawv muab kuv cov khaub ncaws los sib faib,
lawv twv saib leej twg yuav tau kuv cov ris tsho.
Huab Tais,
thov koj txhob txav mus deb kuv!
Koj yog kuv lub zog,
koj tsuag tsuag tuaj pab kuv mas! Teb.

4. Kuv yuav tshaj koj lub npe rau kuv cov kwv tij.
Kuv yuav cav txog koj hauv nruab nrab lub txoos.
Nej cov uas hwm Huab Tais,
nej cav lus zoo txog nws mog.
Yas Kos tsoom tub ki,
nej cav txog nws lub koob meej!
His Xas Lais tsoom tub ki, nej hwm nws mog! Teb.

Zaj Nyeem Ob
Fis Lis Pos 2,6-11
Yes Xus yeem ua tus me raug txom nyem,
Tswv Ntuj thiaj tsa Yes Xus ua tus siab dua tas txhia leej txhia tus.

Cov lus Paj Lug sau tuaj rau cov ntseeg nyob Fis Lis Pos
⁶ Yes Xus Pleev yog Tswv Ntuj,
tiam sis nws tsis cia nws lub hwj chim Tswv Ntuj rau luag hawm :
nws muab nws lub hwj chim hle.
⁷ Nws yeem ua ib tug qhev,
nws yug los ua neeg xws li ib tsoom neeg.
Luag pom nws tus yam ntxwv yog yam ntxwv tib neeg.
⁸ Nws txo nws qis :
nws tuaj yeem mloog Ntuj lus mus txog qhov tuag,
thiab tseem xaiv txoj kev tuag saum ntoo cuam.
⁹ Vim li ntawd,
mas Tswv Ntuj thiaj tsa Yes Xus ua ib tug loj nyob siab siab.
Tswv Ntuj muab lub npe uas nyob siab dua lwm cov npe rau nws.
¹⁰ Li ntawd,
tus twg hnov tuav txog
Yes Xus lub npe,
tsis hais nyob
saum cov txheej ntuj,
los nyob ntiaj
teb no,
los nyob nruab yeeb,
mas tus ntawd cia li txhos caug hawm.
¹¹ Txhua xeem lus yuav tsum cav tias Yes Xus Pleev yog Huab Tais :
Leej Txiv Tswv Ntuj thiaj muaj koob meej nto moo lug.
Yog Tswv Ntuj lo Lus

Nkauj Cav Txog Lub Moo Zoo
Fis Lis Pos 2:8-9
(Nqua Suab Cav Txog Tswv Ntuj, 239, nqe 11)

Yes Xus Pleev tuaj yeem mloog Tswv Ntuj lus mus txog qhov tuag
thiab nws tseem xaiv txoj kev tuag nyob saum tus ntoo cuam.
Tswv Ntuj thiaj tsa Yes Xus ua tus loj nyob siab
thiab muab ib lub npe siab dua lwm cov npe los tis rau Nws.
Yes Xus Pleev, peb cav txog Koj !
Koj yog tus Vaj muaj koob meej nto moo lug.

YES XUS KEV TXOM NYEM, RAWS MAS TAIS (Zaj ntev - Bài dài)
Mas Tais 26:14 - 27:66
Yes Xus kev txom nyem, peb tus Huab Tais.

P	Nej mloog Yes Xus raug kev txom nyem npaum li cas, raws li Mas Tais ntawv Moo Zoo piav. ₁₄ Muaj ib tug nyob hauv pab kaum ob, hu ua Yus Das Kas Lis Yaus. Nws mus cuag cov thawj leej choj, ₁₅ nws hais rau lawv tias :
L	“Nej muab dab tsi rau kuv, kuv yuav muab nws muag rau nej ?”
P	Ces lawv them peb caug lub txiaj nyiag rau Yus Das. ₁₆ Txij hnub ntawd los, Yus Das nrhiav ib lub sij hawm zoo cob Yes Xus rau hauv lawv txhais tes. ₁₇ Thaum txog thawj hnub noj cov ncuav mov tsis muaj poov xab, cov thwj tim txav los nug Yes Xus tias :
L	“Koj xav kom peb npaj Pluas Hla rau koj noj nyob qhov twg ?”
P	₁₈ Yes Xus hais tias :
✠	“Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.”
P	₁₉ Cov thwj tim ua raws li Yes Xus qhia. Ces lawv npaj Pluas Hla. ₂₀ Thaum tsaus ntuj Yes Xus nrog pab Kaum Ob nyob ntawm rooj mov. ₂₁ Thaum lawv noj mov, Yes Xus hais tias :
✠	“Kuv hais tseeb rau nej, nej ib tug yuav muab kuv muag."
P	₂₂ Lawv ntxhov siab tas nrho, lawv nyias nug nyias tias :
L	“Huab Tais, puas yog kuv ?”
