Zaj Nyeem Ib
Yes Les Mias 31: 7-9
Thaum cov His Xas Lais tab tom mus nyob txim nyob pej kum teb, tus Yaj Saub Yes Les Mias xub qhia lawv tias muaj ib lub caij twg Tswv Ntuj yuav Coj lawv rov los. Lub caij peb raug txom nyem peb yuav paub tias yeej yuav muaj ib lub Caij Tswv Ntuj yuav nplij peb.
Cov lus nyob hauv ntawv Yes Les Mias
7 Huab Tais hais li no : "Nej kav tsij qw suab zoo siab txog Yas Kos mas ! Nej cav lus zoo txog ntiaj teb thawj lub kuj cuab ! Nej qw nrov nrov kom sawv daws hnov, nej hais tias : Huab Tais cawm nws haiv neeg lawm, yog pab seem His Xas Lais !"
8 "Kuv coj lawv pem lub teb chaws pej fab rov los. Kuv sau lawv tim npoo ntiaj teb rov los. Kuv sau tus dig muag nrog tus ceg tawv, sau tus poj niam muaj me nyuam nrog tus tseem nyob nruab hlis. Tas sawv daws ua lub txoos loj rov los ntawm no !
9 Thaum ub lawv mus, lawv quaj. Kuv coj lawv los, lawv muaj ntau yam nplij lawv. Kuv coj lawv mus cuag cov dej ntws, mus taug ib txog kev tiaj, lawv yuav tsis dawm ko taw. Vim kuv yog ib leeg txiv hlub His Xas Lais, thiab Es Fais yog kuv tus tub hlob."
Yog Tswv Ntuj lo Lus
Nkauj Paj Nruag Txais Ntuj Lus
NPN 126:1-2a, 2b-3, 4-5, 6 (3)
(Nqua Suab Cav Txog Tswv Ntuj, 134)
Txais: Peb zoo siab hom khaj vim Huab Tais ua tej yam loj kawg rau peb.
1. Thaum Huab Tais coj Xis Yoos cov neeg nyob txim rov los,
peb xav tias yog npau suav.
Peb lub ncauj muaj suab luag, peb tus nplaig hu nkauj zoo siab. Teb.
2. Pej kum haiv neeg hais zom zaws tias,
“Huab Tais tau ua tej yam loj tas nrho rau lawv.”
Huab Tais tau ua tej yam loj rau peb, peb zoo siab tas nrho. Teb.
3. Huab Tais, koj coj peb cov neeg nyob txim rov los,
xws li dej sab siv huam nyob teb chaws suab puam.
Cov neeg tseb nplej, tseb ntxuag kua muag.
Thaum lawv sau nplej, lawv sau nrog suab luag. Teb.
4. Thaum mus, lawv quaj vim lawv ris cov seev noob.
Thaum lawv rov los, lawv hu nkauj vim lawv ris cov nplej tshiab los. Teb.
Zaj Nyeem Ob
Hes Nplaws 5: 1-6
Yes Xus yog tus Leej Choj cev ntiaj teb neeg cov lus rau Tswv Ntuj. Peb kuj nrog Yes Xus ua Leej Choj pab ntiaj teb neeg cev lus rau Tswv Ntuj.
Cov lus nyob hauv tsab ntawv sau tuaj rau cov ntseeg nyob Hes Nplaws.
1 Kwv tij sawv daws, Tsis hais tus Tuam Leej Choj twg, nws tsuas yog ib tug tawm hauv zeej tsoom los, mas nws ua Leej Choj pab neeg nyob hauv txoj kev fim Tswv Ntuj, pab cev paj tshab txi Ntuj them txim txhaum.
2 Tus Leej Choj hlub taus cov neeg tsis paub dab tsi thiab cov neeg yuam kev, vim tias nws kuj txawj ua txhaum xws li lawv.
3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum.
4 Tsis muaj leej twg yuav rov muab nws tsa ua leej choj tau. Yog Tswv Ntuj hu nws mas nws thiaj ua leej choj tau, ib yam nkaus li Tswv Ntuj tau hu As Loos.
5 Leej Pleev, kuj tsis tau rov tsa nws ua Tuam Leej Choj muaj hwj chim, nws txais lub hwj chim ntawd ntawm tus hais rau nws tias : “Koj yog kuv Leej Tub. Hnub no, kuv xeeb koj.”
6 Tswv Ntuj tseem hais tias : “Koj ua leej choj mus ib txhiab ib txhis, raws li Mes Kis Xes Des txoj kev.”
Yog Tswv Ntuj lo Lus
Nkauj Cav Txog Lub Moo Zoo
2 Tis Mos Tes 1:10
(Nqua Suab Cav Txog Tswv Ntuj, 235, nqe 5)
As les lus yas. As les lus yas. Peb tus Cawm Seej Yes Xus Pleev rhuav txoj kev tuaj lawm. Nws Lub Moo Zoo coj txoj sia tshiab tuaj rau sawv daws. As les lus yas.
Ntawv Moo Zoo
Mas Kos 10: 46-52
Yes Xus yog tus Vaj Das Vis xeeb ntxwv, nws yog Tswv Ntqj Leej Tub, nws tsis ua tus neeg muab hlob nws hlub tus neeg pluag dig muag thov khawv ntawm kev.
Nej mloog ib zag nyob hauv Mas Kos Ntawv Moo Zoo
46 Muaj ib zaug, lawv tuaj txog Yes Lis Kos. Thaum Yes Xus nrog cov thwj tim thiab ib pab neeg coob tawm hauv Yes Lis Kos mus, muaj ib tug neeg dig muag thov khawv zaum ntawm ntug kev. Nws hu ua Npas Tis Mes, yog Tis Mes tus tub.
47 Thaum nws hnov tias yog Yes Xus Nas Xas Les, nws pib hu tias : "Yes Xus, Das Vis Leej Tub, thov koj khuv leej kuv !"
48 Muaj ntau leej cem nws kom ua twj ywm, tab sis tus dig muag haj yam hu nrov tias : "Das Vis Leej Tub, thov koj khuv leej kuv."
49 Yes Xus nres, nws hais tias : "Nej hu nws los." Lawv hu tus dig muag tias : "Koj tso siab mog ! Koj sawv mus. Yes Xus hu koj."
50 Ces tus dig muag pov rhees nws lub tsho ntev cia, dhia mus cuag Yes Xus.
51 Yes Xus hais rau nws tias : "Koj xav kom kuv ua dab tsi rau koj ?" Tus dig muag teb rau Yes Xus tias : "Kuv tus Xib Hwb, kuv thov kom kuv qhov muag rov pom kev !"
52 Yes Xus hais rau nws tias : "Koj mus mog ! Koj lub siab ntseeg cawm koj lawm." Tam sis ntawd, tus dig muag rov pom kev, ces nws taug kev lawv Yes Xus qab.
Yog Huab Tais Yes Xus Lub Moo Zoo
){kind=link}