Zaj Nyeem Ib (chọn một trong bốn bài)
Bài 1
Hauv Paus 11:1-9
Huab Tais ua kom ntiaj teb neeg hais lus tsis sib to taub.
Cov lus nyob hauv Ntawv Hauv Paus
1 Thaum ntawd, tas ntiaj teb sawv daws hais ib xeem lus xwb thiab siv ib cov lus xwb.
2 Thaum lawv tsiv sab toob fab los mus, lawv los txog ib lub tiaj nyob hauv teb chaws Sis Nes As, ces lawv los nyob ntawd.
3 Lawv sib hu tias : "Tuaj peb puab thwv cib, peb muab ci hauv hluav taws !" Ces lawv siv cov thwv cib ntawd los ua pob zeb txhim tsev thiab siv roj hmab dub los leem.
4 Lawv hais tias : "Tuaj peb txhim ib lub nroog rau peb thiab ib tug pej thuam kom lub ntsis siab siab mus txog saum ntuj, ces peb lub npe yuav nrov thiab peb thiaj li tsis sib tawg mus nyob thoob ntiaj teb."
5 Huab Tais nqes los xyuas lub nroog thiab tus pej thuam uas neeg tau tsa sawv.
6 Ces Huab Tais hais tias : "Ntsia saib, lawv yog ib haiv neeg thiab hais ib xeem lus xwb, ces lawv muaj peev xwm kawg, qhov no tsuas yog qhov lawv nyuam qhuav pib ua xwb, txij no mus yog lawv xav ua dab tsi thaum twg ces yuav tsis muaj ib yam uas lawv yuav ua tsis tau lawm.
7 Mus, peb sim nqes mus xyuas saib. Peb yuav ua kom lawv hais lus tsis sib to taub, ces lawv yuav tsis sib haum ntxiv lawm."
8 Huab Tais ua kom lawv sib tawg mus nyob thoob ntiaj teb ces lawv tso tseg tsis txhim lub nroog ntxiv.
9 Vim li ntawd thiaj hu ua pej thuam Npas Npes, vim yog nyob ntawd, Huab Tais ua kom ntiaj teb neeg hais lus tsis sib to taub, thiab yog nyob ntawd, Huab Tais ua kom neeg tawg mus nyob thoob ntiaj teb.
Yog Tswv Ntuj lo Lus
Bài 2
Kev Tsiv 19: 3-8a.16-20b
Huab Tais nqes los nyob saum lub ncov roob Xis Nais, sawv daws mus ntsib Tswv Ntuj.
Cov lus nyob hauv Ntawv Kev Tsiv
3 Hnub ntawd, Ces Mais Xes nce mus ntsib Tswv Ntuj saum lub roob. Huab Tais hu saum roob tuaj rau Mais Xes tias : "Koj yuav hais li no rau Yas Kos tsev neeg, koj yuav tshaj rau cov His Xas Lais tias :
4 Nej tau pom ntawm nej qhov muag tias kuv tau ua li cas rau cov Hais Nkws Tos, thiab kuv tau coj nej tawm xws li yog ya saum dav ob phab tis, kuv tau coj nej los cuag kuv.
5 Txij no mus, yog nej mloog kuv lus thiab nej khaws nraim kuv lo lus kuv cog rau nej, mas kuv yuav saib nej yog kuv tug nyob hauv tas txhua haiv neeg, vim lub ntiaj teb yog kuv li tas huv si.
6 Kuv yuav saib nej yog ib haiv neeg ua leej choj thiab yog ib haiv neeg qee rau Ntuj. Cov lus no yog cov uas koj yuav hais rau cov His Xas Lais."
7 Mais Xes thiaj hu cov txwj laus saib tsoom pej xeem tuaj, nws qhia lawv tas puas tsav yam uas Huab Tais tau hais rau nws.
8a Ces tas tsoom pej xeem sawv daws pom zoo ua ib lub suab teb tias : "Tas puas tsav yam Huab Tais tau hais, mas peb yuav ua tib si."