P	₂₃ Yes Xus teb tias :
✠	“Tus yuav muab kuv muag, yog tus tau nrog kuv cev tes ntsw hauv lub phaj ! ₂₄ Neeg Leej Tub rov mus raws li Ntawv xub sau txog nws. Tab sis tus muab Neeg Leej Tub muag, nws raug txoj hmoov phem ! Txhiaj khoov tus ntawd tsis txhob yug los !”
P	₂₅ Yus Das, tus muab Yes Xus muag, kuj teb tias :
L	“Xib Hwb, puas yog kuv ?”
P	Yes Xus hais rau Yus Das tias :
✠	“Yog li koj hais.”
P	₂₆ Thaum lawv noj mov txog tog, Yes Xus tuav lub ncuav mov, nws hais zaj foom hmoov zoo, nws muab ntais, thiab nws cev rau cov thwj tim, Nws hais tias :
✠	“Nej txais, nej noj, qhov no yog kuv lub cev.”
P	₂₇ Yes Xus kuj tuav ib lub ntim, nws ua ntuj tsaug, nws cev rau lawv, Nws hais tias :
✠	“Nej sawv daws haus, ₂₈ vim qhov no yog kuv cov ntshav, yog cov ntshav cog lus, uas yuav ntws los daws coob leej cov txhaum. ₂₉ Kuv hais rau nej, txij no mus, kuv yuav tsis tau haus cov kua txiv cawv no ntxiv, mus txog hnub kuv yuav rov nrog nej haus dua nyob hauv kuv Txiv lub Ceeb Tsheej.”
P	₃₀ Thaum lawv hu cov nkauj cav lus zoo tas, lawv tawm mus pem lub roob Txiv Ntoo Roj. ₃₁ Yes Xus hais rau lawv tias :
✠	“Hmo no, nej sawv daws yuav ntog tas, vim kuv. Vim Ntawv sau tias : Kuv yuav ntaus tus zov yaj, ces pab yaj yuav tawg tas. ₃₂ Tab sis thaum kuv sawv rov los, kuv yuav ua nej ntej mus Nkas Lis Lais teb.”
P	₃₃ Pob Zeb teb rau Yes Xus tias :
L	“Yog tas sawv daws ntog vim koj, los kuv yuav tsis ntog ib zaug.”
P	₃₄ Yes Xus teb rau Pob Zeb tias :
✠	“Kuv hais tseeb rau koj : hmo no kiag, thaum qaib tsis tau qua, koj yuav tsis lees kuv peb zaug.”
P	₃₅ Pob Zeb hais rau Yes Xus tias :
L	“Tab yog kuv yuav tsum nrog koj tuag, los kuv yuav lees koj.”
P	Tas cov thwj tim puav leej hais ib yam li ntawd. ₃₆ Yes Xus nrog cov thwj tim mus txog ib qho chaw hu ua Nkes Txes Mas Nis. Nws hais rau lawv tias :
✠	“Nej zaum ntawm no, kuv yuav mus teev Ntuj nyob tod.”
P	₃₇ Yes Xus coj Pob Zeb thiab Ntxes Npes Dais ob tug tub nrog nws mus. Nws pib tu siab thiab pib txhawj. ₃₈ Nws hais rau lawv tias :
✠	“Kuv tus plig tu siab yuav tuag, nej nyob ntawm no, nej nrog kuv zov hmo.”
P	₃₉ Yes Xus mus deb me ntsis ntawm lawv, nws khoov ntsej muag ti av. Nws thov Ntuj li no :
✠	“Kuv Txiv, yog koj kheev no, thov kom lub ntim no hla mus deb ntawm kuv ! Tab sis, txhob ua raws li kuv xav, koj ua raws li koj xav.”
P	₄₀ Yes Xus rov los ntawm nws cov thwj tim. Nws pom lawv tsaug zog. Nws hais rau Pob Zeb tias :
✠	“Ua li mas, nej tsis muaj peev xwm nrog kuv zov hmo ib teev. ₄₁ Nej zov hmo mas, nej teev Ntuj kom nej txhob poob rau hauv txoj kev ntxias. Lub tswv yim kub lug, tab sis lub cev nqaij tsis muaj zog.”
P	₄₂ Yes Xus rov mus teev Ntuj dua, zaum ob. Nws hais tias :
✠	“Kuv Txiv, yog kuv tsis haus, lub ntim no yuav tsis hla mus, mas cia ua raws li koj lub siab xav.”
P	₄₃ Yes Xus rov qab los, nws pom cov thwj tim rov tsaug zog, vim lawv qhov muag tawv. ₄₄ Yes Xus cia lawv nyob lawv, nws rov mus. Nws rov teev Ntuj dua zaum peb. Nws rov hais tib co lus li qub. ₄₅ Yes Xus rov los ntawm cov thwj tim, nws hais rau lawv tias :
✠	“Nej tseem tsaug zog. Nej so mas. Yuav txog lub sij hawm uas luag muab Neeg Leej Tub rau hauv cov neeg txhaum txhais tes. ₄₆ Nej sawv ! Peb mus. Tus muab kuv rau luag tuaj yuav txog.”
