Zaj Nyeem Ib
Thoob Tsib 2: 12.17-20
Thaum cov neeg siab ncaj ntuas luag tej mas ntau zaus luag tej muab cov neeg siab ncaj tua.
Cov lus nyob hauv Ntawv Thoob Tsib
12 Cov neeg tsis hwm Ntuj hais tias : Peb kav tsij cuab ntxiab rau tus neeg ncaj, vim nws ua ntxhov peb siab, nws txiav txim rau peb tus yam ntxwv, nws cem peb tias peb ua txhaum rau Txoj Cai, ua txhaum rau txoj kev peb tau kawm.
17 Peb sim saib qhov nws hais saib puas muaj tseeb. Peb sim ntsia saib nws yuav tuag zoo li cas.
18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws, thiab yuav npo nws ntawm cov ntxub nws txhais tes.
19 Peb yuav sim nws, peb ua tub qaug nws, peb hiam nws saib. Kom peb paub nws lub siab zoo npaum li cas, thiab saib nws puas ua siab ntev nyiaj kom dhau.
20 Peb kav tsij txiav txim kom nws tuag raws ib txog kev poob koob meej, vim nws twb hais tias yuav muaj tus tuaj npo nws.
Yog Tswv Ntuj lo Lus
Nkauj Paj Nruag Txais Ntuj Lus
NPN 54:3-4, 5, 6-8 (6b)
(Nqua Suab Cav Txog Tswv Ntuj, 129)
Txais: Huab Tais tuaj kuv tog, Nws txheem kuv.
1. Tswv Ntuj, koj lub npe cawm kuv;
tso koj lub hwj huam los txheem kuv.
Tswv Ntuj, thov koj mloog kuv zaj thov.
Koj tig ntsej los mloog cov lus tawm hauv kuv lub ncauj los ! Teb.
2. Cov neeg muab hlob sawv los tawm tsam rhuav kuv,
cov ntxub kuv xav txo kuv txoj sia.
Lawv tsis saib tias muaj Tswv Ntuj li. Teb.
3. Nej ntsia saib ! Tswv Ntuj tuaj pab kuv lawm.
Huab Tais txheem kuv, nws tsa kuv cai.
Kuv zoo siab cev ib co txim los txi rau koj.
Huab Tais, kuv cav lus zoo txog koj lub npe vim koj lub npe zoo tas nrho. Teb.
Zaj Nyeem Ob
Yas Kos 3:16-4:3
Leej twg ua kom muaj rog ? Yog peb sawv daws. Vim peb sib cav sib ceg nyob hauv peb tej tsev, yog kev ua rog cov cag.
Cov lus nyob hauv Yas Kos Tsab Ntawv
16 Kwv tij sawv daws,
Vim tias, qhov chaw uas neeg sib khib thiab sib ceg, mas muaj ntau yam kev ntxhov, thiab ntau yam hauj lwm phem.
17 Hos txoj kev thoob tsib nqes saum ntuj los, mas yog kev thoob tsib huv, yog kev thoob tsib tseb kev thaj yeeb, kev thoob tsib tiaj tus, nws nrhiav kev sib zam, nws khuv leej, nws txi ntau yam txiv zoo, nws tsis tsa leej twg cai, tsis ua txuj yog neeg zoo.
18 Cov neeg tsim kev thaj yeeb txi ib lub txiv phim kev ncaj nyob hauv kev thaj yeeb.
41 Tej kev sib ntaus rog, thiab tej lus sib ceg hnyav hauv nej pab neeg, txhawv qhov twg los ? Puas yog los ntawm tej kev ntshaw hauv nej pab neeg ?
2 Nej ntshaw, tab sis nej tsis muaj. Nej ntshaw, ces nej khib, vim nej tsis tau raws li lub siab ntshaw, nej thiaj sib ceg, thiab sis ntaus rog. Nej tsis muaj vim nej tsis thov.
3 Nej thov, tab sis nej tsis tau txais, vim nej tsis ua tib zoo thov, nej tsuas xav tau nyiaj txiag siv rau nej lub cev kom tau zoo.
Yog Tswv Ntuj lo Lus
Nkauj Cav Txog Lub Moo Zoo
2 Tes Xas Los Nis 2:14
(Nqua Suab Cav Txog Tswv Ntuj, 236, nqe 4)
As les lus yas. As les lus yas.
Ntuj hu peb los txais kev ntseeg nyob hauv Lub Moo Zoo kom peb tau txais Huab Tais Yes Xus Pleev lub koob meej nyob mus li tas ib txhiab thiab ib txhis.
As les lus yas.
Ntawv Moo Zoo
Mas Kos 9: 30-37
Tus xav ua tus thawj nyob pem Tswv Ntuj lub Ceeb Tsheej nws yuav tuaj yeem tuag. Yuav nyiam ua tus tub txib, nyiam ua tus me.
Nej mloog ib zag nyob hauv Mas Kos Ntawv Moo Zoo
30 Tseem muaj ib hnub, Yes Xus lawv tawm qhov chaw ntawd mus, lawv hla xeev Nkas Lis Lais, Yes Xus tsis xav kom muaj neeg paub.
31 Vim Yes Xus qhia nws cov thwj tim tias : "Luag yuav muab Neeg Leej Tub muag rau hauv tsoom neeg txhais tes. Luag yuav muab nws tua. Thaum luag muab nws tua tuag lawd, peb hnub tom qab, nws yuav sawv rov los."
32 Cov thwj tim tsis to taub lo lus ntawd, tab sis lawv ntshai nug Yes Xus.
33 Lawv mus Kas Fas Naus. Thaum lawv mus txog tsev, Yes Xus nug lawv tias : "Nej sib cav txog dab tsi nyob tom kev ?"
34 Lawv nyob ntsiag to, vim nyob tom kev, lawv sib cav tias leej twg yog tus loj dua cov.
35 Yes Xus zaum, nws hu Pab Kaum Ob los, nws hais rau lawv tias : "Leej twg xav ua tus thawj, mas nws yuav ua tus tuaj tom sawv daws qab, thiab yuav ua sawv daws tus tub txib."
36 Ces Yes Xus coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias :
37 "Leej twg txais ib tug me nyuam yaus zoo li tus no, vim kuv lub npe, yog nws txais kuv. Thiab leej twg txais kuv, mas tsis yog nws txais kuv, yog txais Tus xa kuv tuaj."
Yog Huab Tais Yes Xus Lub Moo Zoo
){kind=link}