16 Neeg kis kaj ntug, thaum sawv ntxov, xob quaj nroo ntws thiab xob laim saum roob tuaj, muaj ib tauv huab tsaus nti ntsauv lub roob. Sawv daws hnov ib lub suab hom nrov muaj zog kawg, hos nyob hauv lub yeej, tsoom pej xeem sawv daws ntshai tshee na.
17 Mais Xes hais kom sawv daws tawm hauv yeej mus, yuav mus ntsib Tswv Ntuj, ces sawv daws mus nyob nram taw roob.
18 Lub roob Xis Nais ncho pa lug, vim Huab Tais txia ua hluav taws nqes los nyob saud. Pa taws ncho lug cuag li tawm hauv ib lub qhov txos loj los, hos tas lub roob co qeeg nkaws ua zog koog.
19 Hnov lub suab hom nrov loj zuj zus tuaj, Mais Xes hais lus rau Tswv Ntuj, Tswv Ntuj teb hauv lub suab xob nroo tuaj.
20b Huab Tais nqes los nyob saum lub roob Xis Nais, saum lub ncov roob.
Yog Tswv Ntuj lo Lus
Bài 3
Es Xes Kias 37: 1-14
Pob txha qhuav, Kuv yuav tshuab pa mus hauv nej ces nej yuav muaj sia.
Cov lus nyob hauv Ntawv Es Xes Kias
1 Hnub ntawd, Huab Tais txhais tes roos kuv thiab nws lub tswv yim coj kuv mus tsaws rau hauv ib lub vos hav muaj pob txha ntsawm nkaus.
2 Huab Tais kom kuv mus mus los los hauv nruab nrab cov pob txha. Cov pob txha ntau kawg puv ntia saum tej npoo av hauv lub vos hav. Yog ib co pob txha qhuav qhuav xwb.
3 Huab Tais hais rau kuv tias : "Neeg leej tub, cov pob txha ntawd puas yuav muaj txoj sia tau ?" Kuv teb tias : "Huab Tais Tswv Ntuj, koj thiaj paub."
4 Nws hais rau kuv tias : "Koj ua yaj saub tshaj lus rau cov pob txha. Koj hais rau lawv tias : Pob txha qhuav, nej mloog Huab Tais lo lus !"
5 Huab Tais Tswv Ntuj hais rau cov pob txha li no : "Kuv yuav tshuab pa mus hauv nej ces nej yuav muaj sia.
6 Kuv yuav muab leeg los lo rau nej, kuv yuav ua kom nej tej nqaij hlav, kuv yuav muab tawv mos los plooj nej, kuv yuav ua kom nej ua pa tau, ces nej yuav muaj sia. Nej thiaj yuav paub tias kuv yog Huab Tais."
7 Kuv tau ua yaj saub tshaj raws li Tswv Ntuj qhia kuv. Ces thaum kuv tab tom ua yaj saub tshaj lus, mas kuv txawm hnov nrov nroo ntws tuaj. Lub vos hav tshee tshee, cov pob txha ua zog thiab txav los sib dhos.
8 Kuv ntsia pom : lawv muaj leeg, nqaij xeeb tuaj vov tas, tawv hlav tuaj qhwv. Tab sis tsis muaj pa nyob hauv lawv.
9 Tswv Ntuj hais rau kuv tias : "Neeg leej tub, koj ua yaj saub tshaj lus rau txoj pa mas ! Koj ua yaj saub mas ! Koj hais li no rau txoj pa : 'Huab Tais Tswv Ntuj hais lo lus no : Txoj pa, koj tshuab tuaj ntawm plaub ceg kaum ntuj tuaj ! Koj tshuab rau saum cov tub tuag no kom lawv muaj txoj sia."
10 Kuv ua yaj saub tshaj raws li Tswv Ntuj qhia. Ces txoj pa thiaj tuaj rau hauv cov tub tuag. Lawv rov muaj sia tuaj thiab lawv sawv ntseg ntswb ntsees, zoo li ib npoj tub rog coob tas nrho.