P	₄₇ Thaum Yes Xus tseem hais lus li ntawd, ces Yus Das tuaj txog. Yus Das yog ib tug hauv pab Kaum Ob. Muaj ib pab neeg coob nqa ntaj nqa qws nrog nws tuaj. Yog cov thawj leej choj thiab pej xeem cov txwj laus xa lawv tuaj. ₄₈ Tus muab Yes Xus muag xub qhia lub cim no rau lawv :
L	“Yes Xus yog tus kuv yuav nwj, nej ntes nws.”
P	₄₉ Ces tam sis ntawd, Yus Das txav zog los ntawm Yes Xus, Yus Das hais tias :
L	“Koj nyob kaj lug, Xib Hwb !”
P	Ces Yus Das nwj Yes Xus. ₅₀ Yes Xus hais rau nws tias :
✠	“Phooj ywg, koj kav tsij ua qhov koj tuaj ua.”
P	Ces pab neeg ntawd txav zog los, lawv cev tes nthos nkaus Yes Xus : lawv ntes nws. ₅₁ Nyob hauv cov neeg nrog Yes Xus, muaj ib tug cev tes rho hlo nws rab ntaj, tib ntag rau tus Tuam Leej Choj ib tug tub txib, txiav nws ib ya pob ntseg tu nrho. ₅₂ Yes Xus hais rau tus ntawd tias :
✠	“Koj rov ntxig ntaj rau hauv hnab, vim tias cov xuas ntaj tua luag, yuav raug ntaj tua tuag. ₅₃ Koj tsis nco txog tias yog kuv thov kuv Txiv, mas kuv Txiv yuav muab tshaj kaum ob vam leej Tshiab tam sis no rau kuv ? ₅₄ Tab sis, yog kuv ua li ntawd, cov lus uas Ntawv Ntshiab sau cia tias yuav tsum muaj tuaj zoo li no, yuav ua cas tsheej xeeb tau ?"
P	₅₅ Thaum ntawd, Yes Xus hais rau cov neeg tuaj ntawd tias :
✠	“Nej nqa ntaj nqa qws tuaj ntes kuv, xws li ntes tub sab. Kuv niaj hnub zaum qhia hauv lub Tuam Tsev Teev Ntuj, nej ho tsis ntes kuv. ₅₆ Tas ib puas tsav yam no tshwm sim tuaj kom muaj raws li cov yaj saub cov Ntawv."
P	Ces cov thwj tim tso Yes Xus pov tseg, lawv sawv daws khiav tas. ₅₇ Pab neeg tuaj ntes Yes Xus coj Yes Xus mus hauv tus Tuam Leej Choj Kais Fas tsev. Cov Kws Ntawv Ntshiab thiab cov txwj laus tuaj sib sau nyob hauv. ₅₈ Hos Pob Zeb raws Yes Xus qab, nws tuaj deb raws mus txog ntawm tus Tuam Leej Choj lub loog. Nws nkag mus rau sab loog hauv, mus nrog cov tub qhev zaum. Nws xav pom saib lawv yuav ua li cas ntxiv. ₅₉ Cov thawj leej choj thiab cov txwj laus Xas Nes Nrees sib koom nrhiav ib zag liam rau Yes Xus, kom tau kev muab nws tua. ₆₀ Muaj coob tus tim khawv cuav tuaj, tab sis lawv nrhiav tsis tau ib zag liam rau Yes Xus. ₆₁ Nyob nyob, muaj ob tug tuaj txog. Nkawd hais tias :
L	“Tus neeg ntawd hais tias : Kuv muaj peev xwm rhuav Tswv Ntuj lub tsev Ntshiab. Peb hnub kuv rov txhim tau.”
P	₆₂ Ces tus Tuam Leej Choj sawv los hais rau Yes Xus tias :
L	“Koj tsis teb dab tsi lod ? Cov neeg no ua pov thawj liam dab tsi rau koj ?”
P	₆₃ Yes Xus tsis teb. Tus Tuam Leej Choj hais rau Yes Xus tias :
L	“Kuv hu txog tus Tswv Ntuj muaj Txoj Sia, koj hais meej rau peb saib koj puas yog Leej Pleev, puas yog Tswv Ntuj Leej Tub ?”
P	₆₄ Yes Xus teb rau nws tias :
✠	“Yog li koj hais ntawd. Kuv tseem hais rau nej tias : txij no mus, nej yuav pom Neeg Leej Tub zaum ntawm Leej Muaj Hwj Huam sab xis, thiab los saum cov huab saum ntuj los.”
P	₆₅ Ces tus Tuam Leej Choj dua nws tej tsoos tsho, nws hais tias :
L	“Nws thuam Ntuj ! Peb tseem yuav nrhiav tim khawv ua dab tsi ? Nej nyuam qhuav hnov nws lo lus thuam Ntuj ! ₆₆ Nej xav li cas ?"
P	Lawv teb tias :
L	“Nws tsim nyog tuag.”
