Zaj Nyeem Ib
Hauv Paus 3: 9-15
Tswv Ntuj siab zoo. Neeg hla Tswv Ntuj lo lus, neeg tsis kam txais txoj hmoov zoo uas Tswv Ntuj xav pub rau neeg. Tsis kav Tswv Ntuj cog lus tias nws yuav xa ib tug tuaj kho neeg txoj hmoov.
Cov lus nyob hauv ntawv Hauv Paus
As Das noj lub txiv uas Huab Tais Tswv Ntuj txwv tsis pub noj lawm.
9 Huab Tais Tswv Ntuj hu tus txiv neej hais tias : "Koj nyob qhov twg ?"
10 Tus txiv neej teb tias : "Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim."
11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?"
12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !"
13 Huab Tais Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj."
14 Ces Huab Tais Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej.
15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
Yog Tswv Ntuj Lo Lus
Nkauj Paj Nruag Txais Ntuj Lus
NPN 130:1-2, 3-4, 5-6, 7-8 (7bc)
(Nqua Suab Cav Txog Tswv Ntuj, 114)
Txais: Nyob hauv Huab Tais muaj kev cawm thiab kev khuv leej neeg.
1. Kuv nyob hauv qab tiv txwv, Huab Tais, kuv hu txog koj,
Huab Tais, thov koj mloog kuv lub suab.
Koj tig ntsej los mloog kuv lub suab taij. Teb.
2. Huab Tais, yog koj nco ntsoov peb cov txhaum
mas tsis muaj leej twg yuav nyob taus.
Nyob hauv koj muaj txoj kev zam ces sawv daws hwm koj. Teb.
3. Kuv tos txog Huab Tais, kuv tos nws tas siab tas ntsws.
Kuv tso siab rau nws lo lus.
Kuv tus plig tos Huab Tais heev dua tus zov keeb tos txog lub caij kaj ntug. Teb.
4. His Xas Lais, koj tso siab rau Huab Tais mog
vim nyob hauv Huab Tais muaj lub txiaj ntsim thiab txoj kev cawm neeg.
Nws yog tus yuav txhiv His Xas Lais dim ntawm lub txim txhaum. Teb.
Zaj Nyeem Ob
2 Kos Lis Nthos 4:13-5:1
Peb pheej laus mus, peb lub cev pheej puas zuj zus. Tab sis peb tus neeg sab hauv niaj hnuv rov tshiab tuaj.
Paj Lug tsab ntawv ob sau tuaj rau cov ntseeg nyob Kos Lis Nthos
13 Kwv tij sawv daws, peb tau tib lub tswv yim ntseeg, raws li Ntawv sau tseg tias : ‘Kuv ntseeg, kuv thiaj hais lus.’ Ntawm peb, mas peb ntseeg : peb thiaj hais lus.
14 Peb paub tseeb tias, tus tsa Huab Tais Yes Xus sawv rov los, nws kuj yuav tsa peb nrog Yes Xus sawv thiab. Nws yuav coj peb mus nrog nej nyob ze Yes Xus.
15 Tej yam hais saum no, yog tshwm sim los pab nej, kom nej tau txais txiaj ntsim ntau, ces yuav muaj neeg coob ua Ntuj tsaug, kom Tswv Ntuj muaj koob meej.
16 Vim li no peb thiaj tsis ntaus siab me. Peb lub cev sab nraud puas zuj zus, tab sis peb tus neeg sab hauv niaj hnub rov tshiab tuaj.
17 Txoj kev txom nyem sib sib uas tuaj raug peb ib ntus, npaj ib lub koob meej loj tas nrho rau peb, yog lub koob meej nyob mus li uas peb luj tsis tau.
18 Li ntawd, peb tsis ntsia yam qhov muag pom tau, peb ntsia yam qhov muag pom tsis tau. Ib puas tsav yam uas qhov muag pom tau, tsuas nyob ib ntus xwb ; hos ib puas tsav yam uas qhov muag pom tsis tau, yuav nyob mus li.
51 Vim peb paub tias, yog lub tsev tsam phooj hauv ntiaj teb, uas peb txoj sia ciaj nyob hauv, raug luag rhuav pob lawm, los peb muaj ib lub tsev nyob mus li, yog lub uas Tswv Ntuj txhais tes txhim, tsis yog neeg txhais tes txhim.
Yog Tswv Ntuj Lo Lus
Nkauj Cav Txog Lub Moo Zoo
Zam 12:31b-32
(Nqua Suab Cav Txog Tswv Ntuj, 238, nqe 2)
As les lus yas. As les lus yas. Huab Tais hais tias, yog lub caij txiav txim rau lub ntiaj teb neeg. Zaum no, tus tswj lub qab ntuj yuav raug ntiab tawm mus.
Ntawm Kuv mas, thaum luag muab Kuv tsa siab rau saum lub ntiaj teb, Kuv yuav rub tas ib tsoom haiv neeg kom los cuag Kuv. As les lus yas.
Ntawv Moo Zoo
Mas Kos 3:20-35
Cov neeg txhob txwm kaw lawv lub siab rau Yes Xus lawv ua txhaum rau Leej Tswv Yim. Cov qhib lawv lub siab mloog Yes Xus lawv yog Yes Xus cov kwv.
Nej mloog ib zag nyob hauv Mas Kos Ntawv Moo Zoo
20 Muaj ib hnub, Yes Xus los tsev, ces rov muaj neeg coob tuaj sib sau, Yes Xus lawv tsis xyeej noj mov li.
21 Yes Xus cov neeg hnov li ntawd, lawv tawm tuaj ntes nws, vim lawv hais tias : "Nws tsis meej pem lawm."
22 Cov thoob xwm tuaj pem Yes Lus Xas Les tuaj hais tias : "Nws raug dab Npes Ntxes Npus." Lawv tseem hais tias : "Nws hu txog tus tuam thawj dab los ntiab dab tawm."
23 Yes Xus hu lawv los ntawm nws, ces nws ua paj lug hais rau lawv tias : "Xas Tas yuav ua cas ntiab tau Xas Tas ?
24 Yog ib lub teb chaws rov ua kom nws sib tawg, mas lub teb chaws ntawd nyob tsis ruaj.
25 Yog ib tse neeg rov ua kom nws sib tawg, mas lub tsev ntawd yuav nyob tsis tau.
26 Ua li yog Xas Tas rov sawv tiv Xas Tas, mas nws tawg, ces nws yuav nyob tsis tau, nws kawg yuav piam sij tas.
27 Tsis muaj leej twg nkag tau mus hauv tus neeg muaj zog tsev, mus lwg nws lub cuab tam, yog tsis xub muab tus muaj zog khi tso, mas nws yuav lwg tsis tau tus muaj zog lub tsev.
28 Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm.
29 Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li : nws ua ib qho txhaum nyob mus li."
30 Vim lawv hais tias : "Yes Xus raug ib tug dab tsis huv."
31 Yes Xus niam thiab nws cov kwv tij tuaj txog, lawv nyob nraum zoov, lawv kom luag mus hu Yes Xus.
32 Muaj ib pab neeg zaum ncig Yes Xus, lawv hais rau nws tias : "Koj niam nrog koj cov kwv thiab cov muam tuaj nyob nraud, lawv nrhiav koj."
33 Yes Xus teb rau lawv tias : "Leej twg yog kuv niam ? Leej twg yog kuv kwv tij ?"
34 Yes Xus ntsia cov neeg zaum ncig nws, nws hais tias : "Kuv niam thiab kuv cov kwv tij nyob ntawm no.
35 Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam."
Yog Huab Tais Yes Xus Lub Moo Zoo
){kind=link}