11 Tswv Ntuj hais rau kuv tias : "Neeg leej tub, cov pob txha no yog tas nrho His Xas Lais tsev neeg. Lawv niaj hnub hais tias : 'Peb cov pob txha qhuav tas ! Peb txoj kev tso siab puas tas ! Peb yuav tuag tu noob !'
12 Vim li ntawd, koj thiaj yuav ua yaj saub tshaj rau lawv. Koj hais rau lawv tias : Huab Tais Tswv Ntuj hais li no : Nej ntsia saib ! Kuv haiv neeg, kuv yuav qhib nej cov rooj ntxas. Kuv yuav coj nej rov mus rau His Xas Lais thaj av.
13 Kuv haiv neeg, thaum kuv yuav qhib nej cov rooj ntxas thiab kuv tsa nej sawv hauv qhov ntxa los, mas nej yuav paub tias kuv yog Huab Tais.
14 Kuv yuav tso kuv txoj pa mus hauv nej ces nej yuav rov muaj txoj sia. Kuv yuav tsa nej nyob txawm hauv nej thaj av. Nej yuav paub tias kuv yog Huab Tais, kuv hais yam twg mas kuv ua yam twg. Yog Huab Tais hais lo lus ntawd."
Yog Tswv Ntuj lo Lus
Bài 4
Yos Es 3: 1-5
Kuv yuav tso kuv lub tswv yim nqes los rau saum sawv daws.
Cov lus nyob hauv Ntawv Yos Es
1 Huab Tais hais li no : Kuv yuav tso kuv lub tswv yim nqes los rau saum sawv daws. Nej cov tub cov ntxhais yuav ua yaj saub. Nej cov laus yuav ua npau suav. Cov hluas yuav yees pom xyeem tej yam txawv.
2 Tab yog cov qhev, tsis hais cov poj niam los cov txiv neej, mas hnub ntawd kuv yuav tso kuv lub tswv yim nqes los rau saum lawv.
3 Kuv yuav ua tej lub cim nyob saum ntuj thiab nyob ntiaj teb no. Yuav muaj ntshav, muaj hluav taws thiab pa taws los ua tej lub cim.
4 Lub hnub yuav tsaus nti tuaj. Lub hli yuav txia ua ntshav. Yuav xub muaj tej xwm ntawd ces Huab Tais lub hnub nyoog muaj hwj xyeej thiaj yuav tshwm sim tuaj.
5 Tas ib tsoom neeg hu txog Huab Tais lub npe lawv yuav ntsib kev cawm. Vim Huab Tais hais tias : Nyob saum lub roob Xis Yoos yuav muaj ib pab neeg dim, nyob Yes Lus Xas Les yuav muaj ib pab neeg ciaj, yog cov uas Huab Tais yuav hu lawv.
Yog Tswv Ntuj lo Lus
Nkauj Paj Nruag Txais Ntuj Lus
NPN 104:1-2, 24, 35, 27-28, 29b-30 (30)
(Nqua Suab Cav Txog Tswv Ntuj, 36)
Txais: Huab Tais, thov Koj xa Leej Ntuj Plig Ntshiab nqes los ua kom lub ntiaj teb rov tshiab tuaj.
Hoặc : As les lus yas.
1. Kuv tus plig, koj cav lus zoo txog Huab Tais!
Kuv tus Huab Tais Tswv Ntuj, koj loj tas nrho.
Koj hnav koob meej ci ntsa iab.
Koj hnav qhov pom kev li lub tsho tshaj sab muaj hwj chim.
Koj nthuav lub ntuj zoo li ib chaws ntaub. Teb.
2. Huab Tais, koj cov hauj lwm ntau tas nrho.
Koj tsim tas txhua yam raws kev thoob tsib.
Koj tsim txhua yam tsiaj nyob puv ntiaj teb.