P	₆₇ Ces lawv nto aub ncaug rau Yes Xus ntsej muag. Lawv ob peb ncuav pias rau Yes Xus. Muaj ib txhia ntaus Yes Xus, ₆₈ thiab lawv hais tias :
L	“Leej Pleev ! Koj ua yaj saub qhia peb saib tus ntaus koj yog leej twg ?”
P	₆₉ Pob Zeb zaum nraum zoov, hauv lub tshav loog. Ib tug ntxhais txib txav los hais rau Pob Zeb tias :
L	“Koj kuj nrog tus Nkas Lis Lais Yes Xus ntawd ua ke thiab.”
P	₇₀ Tab sis Pob Zeb tsis lees, nws tab meeg hais rau sawv daws tias :
L	“Kuv tsis paub koj hais dab tsi.”
P	₇₁ Ces Pob Zeb tawm mus rau ntawm lub qhov rooj loog. Muaj dua ib tug pom Pob Zeb, nws hais rau cov neeg nyob ntawd tias :
L	“Tus ntawd nrog tus Yes Xus Nas Xaus Les ua ke.”
P	₇₂ Pob Zeb twv ntuj twv teb tsis lees, nws hais tias :
L	“Kuv tsis paub tus neeg ntawd.”
P	₇₃ Ib me ntsis tom qab, cov neeg nyob ntawd txav los hais rau Pob Zeb tias :
L	“Yeej yog xwb, koj yog lawv ib tug : txawm li cas los koj lub suab hais lus ua kom paub koj.”
P	₇₄ Pob Zeb haj yam twv ntuj twv teb heev dua tias :
L	“Kuv tsis paub tus neeg ntawd.”
P	Ces tam sis ntawd, ib tug qaib qua. ₇₅ Pob Zeb thiaj nco dheev txog lo lus uas Yes Xus hais tias : “Qaib tsis tau qua, koj twb tsis kam lees paub kuv peb zaug.” Pob Zeb tawm mus nraum zoov, nws quaj tu siab tas nrho. 27 ₁ Thaum kaj ntug, tas cov thawj leej choj thiab pej xeem cov txwj laus sab laj kom tau muab Yes Xus tua. ₂ Lawv muab nws khi tas, lawv coj nws mus rau tus nom tswj teb chaws hu ua Pis Las Tos. ₃ Yus Das yog tus muab Yes Xus muag. Thaum nws pom tias lawv txiav lub txim tuag rau Yes Xus, mas nws khuv xim. Ces nws nqa peb caug lub txiaj nyiag rov qab mus rau cov thawj leej choj thiab cov txwj laus. Nws hais tias :
L	₄ “Kuv ua txhaum lawm, vim kuv muag ib co ntshav tsis txhaum.”
P	Tab sis lawv hais tias :
L	“Peb tsis quav ntsej. Qhov ntawd, yog koj hauj lwm.”
P	₅ Ces nws muab cov txiaj nyiag pov rau hauv lub tsev ntshiab, nws tawm mus dai tuag. ₆ Cov thawj leej choj khaws cov nyiaj ntawd, lawv hais tias :
L	“Kev cai tsis pub khaws cov nyiaj ntawd rau hauv lub txhab nyiaj, vim yog nqe ntshav.”
P	₇ Thaum lawv tuav xam haum lawm, lawv muab cov nyiaj ntawd muas tus puab lauj kaub daim teb cia faus cov pej kum neeg. ₈ Vim li no, daim teb ntawd thiaj hu ua ‘Teb Ntshav’ los txog niaj hnub no. ₉ Qhov no tshwm sim raws li Yaj Saub Yes Les Mias lo lus hais tias : Peb caug lub txiaj nyiag uas yog nqi muag tus Tsim Txiaj raws li cov tub His Xas Lais txiav, ₁₀ lawv muab coj mus pauv tus puab lauj kaub daim teb, raws li Huab Tais qhia kuv kom ua. ₁₁ Lawv coj Yes Xus mus cuag tus nom tswj teb chaws. Ces tus nom tswj teb chaws nug Yes Xus tias :
L	“Koj puas yog cov Yus Das tus vaj ?”
P	Yes Xus teb tias :
✠	“Yog li koj hais ntawd.”
P	₁₂ Cov thawj leej choj thiab cov txwj laus liam rau Yes Xus, Yes Xus tsis teb dab tsi li. ₁₃ Ces Pis Las Tos hais rau Yes Xus tias :
L	“Koj tsis hnov lawv liam pes tsawg zaj rau koj lod ?”
P	₁₄ Yes Xus tsis teb ib lo lus li, mas tus tswj teb chaws poob siab tas nrho. ₁₅ Niaj xyoo, thaum ua lub ntees Hla, tus nom tswj teb chaws tso ib tug neeg raug txim mus. Tsoom sid xav kom tso tus twg mas nws tso tus ntawd. ₁₆ Muaj ib tug neeg raug txim nto moo, hu ua Npas Las Npas. ₁₇ Thaum lawv sib sau ua ke, Pis Las Tos hais rau lawv tias :
L	"Nej xav kom kuv tso tus twg rau nej, tso Npas Las Npas, los tso tus Yes Xus uas luag hu nws ua Leej Pleev ?"
