Zaj Nyeem Ib
His Xais 63:1-3
Huab Tais Tswv Ntuj lub tswv yim nyob saum kuv,
Nws tso kuv xa lub Moo Zoo rau cov neeg txheej qis.
Cov lus nyob hauv Ntawv His Xais
1 Huab Tais Tswv Ntuj lub tswv yim nyob saum kuv, vim Huab Tais pleev kuv. Nws tso kuv xa lub Moo Zoo rau cov neeg txheej qis, tshaj kev cawm rau cov thoj nam nyob pej kum teb, tshaj kev twj lij rau cov neeg nyob hauv tsev loj faj.
2 Huab Tais xa kuv mus tshaj Huab Tais ib lub xyoo pub txiaj ntsim, tshaj tias muaj ib hnub uas peb tus Tswv Ntuj yuav rob caub. Huab Tais xa kuv mus nplij cov neeg ntoo xyom kom sawv.
3 Nws muab ib txoj phuam los hloov lawv txoj xyom, pub ib co roj lom zem los hloov lawv cov tsoos tsho tu siab, kom lawv txhob ntsoos.
Yog Tswv Ntuj lo Lus
Nkauj Paj Nruag Txais Ntuj Lus
NPN 89:2-3, 4-5, 21-22, 25.27 (2)
Txais : Kuv yuav hu nkauj cav txog Huab Tais txoj kev hlub.
1. Kuv yuav hu nkauj cav txog Huab Tais txoj kev hlub,
kuv lub ncauj yuav tshaj kom sawv daws paub koj lub siab ncaj txheej dhau txheej.
Kuv hais tias : Koj txoj kev hlub nyob ruaj nreb mus li ;
koj tsa koj txoj kev ncaj rau saum ntuj. Teb.
2. Huab Tais hais tias : Kuv cog ib co lus rau tus kuv xaiv,
kuv hais khov rau kuv tus tub txib Das Vis tias :
Kuv tsa koj caj ces kom nyob mus li,
kuv txhim ib lub theej kiab rau koj zaum tiam dhau tiam. Teb.
3. Kuv nrhiav tau Kuv tus tub txib Das Vis,
Kuv muab Kuv cov roj ntshiab los pleev nws.
Kuv txhais tes muaj zog yuav nyob ze nws.
Kuv sab npab yuav ua kom nws muaj zog. Teb.
4. Kuv txoj kev ncaj thiab kev hlub nyob ze nws,
Kuv lub npe yuav tsa nws hauv pliaj.
Nws yuav hu kuv tias : "Kuv txiv !
Kuv tus Tswv Ntuj ! Phab Tsua cawm kuv !" Teb.
Zaj Nyeem Ob
2 Tis Mos Tes 2:1-7
Zaj uas koj tau kawm ntawm kuv mas koj muab cev rau cov neeg siab ruaj kom lawv ceev tseg. Cov neeg ntawd yuav txawj qhia luag tej thiab.
Cov lus Paj Lug sau tuaj rau Tis Mos Tes tsab ntawv ib
1 Kuv leej tub, koj xyaum kom koj muaj zog zuj zus nyob hauv Yes Xus Pleev lub txiaj ntsim.
2 Zaj uas koj tau kawm ntawm kuv thiab zaj uas ntau tus tim khawv tau zeem tseeb txog, mas koj muab cev rau cov neeg siab ruaj kom lawv ceev tseg. Cov neeg ntawd yuav txawj qhia luag tej thiab.
3 Koj kav tsij txais feem kev txom nyem uas yog koj tug, kom phim Yes Xus Pleev ib tug tub rog zoo.
4 Nyob hauv txoj hauj lwm tuav ntaj tuav hmuv, yog leej twg xav ua xis tus sau nws, mas nws yeej tsis kov tej hauj lwm uas yog pej xeem hauj lwm.
5 Tus nrog luag sib ntsuas zog, yog nws nrog luag ntsuas zog raws kev raws cai, mas nws thiaj tau txais lub kaus mom yeej.
6 Tus tswv liaj uas tau siv zog khwv, mas tsim nyog nws xub noj cov qoob nws sau.
7 Koj to taub qhov kuv xav hais mog. Txawm li cas los Huab Tais yuav ua kom koj to taub txhua tsav txhua yam.
Yog Tswv Ntuj lo Lus
Nkauj Cav Txog Lub Moo Zoo
Zam 15:16
As les lus yas. As les lus yas.
Kuv xaiv nej thiab yog kuv xa nej mus kom nej txi txiv, kom nej cov txiv nyob ruaj.
As les lus yas.
Ntawv Moo Zoo
Mas Tais 9:35-10:1
Nej thov tus Tswv qoob kom nws xa ib co tub zog tuaj sau nws cov qoob.
Nej mloog ib zag nyob hauv Mas Tais Ntawv Moo Zoo
935 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si.
36 Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov.
37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg.
38 Nej thov tus Tswv qoob kom nws xa ib co tub zog tuaj sau nws cov qoob."
101 Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. Yog Huab Tais Yes Xus Lub Moo Zoo
){kind=link}