Kuv tus plig, koj cav lus zoo txog Huab Tais ! Teb.
3. Txhua leej txhua tus tos koj yuav pub txhiam xws rau lawv raws caij nyoog.
Koj pub rau lawv ces lawv cev tes txais.
Koj nthuav koj txhais tes ces lawv tau txais txhua yam zoo. Teb.
4. Yog koj rho txoj pa ntawm leej twg mas lawv txoj sia tu,
lawv rov mus ua av luaj.
Thaum koj xa koj lub tswv yim tuaj mas lawv rov tsheej xeeb muaj txoj sia.
Koj ua kom lub ntiaj teb rov tshiab tuaj. Teb.
Zaj Nyeem Ob
Los Mas 8: 22-27
Leej Ntuj Plig sawv peb chaw thov Ntuj rau peb : nws hais cov lus uas neeg piav tsis tau.
Paj Lug tsab ntawv sau tuaj rau cov ntseeg nyob Los Mas
22 Kwv tij sawv daws, peb paub tias, los txog tav no, tas puas tsav yam ntuj tsim los ntsaj xws li ib tug poj niam daws cev.
23 Tsis yog tas puas tsav yam ntsaj xwb ; tab txawm peb twb tau txais Leej Ntuj Plig cov txiaj ntsim los ua peb tug, tsis kav peb tseem ntsaj nyob hauv nruab siab thiab, vim peb tos lub caij txhiv peb lub cev.
24 Txoj kev cawm peb yog qhov uas peb tos ntsoov txog. Thaum yus tau yam uas yus tos lawm, mas yus tsis tos ntxiv ; yam uas yus tau lawd, mas yus yuav ua li cas tos ntxiv ?
25 Tab sis thaum peb tos yam peb tsis pom, mas peb ua siab ntev tos.
26 Leej Ntuj Plig tuaj nres peb cov neeg tsis muaj zog. Peb tsis paub thov dab tsi kom peb txoj kev teev Ntuj ntxim Tswv Ntuj siab. Tab sis Leej Ntuj Plig sawv peb chaw thov Ntuj rau peb : nws hais cov lus uas neeg piav tsis tau.
27 Tus Tswv Ntuj uas tsom hauv neeg nruab siab, nws paub tias Leej Ntuj Plig xav kom tau dab tsi : vim li no, Leej Ntuj Plig sawv cov ntshiab chaw thov Ntuj raws nraim li Tswv Ntuj lub siab xav.
Yog Tswv Ntuj lo Lus
Nkauj Cav Txog Lub Moo Zoo
(Nqua Suab Cav Txog Tswv Ntuj, 218, nqe 1)
As les lus yas. As les lus yas. Los mas ! Leej Ntuj Plig Ntshiab, koj los ua kom peb lub siab kub li hluav taws, cog txoj kev ntseeg kom ruaj nreb hauv peb mus ib txhis. As les lus yas.
Ntawv Moo Zoo
Zam 7: 37-39
Ib co niam dej muaj txoj sia yuav txhawv ntawm nws lub hauv siab los.
Nej mloog ib zag nyob hauv Zam Ntawv Moo Zoo
37 Hnub xaus lub ntees nqaum paj nqaum nruas, yog ib hnub loj. Yes Xus sawv ntsug nyob ntawd, nws hais nrov nrov tias : "Leej twg nqhis, mas kom nws tuaj cuag kuv.
38 Leej twg ntseeg txog kuv, mas kom nws haus. Yuav tshwm sim raws li Ntawv hais tias : ib co niam dej muaj txoj sia yuav txhawv ntawm nws lub hauv siab los."
39 Yog Yes Xus hais txog Leej Ntuj Plig uas cov ntseeg txog nws yuav tau txais. Vim Leej Ntuj Plig tseem tsis tau los, rau qhov tias Yes Xus tseem tsis tau txais koob meej.
Yog Huab Tais Yes Xus Lub Moo Zoo
){kind=link}