P	₁₈ Pis Las Tos paub zoo tias tos lawv coj Yes Xus tuaj rau nws, yog vim lawv khib. ₁₉ Thaum Pis Las Tos zaum saum lub theej kiab txiav txim, nws poj niam fi xov tuaj hais rau nws tias :
L	"Koj txhob raus tes ua dab tsi rau tus neeg ncaj ntawd. Hnub no, kuv ua npau suav txog nws, kuv ntxhov siab kawg."
P	₂₀ Cov thawj leej choj thiab cov txwj laus cob tsoom pej xeem kom taij tso Npas Las Npas, hos muab Yes Xus tua. ₂₁ Tus nom tswj teb chaws hais rau lawv tias :
L	"Ob tug neeg no, nej xav kom kuv tso tus twg rau nej ?"
P	Lawv teb tias :
L	"Npas Las Npas."
P	₂₂ Pis Las Tos hais rau lawv tias :
L	"Kuv yuav ua dab tsi rau Yes Xus, tus uas luag hu nws ua Leej Pleev ?"
P	Lawv sawv daws hais tias :
L	"Muab nws tua saum ntoo cuam !"
P	₂₃ Pis Las Tos hais tias :
L	"Nws tau ua dab tsi phem ?"
P	Lawv haj yam nthe nrov tias :
L	"Muab nws tua saum ntoo cuam !"
P	₂₄ Pis Las Tos pom tias nws ua tsis tau dab tsi, vim sawv daws pheej ua ntxhov hnyo, ces Pis Las Tos muab dej los ntxuav nws tes rau sawv daws ntsia, nws hais tias :
L	"Kuv tsis ris cov ntshav ntawd, nej mam saib nej !"
P	₂₅ Tas tsoom pej xeem teb tias :
L	"Cia nws cov ntshav poob los saum peb thiab peb cov me nyuam !"
P	₂₆ Pis Las Tos tso Npas Las Npas los rau lawv, nws muab Yes Xus rau cov tub rog nplawm tas, nws tso Yes Xus rau lawv cia lawv muab nws dai saum ntoo cuam. ₂₇ Tus nom tswj teb chaws cov tub rog coj Yes Xus nrog lawv mus hauv lub tshav txiav txim. Lawv txhib tas npoj peeb zeej los hiam Yes Xus. ₂₈ Cov tub rog hle Yes Xus cov ris tsho, lawv muab ib lub tsho tshaj sab liab los rau nws hnav. ₂₉ Lawv muab ib co pos sib qhaib ua ib lub kauj tso saum nws taub hau. Lawv muab ib rab pas tauj rau nws sab tes xis tuav. Cov tub rog txhos caug ntawm Yes Xus xub ntiag, lawv thuam Yes Xus tias :
L	"Nyob kaj lug, cov Yus Das tus vaj !"
P	₃₀ Lawv nto aub ncaug rau Yes Xus, lawv muab rab pas tauj ntaus Yes Xus taub hau. ₃₁ Thaum lawv thuam Yes Xus tas, lawv muab lub tsho tshaj sab liab hle, lawv rov muab Yes Xus cov ris tsho rau Yes Xus hnav. Ces lawv coj Yes Xus mus dai saum ntoo cuam. ₃₂ Thaum lawv tawm mus lawm sab nraud, lawv pom ib tug neeg tuaj Xis Les Nas tuaj. Nws hu ua Xis Moos. Lawv kom Xis Moos kwv Yes Xus tus ntoo cuam. ₃₃ Lawv mus txog ib thaj chaw hu ua Nkos Nkos Tas, txhais tias chaw Khauj Khaum Taub Hau, ₃₄ lawv muab ib co cawv xyaw tsib rau Yes Xus haus. Yes Xus saj me ntsis, nws tsis xav haus. ₃₅ Thaum cov tub rog muab Yes Xus ntsia rau saum ntoo cuam tas, lawv ntaus kuam sib faib Yes Xus cov ris tsho. ₃₆ Ces cov tub rog zaum, lawv nyob zov Yes Xus. ₃₇ Lawv sau ntawv dai rau ntawm Yes Xus taub hau, piav txog Yes Xus lub txim tias : "Tus no yog Yes Xus, cov Yus Das tus vaj." ₃₈ Lawv muab ob tug tub sab dai saum ntoo cuam zoo li Yes Xus thiab : ib tug nyob sab xis, ib tug nyob sab laug. ₃₉ Cov neeg dua kev co taub hau thuam Yes Xus, ₄₀ lawv hais tias :
L	"Koj yog tus yuav rhuav lub Tuam Tsev Ntshiab, rov txhim peb hnub tau li qub, koj rov cawm koj mas ! Saib koj yog Tswv Ntuj Leej Tub no, koj nqes saum ntoo cuam los !"
P	₄₁ Cov thawj leej choj nrog cov Kws Ntawv Ntshiab thiab cov txwj laus hnyos Yes Xus tias :
L	₄₂ "Nws cawm tau luag tej, nws rov cawm tsis tau nws ! Saib nws yog His Xas Lais tus vaj no, kom nws nqes saum ntoo cuam los nyem no, peb thiaj yuav ntseeg txog nws ! ₄₃ Nws tso siab rau Tswv Ntuj ; nyem no cia Tswv Ntuj tuaj npo nws dim, saib Tswv Ntuj puas nyiam nws ! Nws yeej hais tias : "Kuv yog Tswv Ntuj Leej Tub !"
P	₄₄ Tab yog ob tug tub sab uas dai saum ntoo cuam nrog Yes Xus, kuj thuam Yes Xus. ₄₅ Txij tav su mus txog peb teev, tas lub ntiaj teb tsaus ntuj nti. ₄₆ Ze ntawm peb teev, Yes Xus qw ib suab nrov nrov tias :
✠	"Es Lis, Es Lis, les mas xas npas thas nis ?"
P	txhais tias
✠	"Kuv tus Tswv Ntuj, kuv tus Tswv Ntuj, ua cas koj tso kuv pov tseg ?"
P	₄₇ Cov neeg nyob ntawd, muaj ib txhia hais tias :
L	"Saib, nws hu txog Es Lias !"
P	₄₈ Tam sis ntawd muaj ib tug khiav mus muab ib qho rwb coj mus tub dej qaub, nws muab chob rau ntawm ib tug ntsis pas tauj cev mus rau Yes Xus haus. ₄₉ Tab sis muaj ib co hais rau nws tias :
L	"Tos me ntsis tso ! Cia saib peb puas pom Es Lias tuaj cawm nws !"
P	₅₀ Yes Xus rov qw ib suab nrov nrov tas, ces nws txoj sia tu. Sawv daws txhos caug ₅₁ Thaum ntawd, daim ntaub thaiv Kem Ntshiab ntuag rhe ua ob sab, txij yav saud thoob plaws rau hauv taw ; lub ntiaj teb qeeg, pob tsuas tawg, ₅₂ tej rooj ntxas qhib los, coob leej neeg ntshiab uas tau dua nra tas lawm, lawv lub cev sawv rov los. ₅₃ Thaum Yes Xus sawv rov los, lawv tawm hauv ntxa, lawv chaws mus hauv lub Nroog Ntshiab, lawv tawm tuaj rau coob leej pom. ₅₄ Tus xab txheeb thiab cov tub rog uas nrog nws zov Yes Xus, pom ntiaj teb qeeg thiab pom tej xwm tshwm tuaj zoo li ntawd, lawv ntshai kawg, lawv hais tias :
L	"Tus no yog Tswv Ntuj Leej Tub tiag !"
P	₅₅ Muaj ib pab poj niam coob nyob tsis deb ntawd ntsia. Yog cov poj niam uas raws Yes Xus hauv xeev Nkas Lis Lais tuaj, lawv tsob hwb Yes Xus. ₅₆ Cov poj niam ntawd, ib tug yog Mab Liab Mas Ntas Las, thiab tus Mab Liab uas yog Yas Kos thiab Yos Xes nkawd niam, hos ib tug yog Ntxes Npes Dais ob tug tub niam. ₅₇ Thaum tsaus ntuj, muaj ib tug neeg nplua nuj nyob As Lis Mas Tias tuaj, nws lub npe hu ua Yos Xes. Nws kuj yog Yes Xus ib tug thwj tim thiab. ₅₈ Nws mus cuag Pis Las Tos, nws thov Yes Xus lub cev. Pis Las Tos txib kom lawv muab Yes Xus lub cev rau Yos Xes. ₅₉ Yos Xes nqa Yes Xus lub cev, nws muab qhwv hauv ib chaws ntaub huv, ₆₀ ces nws coj mus tso rau hauv ib lub ntxa tshiab, uas nws kom luag txaug rau hauv ib phab tsua. Nws dov ib daim txiag zeb dav los kaw rooj ntxas ; ces nws rov mus tsev. ₆₁ Nyob ntawd, muaj Mab Liab Mas Ntas Las thiab lwm tus Mab Liab zaum ncaj lub rooj ntxas. ₆₂ Tag kis sawv ntxov, yam li dhau Hnub Npaj Hmoov Hla lawm, cov thawj leej choj thiab cov Fas Lis Xais ua ke mus hauv Pis Las Tos tsev, lawv hais rau nws tias :
L	₆₃ "Huab tais, peb nco ntsoov tias tus niag dag ntawd, thaum ua neej nyob, nws hais tias : "Peb hnub tom qab, kuv yuav sawv rov los !" ₆₄ Ua li mas koj txib kom muaj neeg zov lub ntxa zoo zoo mus txog hnub peb, tsam nws cov thwj tim mus nyiag nws lub cev, ces lawv hais rau tsoom pej xeem tias 'Nws sawv hauv cov tub tuag rov los lawm !' Ces cov lus dag no haj yam yuav phem dua qub."
P	₆₅ Pis Las Tos hais rau lawv tias :
L	"Nej twb muaj ib pab zov keeb, nej kom lawv zov raws li nej siab."
P	₆₆ Lawv rov mus npaj txhua yam zov lub ntxa, lawv muab daim txiag zeb cam, lawv tso ib pab zov keeb nyob ntawd zov. Yog Huab Tais Yes Xus Lub Moo Zoo

YES XUS KEV TXOM NYEM, RAWS MAS TAIS (Zaj luv - Bài ngắn)
Mas Tais 27:11-54
Yes Xus kev txom nyem, peb tus Huab Tais.

P	Nej mloog Yes Xus raug kev txom nyem npaum li cas, raws li Mas Tais ntawv Moo Zoo piav. ₁₁ Muaj ib zaug, Lawv coj Yes Xus mus cuag tus nom tswj teb chaws Pis Las Tos. Ces tus nom tswj teb chaws nug Yes Xus tias :
L	“Koj puas yog cov Yus Das tus vaj ?”
P	Yes Xus teb tias :
✠	“Yog li koj hais ntawd.”
P	₁₂ Cov thawj leej choj thiab cov txwj laus liam rau Yes Xus, Yes Xus tsis teb dab tsi li. ₁₃ Ces Pis Las Tos hais rau Yes Xus tias :
L	“Koj tsis hnov lawv liam pes tsawg zaj rau koj lod ?”
P	₁₄ Yes Xus tsis teb ib lo lus li, mas tus tswj teb chaws poob siab tas nrho. ₁₅ Niaj xyoo, thaum ua lub ntees Hla, tus nom tswj teb chaws tso ib tug neeg raug txim mus. Tsoom sid xav kom tso tus twg mas nws tso tus ntawd. ₁₆ Muaj ib tug neeg raug txim nto moo, hu ua Npas Las Npas. ₁₇ Thaum lawv sib sau ua ke, Pis Las Tos hais rau lawv tias :
L	"Nej xav kom kuv tso tus twg rau nej, tso Npas Las Npas, los tso tus Yes Xus uas luag hu nws ua Leej Pleev ?"
P	₁₈ Pis Las Tos paub zoo tias tos lawv coj Yes Xus tuaj rau nws, yog vim lawv khib. ₁₉ Thaum Pis Las Tos zaum saum lub theej kiab txiav txim, nws poj niam fi xov tuaj hais rau nws tias :
L	"Koj txhob raus tes ua dab tsi rau tus neeg ncaj ntawd. Hnub no, kuv ua npau suav txog nws, kuv ntxhov siab kawg."
P	₂₀ Cov thawj leej choj thiab cov txwj laus cob tsoom pej xeem kom taij tso Npas Las Npas, hos muab Yes Xus tua. ₂₁ Tus nom tswj teb chaws hais rau lawv tias :
L	"Ob tug neeg no, nej xav kom kuv tso tus twg rau nej ?"
P	Lawv teb tias :
L	"Npas Las Npas."
P	₂₂ Pis Las Tos hais rau lawv tias :
L	"Kuv yuav ua dab tsi rau Yes Xus, tus uas luag hu nws ua Leej Pleev ?"
P	Lawv sawv daws hais tias :
L	"Muab nws tua saum ntoo cuam !"
P	₂₃ Pis Las Tos hais tias :
L	"Nws tau ua dab tsi phem ?"
P	Lawv haj yam nthe nrov tias :
L	"Muab nws tua saum ntoo cuam !"
P	₂₄ Pis Las Tos pom tias nws ua tsis tau dab tsi, vim sawv daws pheej ua ntxhov hnyo, ces Pis Las Tos muab dej los ntxuav nws tes rau sawv daws ntsia, nws hais tias :
L	"Kuv tsis ris cov ntshav ntawd, nej mam saib nej !"
P	₂₅ Tas tsoom pej xeem teb tias :
L	"Cia nws cov ntshav poob los saum peb thiab peb cov me nyuam !"
P	₂₆ Pis Las Tos tso Npas Las Npas los rau lawv, nws muab Yes Xus rau cov tub rog nplawm tas, nws tso Yes Xus rau lawv cia lawv muab nws dai saum ntoo cuam. ₂₇ Tus nom tswj teb chaws cov tub rog coj Yes Xus nrog lawv mus hauv lub tshav txiav txim. Lawv txhib tas npoj peeb zeej los hiam Yes Xus. ₂₈ Cov tub rog hle Yes Xus cov ris tsho, lawv muab ib lub tsho tshaj sab liab los rau nws hnav. ₂₉ Lawv muab ib co pos sib qhaib ua ib lub kauj tso saum nws taub hau. Lawv muab ib rab pas tauj rau nws sab tes xis tuav. Cov tub rog txhos caug ntawm Yes Xus xub ntiag, lawv thuam Yes Xus tias :
L	"Nyob kaj lug, cov Yus Das tus vaj !"
P	₃₀ Lawv nto aub ncaug rau Yes Xus, lawv muab rab pas tauj ntaus Yes Xus taub hau. ₃₁ Thaum lawv thuam Yes Xus tas, lawv muab lub tsho tshaj sab liab hle, lawv rov muab Yes Xus cov ris tsho rau Yes Xus hnav. Ces lawv coj Yes Xus mus dai saum ntoo cuam. ₃₂ Thaum lawv tawm mus lawm sab nraud, lawv pom ib tug neeg tuaj Xis Les Nas tuaj. Nws hu ua Xis Moos. Lawv kom Xis Moos kwv Yes Xus tus ntoo cuam. ₃₃ Lawv mus txog ib thaj chaw hu ua Nkos Nkos Tas, txhais tias chaw Khauj Khaum Taub Hau, ₃₄ lawv muab ib co cawv xyaw tsib rau Yes Xus haus. Yes Xus saj me ntsis, nws tsis xav haus. ₃₅ Thaum cov tub rog muab Yes Xus ntsia rau saum ntoo cuam tas, lawv ntaus kuam sib faib Yes Xus cov ris tsho. ₃₆ Ces cov tub rog zaum, lawv nyob zov Yes Xus. ₃₇ Lawv sau ntawv dai rau ntawm Yes Xus taub hau, piav txog Yes Xus lub txim tias : "Tus no yog Yes Xus, cov Yus Das tus vaj." ₃₈ Lawv muab ob tug tub sab dai saum ntoo cuam zoo li Yes Xus thiab : ib tug nyob sab xis, ib tug nyob sab laug. ₃₉ Cov neeg dua kev co taub hau thuam Yes Xus, ₄₀ lawv hais tias :
L	"Koj yog tus yuav rhuav lub Tuam Tsev Ntshiab, rov txhim peb hnub tau li qub, koj rov cawm koj mas ! Saib koj yog Tswv Ntuj Leej Tub no, koj nqes saum ntoo cuam los !"
P	₄₁ Cov thawj leej choj nrog cov Kws Ntawv Ntshiab thiab cov txwj laus hnyos Yes Xus tias :
L	₄₂ "Nws cawm tau luag tej, nws rov cawm tsis tau nws ! Saib nws yog His Xas Lais tus vaj no, kom nws nqes saum ntoo cuam los nyem no, peb thiaj yuav ntseeg txog nws ! ₄₃ Nws tso siab rau Tswv Ntuj ; nyem no cia Tswv Ntuj tuaj npo nws dim, saib Tswv Ntuj puas nyiam nws ! Nws yeej hais tias : "Kuv yog Tswv Ntuj Leej Tub !"
P	₄₄ Tab yog ob tug tub sab uas dai saum ntoo cuam nrog Yes Xus, kuj thuam Yes Xus. ₄₅ Txij tav su mus txog peb teev, tas lub ntiaj teb tsaus ntuj nti. ₄₆ Ze ntawm peb teev, Yes Xus qw ib suab nrov nrov tias :
✠	"Es Lis, Es Lis, les mas xas npas thas nis ?"
P	txhais tias
✠	"Kuv tus Tswv Ntuj, kuv tus Tswv Ntuj, ua cas koj tso kuv pov tseg ?"
P	₄₇ Cov neeg nyob ntawd, muaj ib txhia hais tias :
L	"Saib, nws hu txog Es Lias !"
P	₄₈ Tam sis ntawd muaj ib tug khiav mus muab ib qho rwb coj mus tub dej qaub, nws muab chob rau ntawm ib tug ntsis pas tauj cev mus rau Yes Xus haus. ₄₉ Tab sis muaj ib co hais rau nws tias :
L	"Tos me ntsis tso ! Cia saib peb puas pom Es Lias tuaj cawm nws !"
P	₅₀ Yes Xus rov qw ib suab nrov nrov tas, ces nws txoj sia tu. Sawv daws txhos caug ₅₁ Thaum ntawd, daim ntaub thaiv Kem Ntshiab ntuag rhe ua ob sab, txij yav saud thoob plaws rau hauv taw ; lub ntiaj teb qeeg, pob tsuas tawg, ₅₂ tej rooj ntxas qhib los, coob leej neeg ntshiab uas tau dua nra tas lawm, lawv lub cev sawv rov los. ₅₃ Thaum Yes Xus sawv rov los, lawv tawm hauv ntxa, lawv chaws mus hauv lub Nroog Ntshiab, lawv tawm tuaj rau coob leej pom. ₅₄ Tus xab txheeb thiab cov tub rog uas nrog nws zov Yes Xus, pom ntiaj teb qeeg thiab pom tej xwm tshwm tuaj zoo li ntawd, lawv ntshai kawg, lawv hais tias :
L	"Tus no yog Tswv Ntuj Leej Tub tiag !"
P	Yog Huab Tais Yes Xus Lub Moo Zoo